ഉമ്മൻ കാപ്പിൽ
സ്റ്റാറ്റൻ ഐലൻഡ്, (ന്യൂയോർക്ക്): മലങ്കര ഓർത്തഡോക്സ് സുറിയാനി സഭയുടെ നോർത്ത് ഈസ്റ്റ് അമേരിക്കൻ ഭദ്രാസന ഫാമിലി & യൂത്ത് കോൺഫറൻസിന്റെ കിക്കോഫ് മീറ്റിംഗിന് സെൻറ് മേരീസ് ഓർത്തഡോക്സ് ഇടവക വേദിയായി.
2023 ഫെബ്രുവരി 12 ഞായറാഴ്ച, ഫാമിലി & യൂത്ത് കോൺഫറൻസ് ടീം, സെൻറ്. മേരീസ് ഓർത്തഡോക്സ് ഇടവക സന്ദർശിച്ചു. വിശുദ്ധ കുർബാനയ്ക്കുശേഷം ഫാമിലി ആൻഡ് യൂത്ത് കോൺഫറൻസിന് ഹ്രസ്വമായ കിക്ക് ഓഫ് മീറ്റിങ് ഉണ്ടായിരുന്നു.
ഫാ. ടി.എ. തോമസ് (വികാരി), ഫാ. ബോബി വർഗീസ് (അസിസ്റ്റന്റ് വികാരി) എന്നിവർ കോൺഫറൻസ് ടീമിനെ ഇടവകാംഗങ്ങൾക്ക് പരിചയപ്പെടുത്തി.
ബിനു കൊപ്പാറ (സഭാ മാനേജിംഗ് കമ്മിറ്റി അംഗം), മാത്യു ജോഷ്വ (ഫാമിലി & യൂത്ത് കോൺഫറൻസ് ട്രഷറർ), ഷെറിൻ കുര്യൻ, ജോനാഥൻ മത്തായി, ഹാനാ ജേക്കബ് (കോൺഫറൻസ് കമ്മിറ്റി അംഗങ്ങൾ) തുടങ്ങിയവർ പ്രതിനിധി സംഘത്തിൽ സന്നിഹിതരായിരുന്നു. 2023 ജൂലൈ 12 മുതൽ 15 വരെ നോർത്ത് ഈസ്റ്റ് അമേരിക്കൻ ഭദ്രാസനത്തിലെ ഹോളി ട്രാൻസ്ഫിഗറേഷൻ റിട്രീറ്റ് സെന്ററിൽ (HTRC) കോൺഫറൻസ് നടക്കും.

HTRC-യുടെ ഗുണപരമായ സ്വാധീനത്തെക്കുറിച്ചും സഭയുടെ പ്രയോജനത്തിനായി ഈ സൗകര്യം പരമാവധി ഉപയോഗിക്കേണ്ടതിന്റെ പ്രാധാന്യത്തെക്കുറിച്ചും ഫാ. ബോബി വർഗീസ് സംസാരിച്ചു. യുവജനങ്ങളെ നമ്മുടെ സഭയുടെ നേതാക്കളാക്കേണ്ടതിന്റെ പ്രാധാന്യത്തെക്കുറിച്ചും HTRC ഇക്കാര്യത്തിൽ നിർണായക പങ്ക് വഹിക്കുന്നതിനെപ്പറ്റിയും ബിനു കൊപ്പാറ വിശദീകരിച്ചു. ജോനാഥൻ മത്തായി സുവനീറിനെക്കുറിച്ചുള്ള വിവരങ്ങൾ നൽകി. ഹാനാ ജേക്കബ് രജിസ്ട്രേഷൻ വിശദാംശങ്ങൾ പങ്കുവച്ചു. HTRC-യിലെ തന്റെ വ്യക്തിപരമായ അനുഭവത്തെക്കുറിച്ച് ഷെറിൻ കുര്യൻ സംസാരിച്ചു. സ്പോൺസർഷിപ്പുകളെ കുറിച്ചും സുവനീറിൽ ലേഖനങ്ങൾ, പരസ്യങ്ങൾ, അഭിനന്ദനങ്ങൾ എന്നിവ ചേർക്കാനുള്ള അവസരത്തെ കുറിച്ചും മാത്യു ജോഷ്വ വിശദീകരിച്ചു.
ഫാമിലി & യൂത്ത് കോൺഫറൻസിൽ യൂറോപ്പ്/ആഫ്രിക്ക ഭദ്രാസനാധിപൻ അഭിവന്ദ്യ ഡോ. എബ്രഹാം മാർ സ്തേഫാനോസ് മെത്രാപ്പോലീത്ത മുഖ്യ പ്രഭാഷകനായിരിക്കും. സൗത്ത് വെസ്റ്റ് അമേരിക്കൻ ഭദ്രാസന യൂത്ത് മിനിസ്റ്റർ ഫാ. മാറ്റ് അലക്സാണ്ടർ യുവജനങ്ങൾക്കായുള്ള സെഷനുകൾ നയിക്കും. യോവേൽ 2:28-ൽ നിന്നുള്ള “എല്ലാ ജഡത്തിന്മേലും ഞാൻ എന്റെ ആത്മാവിനെ പകരും” എന്നതാണ് ഈ വർഷത്തെ കോൺഫറൻസിന്റെ മുഖ്യ ചിന്താവിഷയം. ബൈബിൾ, വിശ്വാസം, പ്രചോദനാത്മകമായ വിഷയങ്ങൾ എന്നിവയെ അടിസ്ഥാനമാക്കി കുട്ടികൾക്കും യുവജനങ്ങൾക്കും മുതിർന്നവർക്കും അനുയോജ്യമായ പ്രത്യേക സംവേദനാത്മക സെഷനുകൾ ഉണ്ടായിരിക്കും.
ഇടവകയെ പ്രതിനിധീകരിച്ച് ജോയ് മാത്യു (ഇടവക ട്രഷറർ) സുവനീറിനുള്ള സംഭാവന കൈമാറി. ക്യാപ്റ്റൻ രാജു ഫിലിപ്പ് (ഭദ്രാസന അസംബ്ലി അംഗം) കോൺഫറൻസ് രജിസ്‌ട്രേഷൻ ഫോറം നൽകി. സുനിൽ ടി സാം (മലങ്കര അസോസിയേഷൻ പ്രതിനിധി), ജിനു തോമസ് തുടങ്ങിയവർ പരസ്യങ്ങൾ വാഗ്ദാനം ചെയ്തു.
ഇവരെക്കൂടാതെ നിരവധി അംഗങ്ങൾ കോൺഫറൻസിനായി രജിസ്റ്റർ ചെയ്തും, സുവനീറിൽ ആശംസകൾ നൽകിയും അഭിനന്ദനീയമായ പിന്തുണ നൽകി.
ഭദ്രാസനത്തിനും ഫാമിലി കോൺഫറൻസിനും ഇടവകയിലെ വൈദികരും ജനങ്ങളും പൂർണ്ണഹൃദയത്തോടെ നൽകുന്ന മാതൃകാപരമായ പിന്തുണയ്ക്ക് സംഘാടകർ നന്ദി അറിയിച്ചു.

കൂടുതൽ വിവരങ്ങൾക്ക്, ഫാ. സണ്ണി ജോസഫ്, കോൺഫറൻസ് ഡയറക്ടർ (ഫോൺ: 718.608.5583) ചെറിയാൻ പെരുമാൾ, കോൺഫറൻസ് സെക്രട്ടറി (ഫോൺ: 516.439.9087) എന്നിവരുമായി ബന്ധപ്പെടുക.