News
- Details
ന്യൂഡല്‍ഹി: മതത്തിന്‍റെ പേരില്‍ രാജ്യത്തെ രണ്ടായി വിഭജിക്കുന്നുവെന്നും മുസ്ലിം സമുദായത്തെ ലക്ഷ്യം വയ്ക്കുന്നുവെന്നുമുള്ള രൂക്ഷവിമര്‍ശനത്തിനിടെ പൗരത്വ നിയമ ഭേദഗതി ബില്‍ ലോക്സഭ പാസാക്കി. 80-നെതിരെ 311 വോട്ടിനാണ് ബില്‍ പാസായത്. 391 പേര്‍ വോട്ടെടുപ്പില്‍ പങ്കെടുത്തു. ബില്ലില്‍ പ്രതിപക്ഷം കൊണ്ടുവന്ന ഭേദഗതികളെല്ലാം സഭ തള്ളി. നിയമത്തിനു മുന്നില്‍ എല്ലാവരും സമന്മാരാണെന്ന ഭരണഘടനയുടെ 14-ാം വകുപ്പിന്‍റെ ലംഘനമാണെന്നു ചൂണ്ടിക്കാട്ടി സഭയില്‍ പ്രതിപക്ഷം ഉയര്‍ത്തിയ വലിയ പ്രതിഷേധത്തിനിടെയാണ് കേന്ദ്ര ആഭ്യന്തരമന്ത്രി അമിത്ഷാ ബില്‍ അവതരിപ്പിച്ചത്. ചര്‍ച്ചയില്‍ പങ്കെടുത്തു സംസാരിച്ച അസറുദ്ദീന്‍ ഉവൈസി സഭയ്ക്കുള്ളില്‍ ബില്‍ വലിച്ചുകീറി. ഭരണഘടനയുടെ അടിസ്ഥാന മൂല്യങ്ങളെ നിഷേധിക്കുന്നതിനൊപ്പം ഭരണഘടനയുടെ ആമുഖത്തെതന്നെ ലംഘിക്കുന്നതാണ് ബില്‍ എന്നും ഭരണഘടനയുട അടിസ്ഥാന തത്വമായ മതേതരത്വത്തെ ഈ നിയമം ഇല്ലാതാക്കുമെന്നും പ്രതിപക്ഷം ചൂണ്ടിക്കാട്ടി. പൗരത്വ നിയമം ഭേദഗതി ചെയ്യുന്നതോടെ 2014 ഡിസംബര്‍ 31-നോ അതിനു മുമ്പോ ഇന്ത്യയിലെത്തിയ പാക്കിസ്ഥാന്‍, ബംഗ്ലാദേശ്, അഫ്ഗാനിസ്ഥാന്‍ എന്നിവിടങ്ങളില്‍ നിന്നുള്ള ഹിന്ദു, ക്രൈസ്തവ, സിക്ക്, പാഴ്സി, ജൈന, ബുദ്ധ വിഭാഗങ്ങളില്‍പ്പെട്ട അഭയാര്‍ത്ഥികള്‍ക്കാണ് ഇന്ത്യന്‍ പൗരത്വം ലഭിക്കാന്‍ അര്‍ഹത. ഇവരെ 1920-ലെ ഇന്ത്യയിലേക്കുള്ള പാസ്പോര്‍ട്ട് എന്‍ട്രി നിയമത്തിന്‍റെ സി വ്യവസ്ഥയുടെ രണ്ടും മൂന്നും ഉപവ്യവസ്ഥയില്‍ നിന്നും 1946-ലെ വിദേശി നിയമത്തിലെ വ്യവസ്ഥകളില്‍ നിന്നും ഒഴിവാക്കി അനധികൃത കുടിയേറ്റക്കാര്‍ അല്ലാതാക്കി മാറ്റും. അഭയാര്‍ത്ഥി പ്രവേശന സമയപരിധി 2014 ഡിസംബര്‍ 31 എന്ന് വ്യക്തമായി ബില്ലില്‍ വ്യവസ്ഥ ചെയ്തിട്ടുണ്ട്. ഇതിനായി 1955 മുതലുള്ള പൗരത്വ നിയമത്തിന്‍റെ 2(1) ബി വകുപ്പില്‍ പുതിയ വ്യവസ്ഥ എഴുതിച്ചേര്‍ത്തിട്ടുണ്ട്. ഭരണഘടനയുടെ ആറാം അനുബന്ധത്തിന്‍റെ സംരക്ഷണമുള്ള വടക്കു കിഴക്കന്‍ സംസ്ഥാനങ്ങളിലെ ആദിവാസി മേഖലകള്‍ക്കു ബില്ലിലെ വ്യവസ്ഥകള്‍ ബാധകമല്ല.
