Kerala Express

ന്യൂഡല്‍ഹി: സംസ്ഥാന പോലീസ് മേധാവി സ്ഥാനത്തു നിന്നു ഡോ. ടി.പി. സെന്‍കുമാറിനെ നീക്കിയ സംസ്ഥാന സര്‍ക്കാരിനു വന്‍ തിരിച്ചടി. ക്രമസമാധാന ചുമതലയുള്ള ഡിജിപി സ്ഥാനത്തുനിന്നു സെന്‍കുമാറിനെ മാറ്റിയ സംസ്ഥാന സര്‍ക്കാരിന്‍റെ ഉത്തരവും അതു ശരിവച്ച കേരള ഹൈക്കോടതി ഉത്തരവും സുപ്രീംകോടതി റദ്ദാക്കി. സെന്‍കുമാറിനെ ഡിജിപിയായി തിരികെ നിയമിക്കാനും കോടതി ഉത്തരവിട്ടു.
സെന്‍കുമാറിനോടു നീതികേടു കാട്ടിയെന്നു ചൂണ്ടിക്കാട്ടിയ ജസ്റ്റീസുമാരായ മദന്‍ ബി. ലോകുര്‍, ദീപക് ഗുപ്ത എന്നിവരുടെ ബെഞ്ച് ജിഷ വധക്കേസ്, പുറ്റിങ്ങല്‍ ക്ഷേത്രത്തിലെ വെടിക്കെട്ടപകടം എന്നീ സംഭവങ്ങളില്‍ പോലീസ് മേധാവിക്കു വീഴ്ചയുണ്ടായെങ്കില്‍ അതില്‍ സംസ്ഥാന സര്‍ക്കാരും ഉത്തരവാദിയാണെന്നു വ്യക്തമാക്കി. പുറ്റിങ്ങല്‍ വെടിക്കെട്ടപകടത്തില്‍ കുറ്റക്കാരായ പോലീസ് ഉദ്യോഗസ്ഥര്‍ക്കെതിരെ  നടപടിയെടുക്കുന്നതിലും ജിഷ വധക്കേസില്‍ തൃപ്തികരമായ വിശദീകരണം നല്‍കുന്നതിലും പോലീസ് മേധാവിയായിരുന്ന സെന്‍കുമാറിനു വീഴ്ച സംഭവിച്ചെന്നാണു സര്‍ക്കാര്‍ വാദിച്ചിരുന്നത്. ഈ സംഭവങ്ങളില്‍ പോലീസിന്‍റെ ഭാഗത്തു നിന്നുണ്ടായ വീഴ്ച പൊതുജനങ്ങള്‍ക്കിടയില്‍ അതൃപ്തിയുണ്ടാക്കിയെന്നും ഇതു കണക്കിലെടുത്താണു സ്ഥാനത്തുനിന്നു മാറ്റിയതെന്നും സര്‍ക്കാര്‍ വാദിച്ചു. ഇതു കോടതി അംഗീകരിച്ചില്ല. സെന്‍കുമാറിനോടു മോശമായാണ് സര്‍ക്കാര്‍ പെരുമാറിയതെന്നു ചൂണ്ടിക്കാട്ടിയ കോടതി, പൊതുജനങ്ങള്‍ക്ക് അതൃപ്തിയുണ്ടാക്കിയെന്നതിനു ഹാജരാക്കിയ തെളിവ് നടപടിയെടുക്കുന്നതിനു തൊട്ടുമുമ്പ് കൊണ്ടുവന്നതാണെന്നും അത് അംഗീകരിക്കാവുന്നതല്ലെന്നും വ്യക്തമാക്കി.

Sponsored Advertisments