Kerala
- Details
തൊടുപുഴ: ഏലപ്പാറ - വാഗമണ്‍ റൂട്ടിൽ നല്ലതണ്ണി പാലത്തിനു സമീപം നിർത്തിയിട്ടിരുന്ന കാർ മലവെള്ളപ്പാച്ചിലിൽ ഒലിച്ചുപോയി. കാറിലുണ്ടായിരുന്ന രണ്ടു യുവാക്കളെ കാണാതായി. ഇന്നലെ രാത്രി എട്ടോടെയാണ് സംഭവം. പാലൊഴുകുംപാറ വെള്ളച്ചാട്ടത്തിലേക്കു വാഹനം ഒഴുകിപോയതായാണ് സംശയിക്കുന്നത്. ദൃക്സാക്ഷികൾ നൽകിയ വിവരത്തിന്‍റെ അടിസ്ഥാനത്തിൽ പോലീസിന്റെയും ഫയർഫോഴ്സിന്റെയും നേതൃത്വത്തിൽ തെരച്ചിൽ നടത്തിയെങ്കിലും കണ്ടെത്താനായില്ല. കനത്തമഴയും പ്രതികൂല കാലാവസ്ഥയും മൂലം രാത്രിയിലെ തെരച്ചിൽ നിർത്തിവച്ചു. കോഴിക്കാനം, അണ്ണൻതമ്പിമല, ഏലപ്പാറ മേഖലകളിലെ തോട്ടങ്ങളിൽ ഉരുൾപൊട്ടലുണ്ടായി. ഏലപ്പാറ ടൗണിലെ വ്യാപാരസ്ഥാപനങ്ങളിലും വീടുകളിലും വെള്ളം കയറി. ഇടുക്കി മേലേചിന്നാറിലും രാത്രി പത്തോടെ ഉരുൾപൊട്ടലുണ്ടായി. ഹൈറേഞ്ചിൽ രാത്രിയിലും കനത്തമഴ തുടരുകയാണ്. ഇടുക്കിയിൽ രാത്രിയാത്ര നിരോധിച്ചിരിക്കുകയാണ്.
- Details
കുറവിലങ്ങാട്: നാടും നഗരവും ഉറ്റവരും ഉടയവരും ഒരുമിച്ച് മെറിനു വിട ചൊല്ലി. മെറിൻ ഇനി ജീവിക്കുക പ്രിയപ്പെട്ടവരുടെ ഹൃദയത്താളിൽ. ഇക്കഴിഞ്ഞ ചൊവ്വാഴ്ച കൊല്ലപ്പെട്ട മെറിനെ അമേരിക്കയിലെ താമ്പയിൽ ആറടി മണ്ണ് ഏറ്റുവാങ്ങി. മെറിന്‍റെ ആകസ്മിക വിയോഗം സൃഷ്ടിച്ച വേദനകൾ കടിച്ചമർത്തി താമ്പയിലെ തിരുഹൃദയ ക്നാനായ പള്ളിയിലെത്തിയ പ്രിയപ്പെട്ടവർ അവൾക്ക് യാത്രാമൊഴിയേകി. ഇങ്ങകലെ അവളുടെ ഓർമകൾ ഇരമ്പിനിന്ന മോനിപ്പള്ളിയിലെ വീട്ടിൽ വലിയ സ്ക്രീനിൽ തെളിഞ്ഞ ദൃശ്യങ്ങൾ നോക്കി മാതാപിതാക്കളും സഹോദരിയുമടക്കമുള്ളവർ അന്ത്യയാത്ര ചൊല്ലി. പ്രിയപ്പെട്ട മെറിന്‍റെ അന്ത്യയാത്രയുടെ ദൃശ്യങ്ങൾ വീട്ടിലൊരുക്കിയ വലിയ സ്ക്രീനിൽ തെളിഞ്ഞപ്പോൾ അതുവരെ പിടിച്ചുനിറുത്തിയ ദുഃഖം അണപൊട്ടിയൊഴുകി. കഴിഞ്ഞ പത്തുദിവസമായി എല്ലാവരും പരസ്പരം ആശ്വസിപ്പിക്കാൻ വിഫലശ്രമങ്ങൾ നടത്തുകയായിരുന്നു. ഇന്നലെ പാതിരാത്രി പിന്നിട്ടും അങ്ങകലെ നടക്കുന്ന മെറിന്‍റെ അന്ത്യയാത്രാചടങ്ങുകളിൽ അവർ കണ്ണീരോടെ പങ്കുചേർന്നു. നിറഞ്ഞൊഴുകുന്ന കണ്ണുകൾക്കു മുന്നിലെ കാഴ്ചകൾ പലതും നനവുള്ളതായി മാറുന്നത് കാണാമായിരുന്നു. വീഡിയോ കോളിലെത്തുന്ന അമ്മയുടെ ചേതനയറ്റശരീരം തിരിച്ചറിഞ്ഞോ ആവോ മെറിന്‍റെ മകൾ നോറയുടെ മുഖവും ദുഃഖ സാന്ദ്രമായിരുന്നു. വൈകുന്നേരം മോനിപ്പള്ളി തിരുഹൃദയപ്പള്ളിയിൽ വിശുദ്ധ കുർബാനയും മെറിന്‍റെ അനുസ്മരണ ശുശ്രുഷകളും നടത്തി.
