Kerala Express

തിരുവനന്തപുരം: പാര്‍ട്ടിയെ അപകീര്‍ത്തിപ്പെടുത്തുന്ന ശൈലി പിന്തുടരുന്ന സംസ്ഥാന സെക്രട്ടേറിയറ്റ് അംഗവും മന്ത്രിയുമായ എം.എം. മണിക്കെതിരെ നടപടിക്കു സിപിഎം സംസ്ഥാന സെക്രട്ടേറിയറ്റില്‍ ധാരണ. മന്ത്രിസ്ഥാനത്ത് അദ്ദേഹത്തെ നിലനിര്‍ത്തണോ എന്ന ചോദ്യവും സെക്രട്ടേറിയറ്റില്‍ ഉയര്‍ന്നതായി അറിയുന്നു. ഇക്കാര്യത്തിലും സംസ്ഥാന കമ്മിറ്റിയുടെ കൂടി വികാരം പരിഗണിക്കും. മൂന്നാറിലെ പെമ്പിളൈ ഒരുമൈക്കെതിരെ മണി നടത്തിയ പരാമര്‍ശം മാത്രമല്ല, ശൈലി മാറ്റാനും തെറ്റുകള്‍ ആവര്‍ത്തിക്കാതിരിക്കാനും പാര്‍ട്ടി ഉപദേശിച്ചിട്ടും അതു പാലിക്കാത്തതും സെക്രട്ടേറിയറ്റ് കണക്കിലെടുത്തു. മുഖ്യമന്ത്രി പിണറായി വിജയനും സംസ്ഥാന സെക്രട്ടറി കോടിയേരി ബാലകൃഷ്ണനും മണിക്കെതിരെയാണ് സംസാരിച്ചത്. യോഗത്തില്‍ അദ്ദേഹത്തിന്‍റെ പ്രസംഗത്തെ പിന്തുണയ്ക്കാന്‍ ആരുമുണ്ടായില്ല. ദുര്‍വ്യാഖ്യാനം ചെയ്തു എന്ന വിശദീകരണം തന്നെയാണ് മണി യോഗത്തില്‍ നല്‍കിയത്. മാധ്യമപ്രവര്‍ത്തകരെ അദ്ദേഹം നിശിതമായി കുറ്റപ്പെടുത്തി. പക്ഷേ, വിശദീകരണം ദുര്‍ബലമായിരുന്നു.

Sponsored Advertisments

TSI-Adv
GP-Adv2