News
- Details
കാര്‍ഷിക വായ്പാ തട്ടിപ്പ് ഫാ. തോമസ് പീലിയാനിക്കല്‍ അറസ്റ്റില്‍
ആലപ്പുഴ: കുട്ടനാട്ടിലെ കര്‍ഷകരുടെ പേരില്‍ കോടികളുടെ വായ്പാ തട്ടിപ്പ് നടത്തിയെന്ന കേസില്‍ മുഖ്യപ്രതി ഫാ. തോമസ് പീലിയാനിക്കലിനെ ക്രൈംബ്രാഞ്ച് അറസ്റ്റ് ചെയ്തു. രാമങ്കരിയിലെ കുട്ടനാട് വികസനസമിതി ഓഫീസില്‍നിന്ന് ജില്ലാ ക്രൈംബ്രാഞ്ച് ഡിവൈഎസ്പി ശ്രീകുമാരന്‍ നായരുടെ നേതൃത്വത്തിലുള്ള അഞ്ചംഗ അന്വേഷണ സംഘമാണ് അറസ്റ്റ് ചെയ്തത്. കുട്ടനാട്ടിലെ നിരവധിയാളുകളുടെ പേരില്‍ ഗ്രൂപ്പുകളുണ്ടാക്കി വായ്പ നല്‍കാന്‍ ബാങ്കുകളെ തെറ്റിദ്ധരിപ്പിക്കുകയും ഗ്രൂപ്പില്‍പെട്ട കര്‍ഷകര്‍ അതിന്‍റെ പേരില്‍ കണക്കെണിയിലാവുകയും ചെയ്തെന്ന പരാതിയിലാണ് പീലിയാനിക്കല്‍ പ്രതിയായത്. ഈ സംഭവത്തില്‍ വിവിധ സ്റ്റേഷനുകളിലായി 12 കേസ് രജിസ്റ്റര്‍ ചെയ്തിട്ടുണ്ട്. ആലപ്പുഴ ജില്ലാ ക്രൈംബ്രാഞ്ച് അന്വഷിക്കുന്ന കേസില്‍ ഫാ. തോമസ് പീലിയാനിക്കലിനെ കൂടാതെ കാവാലം സ്വദേശിയും വെളിയനാട് ബ്ലോക്ക് പഞ്ചായത്ത് അംഗവുമായ എന്‍സിപി നേതാവ് റോജോ ജോസഫ്, കുട്ടനാട് വികസന സമിതി ഓഫീസ് ജീവനക്കാരി ത്രേസ്യാമ്മ തുടങ്ങിയവരും പ്രതികളാണ്. നിലവില്‍ 6 കേസാണ് പീലിയാനിക്കലിനെതിരെ ക്രൈംബ്രാഞ്ച് അന്വേഷിക്കുന്നത്. ഇതില്‍ രണ്ടു കേസില്‍ ജാമ്യം ലഭിച്ചിരുന്നു. ഇപ്പോള്‍ നാലു കേസിലാണ് അറസ്റ്റുചെയ്തതെന്ന് ഡിവൈഎസ്പി പറഞ്ഞു.
- Details
കാലവര്‍ഷക്കെടുതി: മരിച്ചവരുടെ ആശ്രിതര്‍ക്കു നാലുലക്ഷം വീതം
തിരുവനന്തപുരം: സംസ്ഥാനത്തു കാലവര്‍ഷക്കെടുതിയില്‍ മരിച്ചവരുടെ ആശ്രിതര്‍ക്കു നാലുലക്ഷം രൂപ വീതം അനുവദിക്കാന്‍ മന്ത്രിസഭായോഗം തീരുമാനിച്ചു. വീടു പൂര്‍ണമായി തകര്‍ന്നവര്‍ക്ക് നാലുലക്ഷം രൂപ നല്‍കും. ഭൂമി ഒഴുകിപ്പോയവര്‍ക്ക് ഭൂമിയുടെ ന്യായവില കൂടി കണക്കാക്കി പരമാവധി ആറുലക്ഷം രൂപ ലഭിക്കും. ഭൂമി ഒഴുകിപ്പോയവര്‍ക്ക് പകരം വാങ്ങുന്ന ഭൂമിയുടെ യഥാര്‍ത്ഥ വിലയോ ആറു ലക്ഷം രൂപയോ ഏതാണ് കുറവ് അത്രയും നല്‍കും. കാലവര്‍ഷക്കെടുതിയില്‍ പരുക്കേറ്റവരുടെ മുഴുവന്‍ ചികിത്സാ ചെലവും സര്‍ക്കാര്‍ വഹിക്കും. കൃഷിനാശം സംഭവിച്ചവര്‍ക്ക് ഇത്തവണകൂടി മാത്രമേ നഷ്ടപരിഹാരം നല്‍കുകയുള്ളൂ. ഇനി മുതല്‍ കൃഷിക്ക് ഇന്‍ഷ്വറന്‍സ് നിര്‍ബന്ധമാക്കും. ഭാവിയില്‍ ഇത്തരം ദുരന്തങ്ങള്‍ ഒഴിവാക്കുന്നതിനു സ്വീകരിക്കാന്‍ കഴിയുന്ന നടപടികള്‍ ശിപാര്‍ശ ചെയ്യുന്നതിനു റവന്യൂ അഡീഷണല്‍ ചീഫ് സെക്രട്ടറി ചെയര്‍മാനായ ഉന്നതതല സമിതിയെ നിയോഗിച്ചു.
Sponsored Advertisments