- Details
തൃശൂര്‍: അഷ്ടവൈദ്യ പാരമ്പര്യത്തിന്‍റെ തനിമ കൈവിടാതെ ആയുര്‍വേദത്തിന് ആധുനിക മുഖച്ഛായ നല്‍കിയ വൈദ്യരത്നം ഇ.ടി. നാരായണന്‍ മൂസ് (87) അന്തരിച്ചു. ഒല്ലൂര്‍ തൈക്കാട്ടുശേരി മനയിലായിരുന്നു അന്ത്യം. കേരളത്തിന്‍റെ ആയുര്‍വേദ വൈദ്യചരിത്രത്തില്‍ ഇടം നേടിയ വൈദ്യരത്നം ആയുര്‍വേദ കോളജിന്‍റെയും ഗവേഷണ കേന്ദ്രത്തിന്‍റെയും സ്ഥാപകനാണ്. 2010ല്‍ രാജ്യം പത്മഭൂഷന്‍ നല്‍കി ആദരിച്ചു. വൈദ്യരത്നം സ്ഥാപനങ്ങളുടെ ചെയര്‍മാനും മാനേജിങ് ഡയറക്ടറുമാണ്. ആയുര്‍വേദ ഔഷധ നിര്‍മ്മാണത്തില്‍ യന്ത്രവത്കരണം സാധ്യമാക്കിയ ഇ.ടി. നാരായണന്‍ മൂസ് കഷായങ്ങളെ തളിക രൂപത്തിലേക്കു മാറ്റുന്നതില്‍ വിജയം കണ്ടു. പ്രമേഹത്തിന് ഉള്‍പ്പെടെ ഒട്ടേറെ പുതിയ മരുന്നുകള്‍ വികസിപ്പിച്ചെടുത്തു. തൃശൂര്‍ ഒല്ലൂരിനടുത്ത് തൈക്കാട്ട് നീലകണ്ഠന്‍ മൂസിന്‍റെയും ദേവകി അന്തര്‍ജനത്തിന്‍റെയും മകനായി 1933 സെപ്റ്റംബര്‍ 15ന് ചിങ്ങമാസത്തിലെ പൂയം നക്ഷത്രത്തിലായിരുന്നു നാരായണന്‍ മൂസിന്‍റെ ജനനം. സംസ്കൃതത്തിലും ആയുര്‍വേദ ചികിത്സയിലും ഹിന്ദി, ഇംഗ്ലീഷ് ഭാഷകളിലും പ്രാവീണ്യം നേടി. ഒല്ലൂർ തൈക്കാട്ടുശേരിയിലെ വൈദ്യരത്നം ഔഷധശാല തുടങ്ങുമ്പോൾ എട്ടു വയസായിരുന്നു നാരായണൻ മൂസിന്. 1954ൽ നാരായണൻ മൂസ് ഔഷധശാലയുടെ ചുമതല ഏറ്റെടുത്തു. വെള്ളാരപ്പിള്ളി മുരിയമംഗലത്ത് സതി അന്തർജനമാണു ഭാര്യ. മക്കൾ: ഇ.ടി. നീലകണ്ഠൻ മൂസ്, ഇ.ടി. പരമേശ്വരൻ മൂസ്, ഇ.ടി. ഷൈലജ.
Sponsored Advertisments
