News
- Details
കൊടുവള്ളി എംഎല്‍എ കാരാട്ട് റസാഖിന്‍റെ തെരഞ്ഞെടുപ്പ് ഹൈക്കോടതി റദ്ദാക്കി
കൊച്ചി: ഇടതു സ്വതന്ത്രനായി മത്സരിച്ചു ജയിച്ച കൊടുവള്ളി എംഎല്‍എ കാരാട്ട് റസാഖിന്‍റെ തെരഞ്ഞെടുപ്പ് ഹൈക്കോടതി റദ്ദാക്കി. വിധിക്കെതിരെ സുപ്രീംകോടതിയില്‍ അപ്പീല്‍ നല്‍കാന്‍ മുപ്പതു ദിവസത്തെ സ്റ്റേയും കോടതി അനുവദിച്ചു. കാരാട്ട് റസാഖിന് ഇക്കാലയളവില്‍ നിയമസഭാ സമ്മേളനങ്ങളില്‍ പങ്കെടുക്കാമെങ്കിലും വോട്ടിംഗില്‍ പങ്കെടുക്കുന്നതും ആനുകൂല്യങ്ങള്‍ വാങ്ങുന്നതും ഹൈക്കോടതി വിലക്കി. ഉത്തരവിന്‍റെ വിശദാംശങ്ങള്‍ നിയമസഭാ സ്പീക്കര്‍ക്കും തെരഞ്ഞെടുപ്പ് കമ്മീഷനും നല്‍കാന്‍ കോടതി നിര്‍ദ്ദേശിച്ചു. എതിര്‍സ്ഥാനാര്‍ത്ഥി മുസ്ലിംലീഗിലെ എം.എ. റസാഖിനെ വിജയിയായി പ്രഖ്യാപിക്കണമെന്ന ഹര്‍ജിക്കാരുടെ ആവശ്യം കോടതി അനുവദിച്ചില്ല. 2015-ലെ തെരഞ്ഞെടുപ്പില്‍ കാരാട്ട് റസാഖ് 573 വോട്ടിനാണ് വിജയിച്ചത്. എതിര്‍ സ്ഥാനാര്‍ത്ഥി എം.എ. റസാഖിനെ അപകീര്‍ത്തിപ്പെടുത്തുന്ന ഡോക്യുമെന്‍ററി തെരഞ്ഞെടുപ്പു പ്രചാരണ വേളയില്‍ മണ്ഡലത്തിലുടനീളം പ്രദര്‍ശിപ്പിച്ചെന്നു ചൂണ്ടിക്കാട്ടി വോട്ടര്‍മാരായ കെ.പി. മുഹമ്മദ്, മൊയ്തീന്‍ കുഞ്ഞി എന്നിവര്‍ നല്‍കിയ ഹര്‍ജിയിലാണ് ജസ്റ്റിസ് ഏബ്രഹാം മാത്യുവിന്‍റെ വിധി. വിധി പറഞ്ഞശേഷം ഹൈക്കോടതി ജഡ്ജിയുടെ പദവിയില്‍നിന്ന് അദ്ദേഹം വിരമിക്കുകയും ചെയ്തു.
- Details
കൊല്ലം ബൈപ്പാസ് നാടിന് സമര്‍പ്പിച്ചു
കൊല്ലം: കേരളത്തിന്‍റെ അടിസ്ഥാന സൗകര്യ വികസനത്തിന് ആവുന്നതെല്ലാം കേന്ദ്രസര്‍ക്കാര്‍ ചെയ്യുമെന്ന് പ്രധാനമന്ത്രി നരേന്ദ്ര മോഡി. പ്രളയത്തിനു ശേഷം ദുഷ്കരമായ നാളുകളിലൂടെ കടന്നുപോയ കേരളം കൂട്ടായ കഠിനാധ്വാനത്തിലൂടെയാണ് ദുരന്തത്തെ അതിജീവിച്ചതെന്നും അദ്ദേഹം പറഞ്ഞു. കൊല്ലം ബൈപ്പാസ് നാടിനു സമര്‍പ്പിച്ചശേഷം സംസാരിക്കുകയായിരുന്നു പ്രധാനമന്ത്രി. മുംബൈ - കന്യാകുമാരി ഇടനാഴി ഉടന്‍ യാഥാര്‍ഥ്യമാക്കും. ചില പദ്ധതികള്‍ വര്‍ഷങ്ങളായി മുടങ്ങിക്കിടക്കുന്നത് ജനങ്ങളോടു ചെയ്യുന്ന ക്രൂരതയാണെന്നും അദ്ദേഹം പറഞ്ഞു. 2015-ലാണ് കൊല്ലം ബൈപ്പാസിന്‍റെ നിര്‍മ്മാണം പൂര്‍ത്തിയാക്കാന്‍ കേന്ദ്രം ഇടപെട്ടത്. സംസ്ഥാന സര്‍ക്കാരുമായി ചേര്‍ന്ന് സമയബന്ധിതമായി പദ്ധതി പൂര്‍ത്തീകരിക്കാനായി. നാലരപ്പതിറ്റാണ്ടിലേറെയുള്ള കാത്തിരിപ്പിനാണ് വിരാമമായിരിക്കുന്നത്- പ്രധാനമന്ത്രി കൂട്ടിച്ചേര്‍ത്തു.
Sponsored Advertisments
