Kerala
- Details
തിരുവനന്തപുരം: മയക്കുമരുന്നു കേസുമായി ബന്ധപ്പെട്ട് അറസ്റ്റിലായ ബിനീഷ് കോടിയേരിയുടെയും ഭാര്യ റെനീറ്റയുടെയും സ്വത്തുക്കൾ കണ്ടുകെട്ടാൻ എൻഫോഴ്സ്മെന്റ്. ഇതിന്‍റെ ആദ്യപടിയായി രജിസ്ട്രേഷൻ ഐജിക്ക് എൻഫോഴ്സ്മെന്റ് ഡയറക്ടറേറ്റ് കത്ത് നൽകി. എൻഫോഴ്സ്മെന്റ് ഡെപ്യൂട്ടി ഡയറക്ടർ രാഹുൽ സിൻഹയാണ് രജിസ്ട്രേഷൻ ഐജിക്കു കത്ത് നൽകിയത്. കള്ളപ്പണം വെളുപ്പിക്കൽ തടയൽ നിയമപ്രകാരമാണു നടപടി. ബിനീഷിന്‍റെ പേരിലുള്ള മരുതുംകുഴിയിലെ "കോടിയേരി’ എന്ന വീടും സ്വത്തുക്കളും കണ്ടുകെട്ടാനാണ് എൻഫോഴ്സ്മെന്റ് തീരുമാനം. ഇതിനൊപ്പം ബിനീഷിന്‍റെ ഭാര്യ റെനീറ്റ, മയക്കുമരുന്നു കേസിലെ മുഖ്യപ്രതി അനൂപ് മുഹമ്മദ് എന്നിവരുടെയും സ്വത്ത് കണ്ടുകെട്ടണമെന്ന് എൻഫോഴ്സ്മെന്റ് ആവശ്യപ്പെട്ടിട്ടുണ്ട്. ഇതിന്‍റെ അടിസ്ഥാനത്തിൽ ഇവരുടെ സ്വത്തിന്‍റെ കൈമാറ്റം രജിസ്ട്രേഷൻ വകുപ്പ് തടഞ്ഞു.
- Details
തിരുവനന്തപുരം: വ്യാപകമായ എതിർപ്പ് ഉയർന്നതിനെത്തുടർന്ന് വിവാദ പോലീസ് നിയമ ഭേദഗതിയിൽനിന്നു പിന്മാറാൻ സർക്കാർ തീരുമാനിച്ചു. ഭേദഗതി നടപ്പിലാക്കില്ലെന്ന് മുഖ്യമന്ത്രി പിണറായി വിജയൻ അറിയിച്ചു. പ്രതിപക്ഷത്തിന്‍റെ നിശിതമായ എതിർപ്പിനൊപ്പം നിയമജ്ഞരും സമൂഹത്തിന്‍റെ വിവിധ തലങ്ങളിലുള്ളവരും ഓർഡിനൻസിനെതിരേ രംഗത്തെത്തിയിരുന്നു. നിയമഭേദഗതി പുനഃപരിശോധിക്കുമെന്ന് സിപിഎം ജനറൽ സെക്രട്ടറി സീതാറാം യെച്ചൂരി ഡൽഹിയിൽ പറഞ്ഞതിനു പിന്നാലെ ആയിരുന്നു ഓർഡിനൻസ് നടപ്പിലാക്കില്ലെന്ന് മുഖ്യമന്ത്രി പത്രക്കുറിപ്പിലൂടെ അറിയിച്ചത്. രാവിലെ എകെജി സെന്‍ററിലെത്തി മുഖ്യമന്ത്രി പാർട്ടി നേതാക്കളുമായി ഓർഡിനൻസിനെക്കുറിച്ച് ചർച്ച നടത്തിയിരുന്നു. തുടർന്നാണുനിയമം നടപ്പിലാക്കേണ്ടെന്നു തീരുമാനിച്ചത്. എന്നാൽ, ഓർഡിനൻസ് റദ്ദാക്കണമെന്ന ആവശ്യവുമായി പ്രതിപക്ഷം രംഗത്തെത്തി. ഓർഡിനൻസ് നടപ്പിലാക്കില്ലെന്നു പറഞ്ഞാലും അതിനു നിയമപരമായ പ്രാബല്യമുള്ളിടത്തോളം കാലം നിയമത്തിലെ വ്യവസ്ഥകൾ ബാധകമാക്കാൻ സാധിക്കുമെന്നാണു വിമർശനം. ഇക്കാര്യത്തിൽ എന്തു ചെയ്യണമെന്ന് മന്ത്രിസഭായോഗത്തിൽ ചർച്ച ചെയ്തു തീരുമാനിക്കാനാണ് സർക്കാർ ഉദ്ദേശിക്കുന്നത്. പൗരന്‍റെ വ്യക്തിസ്വാതന്ത്ര്യവും ഭരണഘടനാദത്തമായ അന്തസും ചോദ്യംചെയ്യുന്ന രീതിയിൽ സമൂഹമാധ്യമങ്ങളിലൂടെയും അല്ലാതെയും നടക്കുന്ന ദുഷ്പ്രചാരണങ്ങൾ തടയാനുള്ള ശ്രമം എന്ന നിലയിലാണ് കേരള പോലീസ് നിയമത്തിൽ ഭേദഗതി കൊണ്ടുവരാൻ സംസ്ഥാന സർക്കാർ തീരുമാനിച്ചതെന്നു മുഖ്യമന്ത്രി ചൂണ്ടിക്കാട്ടി.