- Details
ന്യൂഡല്‍ഹി: ഭാര്യയെ പീഡിപ്പിക്കുകയോ ഉപേക്ഷിച്ചു പോവുകയോ ചെയ്യുന്ന പ്രവാസി ഇന്ത്യക്കാരുടെ പാസ്പോര്‍ട്ട് റദ്ദാക്കുകയോ കണ്ടുകെട്ടുകയോ ചെയ്യാനുള്ള ശിപാര്‍ശ വിദേശകാര്യ മന്ത്രാലയത്തിന്‍റെ പരിഗണനയില്‍. എന്‍ആര്‍ഐ ഭര്‍ത്താക്കന്മാര്‍ തഴയുന്ന സ്ത്രീകളുടെ പരാതികളെക്കുറിച്ച് പഠിക്കാന്‍ റിട്ട. ജസ്റ്റിസ് അരവിന്ദ് കുമാര്‍ ഗോയലിന്‍റെ നേതൃ‍ത്തില്‍ നിയോഗിച്ച സമിതിയാണ് ഇതു സംബന്ധിച്ച ശിപാര്‍ശ നല്‍കിയത്.
ഗാര്‍ഹികപീ‍‍ഡനം കുറ്റവാളി കൈമാറ്റ കരാറിന്‍റെ പരിധിയില്‍ കൊണ്ടുവരണമെന്ന ശിപാര്‍ശയും സമിതി മുന്നോട്ടു വെച്ചിട്ടുണ്ട്. ഭാര്യമാരെ പീഡിപ്പിക്കുകയോ ഉപദ്രവിച്ചു പോവുകയോ ചെയ്യുന്ന ഭര്‍ത്താക്കന്മാരെ വിദേശത്തുനിന്ന് പിടികൂടി നിയമനടപടികള്‍ക്ക് വിധേയമാക്കാന്‍ നിലവില്‍ നിരവധി പരിമിതികളുണ്ടെന്ന് ബന്ധപ്പെട്ട ഉദ്യോഗസ്ഥര്‍ ചൂണ്ടിക്കാട്ടി. ഈ സാഹചര്യത്തില്‍ വിദേശകാര്യ മന്ത്രാലയവും വനിത, ശിശുവികസന മന്ത്രാലയവും ചേര്‍ന്നാണ് നിയമഭേദഗതിക്ക് ഒരുങ്ങുന്നത്. പാസ്പോര്‍ട്ട് റദ്ദാക്കുന്നതിനൊപ്പം പ്രവാസി വിവാഹ രജിസ്ട്രേഷന്‍ നിര്‍ബന്ധമാക്കാനും ശിപാര്‍ശയുണ്ട്. ഉപേക്ഷിക്കപ്പെട്ട ഭാര്യമാര്‍ക്ക് നിയമനടപടിക്ക് നല്‍കുന്ന സാമ്പത്തിക സഹായം ഇരട്ടിപ്പിച്ച് 6000 ഡോളറായി ഉയര്‍ത്തണമെന്നതാണ് മറ്റൊരു ശിപാര്‍ശ.
Sponsored Advertisments
