News
- Details
കുമളി: മുല്ലപ്പെരിയാർ അണക്കെട്ടിലെ ജലനിരപ്പ് ജൂലൈ 7ന് രാവിലെ ഏഴോടെ 130 അടിയിലെത്തി. 24 മണിക്കൂറിനുള്ളിൽ ഉയർന്നത് ഏഴടി വെള്ളം. വ്യാഴാഴ്ച രാവിലെ 123.2 അടിയായിരുന്നു. ഈനില തുടർന്നാൽ ഇന്നു വൈകുന്നേരത്തോടെ ജലനിരപ്പ് 140 അടിയിലെത്തും. 139.5 അടിയാണ് സുപ്രീം കോടതി അനുവദിച്ചിരിക്കുന്ന ജലസംഭരണ പരിധി. ബുധനാഴ്ച സെക്കൻഡിൽ 17746.23 ഘനയടി വെള്ളം അണക്കെട്ടിലേക്ക് ഒഴുകിയെത്തി. വ്യാഴാഴ്ച ഇത് 6955.83 ഘനയടിയായിരുന്നു. സെക്കൻഡിൽ 1650 ഘനയടി വെള്ളം തമിഴ്നാട്ടിലേക്കൊഴുക്കുന്നുണ്ട്. വൃഷ്ടി പ്രദേശത്ത് അതിശക്തമായ മഴയാണ്. ഇന്നലെ അണക്കെട്ട് പ്രദേശത്ത് 198.4 മില്ലീമീറ്ററും തേക്കടിയിൽ 157.2 മില്ലീമീറ്ററും മഴ പെയ്തു.
- Details
വൈക്കം: വൈക്കം മുൻ എംഎൽഎയും സിപിഐ നേതാവുമായ പി. നാരായണൻ (68) അന്തരിച്ചു. ഏതാനും മാസങ്ങളായി രോഗബാധിതനായി ചികിത്സയിലായിരുന്ന അദ്ദേഹം ജൂലൈ 6നു പുലർച്ചെയാണു മരിച്ചത്. വൈകുന്നേരം അഞ്ചിനു വൈക്കം നഗരസഭാ പൊതുശ്മശാനത്തിൽ കോവിഡ് മാനദണ്ഡങ്ങൾ പാലിച്ച് ഔദ്യോഗിക ബഹുമതികളോടെ സംസ്കരിച്ചു. 1998ൽ വൈക്കം എംഎൽഎ ആയിരുന്ന എം.കെ. കേശവൻ മരിച്ചതിനെത്തുടർന്നു നടന്ന ഉപതെരഞ്ഞെടുപ്പിലാണു പി. നാരായണൻ എംഎൽഎയായത്. 2000ൽ നടന്ന പൊതുതെരഞ്ഞെടുപ്പിലും വിജയിച്ചു. ഇപ്പോഴത്തെ നിയമസഭാ മന്ദിരത്തിന്‍റെ നിർമാണ വേളയിൽ ഒരു തൊഴിലാളിയായി പണിയെടുത്ത പി. നാരായണൻ പിന്നീട് ആ ജനപ്രതിനിധി സഭയിലെ സാമാജികനായി എത്തിയെന്ന അപൂർവതയുമുണ്ട്. വൈക്കത്തെ വിവിധ വികസന പ്രവർത്തനങ്ങളിലൂടെ പൊതുധാരയിലേക്ക് എത്തിച്ചതിലൂടെ അദ്ദേഹം ജനകീയ എംഎൽഎയായി. തിരുവതാംകൂർ ദേവസ്വം ബോർഡ് അംഗവുമായിരുന്നു. സിപിഐ വൈക്കം ടൗണ്‍ ലോക്കൽ സെക്രട്ടറിയായി ദീർഘകാലം പ്രവർത്തിച്ച പി. നാരായണൻ വൈക്കം നഗരസഭാ വൈസ്ചെയർമാനുമായിരുന്നു. ഭാര്യ: രാധ. മക്കൾ: അനിൽകുമാർ, അനീഷ്, അമ്പിളി. മരുമക്കൾ: കവിത, ടിനു, ബാബുരാജ്.
Sponsored Advertisments