- Details
തിരുവനന്തപുരം: സൈബർ ആക്രമണങ്ങൾക്കു തടയിടാനെന്ന പേരിൽ സംസ്ഥാന സർക്കാർ കൊണ്ടുവന്ന പോലീസ് നിയമ ഭേദഗതി എല്ലാ മാധ്യമങ്ങൾക്കും ബാധകമാണെന്നു വിജ്ഞാപനം. നിയമഭേദഗതിയിൽ ഓണ്‍ലൈൻ മാധ്യമം എന്നു പ്രത്യേകമായി പരാമർശമില്ല. ഇതിനു പകരം “ഏതെങ്കിലും തരത്തിലുള്ള വിനിമയോപാധികളിലൂടെ വ്യാജപ്രചാരണം നടത്തിയാൽ അതു കുറ്റകരമാകു”മെന്നാണ് വ്യവസ്ഥ ചെയ്തിരിക്കുന്നത്. ഇതിലൂടെ മുഴുവൻ മാധ്യമങ്ങളും കുരുക്കിലാകാമെന്നാണു പൊതുവിലയിരുത്തൽ. ഇതിനെതിരേ വ്യാപക പ്രതിഷേധമാണ് ഉയർന്നിട്ടുള്ളത്. ആക്ടിലെ 118-ാം വകുപ്പിൽ 118 എ എന്ന ഉപവകുപ്പ് ചേർത്തു കൊണ്ടാണു പുതിയ നിയമഭേദഗതി വരുത്തിയിരിക്കുന്നത്. ഭേദഗതി പ്രകാരം “ഒരാളെയോ ഒരു വിഭാഗം ആളുകളെയോ ഭീഷണിപ്പെടുത്തുന്നതിനോ അധിക്ഷേപിക്കുന്നതിനോ അപമാനിക്കുന്നതിനോ അപകീർത്തിപ്പെടുത്തുന്നതിനോ വേണ്ടി ഏതെങ്കിലും കാര്യമോ വിഷയമോ, വ്യാജമെന്ന് അറിഞ്ഞുകൊണ്ട് ഏതെങ്കിലും തരത്തിലുള്ള വിനിമയോപാധിയിലൂടെ നിർമിക്കുകയോ പ്രകടിപ്പിക്കുകയോ പ്രസിദ്ധീകരിക്കുകയോ പ്രചരിപ്പിക്കുകയോ ചെയ്താൽ ഇത്തരക്കാർക്കെതിരേ മൂന്നു വർഷം വരെ തടവോ 10,000 രൂപ വരെ പിഴയോ അല്ലെങ്കിൽ രണ്ടും കൂടിയോ ചുമത്താൻ അധികാരമുണ്ടാകും”. ഇതിനു പുറമെ ഇത്തരക്കാരെ വാറന്‍റില്ലാതെ അറസ്റ്റ് ചെയ്യാനും വ്യവസ്ഥ ചെയ്തിട്ടുണ്ട്. പലതരം മാധ്യമങ്ങളിൽ (അച്ചടി, ദൃശ്യ, ശ്രാവ്യ, ഓണ്‍ലൈൻ) ഏതിനൊക്കെ നിയമം ബാധകമാകുമെന്നു ഭേദഗതിയിൽ ഒരിടത്തും പരാമർശമില്ല. സൈബർ ആക്രമണം തടയുക എന്നതാണ് ഭേദഗതിയിലൂടെ ലക്ഷ്യമിടുന്നതെന്നാണ് സർക്കാർ വിശദീകരണം. എന്നാൽ ഓണ്‍ലൈൻ മാധ്യമം വഴി വ്യാജ വാർത്തകൾ പ്രചരിപ്പിക്കുന്നവർക്കെതിരെയുള്ള നിയമഭേദഗതിയാണിതെന്ന് വ്യക്തമാക്കിയിട്ടുമില്ല. ഇതിനു പുറമെ, പ്രസിദ്ധീകരിക്കപ്പെടുന്ന വാർത്തകൾ സത്യമാണോ വ്യാജമാണോ എന്നു പരിശോധിക്കുന്നത് ആരാണെന്നോ ഏതു തരത്തിലാണെന്നോ ഉള്ള യാതൊരു വിശദീകരണവും നിയമഭേദഗതിയിലില്ല. പോലീസിന് അമിതാധികാരം നൽകുന്നതിനുള്ള നിയമമാണിതെന്നും സർക്കാരിനെതിരെ വിമർശനം ഉന്നയിക്കുന്ന മാധ്യമങ്ങൾക്ക് കൂച്ചുവിലങ്ങിടുകയാണ് നിയമഭേദഗതിയിലൂടെ ലക്ഷ്യമിടുന്നതെന്നും പല കോണുകളിൽ നിന്ന് വിമർശനമുയർന്നിട്ടുണ്ട്.
Sponsored Advertisments
