അനിൽ പെണ്ണുക്കര

ഇത്തവണത്തെ കേരളാ സന്ദർശനത്തിൽ വിലമതിക്കാനാവാത്ത ഒരു സമ്മാനം മിസോറി സിറ്റി മേയർ റോബിൻ ഇലക്കാട്ടിനു ലഭിക്കുകയുണ്ടായി .തിരുവിതാംകൂർ കൊട്ടാരം സന്ദർശന വേളയിൽ അശ്വതി തിരുനാൾ ഗൗരി ലക്ഷ്മി ഭായ് രചിച്ച ഗ്രന്ഥം.”ഹിസ്റ്ററി ലിബറേറ്റഡ്”.തിരുവിതാംകൂർ രാജാവംശത്തിന്റെ ചരിത്രം ഉറങ്ങുന്ന പുസ്തകമാണ് ‘ഹിസ്റ്ററി ലിബറേറ്റഡ്’ .ജീവിതത്തിൽ ലഭിച്ച വിലമതിക്കാനാവാത്ത സമ്മാനമാണ് ഈ പുസ്തകമെന്നു റോബിൻ ഇലക്കാട്ട് പറഞ്ഞു .”തിരുവിതാംകൂർ രാജവാഴ്ചയുടെ അവസാന ഘട്ടത്തിൽ നടന്ന സംഭവങ്ങളും, രാജ നീതിയുടെ സത്യങ്ങളും ഉൾക്കൊള്ളുന്നതാണ് ഈ പുസ്തകം. പ്രധാനമായും രണ്ട് വ്യക്തിത്വങ്ങളെ കേന്ദ്രീകരിച്ചാണ് ഈ പുസ്തകം എഴുതപ്പെട്ടിട്ടുള്ളത്. മഹാരാജ ശ്രീചിത്തിര തിരുനാൾ രാമവർമ്മയെയും അദ്ദേഹത്തിന്റെ അമ്മ മഹാറാണി സേതു പാർവതി ഭായിയെയുമാണ് ഈ പുസ്തകം വരച്ചു കാട്ടുന്നത്. കേരള സംസ്ഥാനത്തിന്റെ അവസാന ഭരണാധികാരിയായിരുന്ന ശ്രീ ചിത്തിര തിരുനാൾ രാമവർമ്മ മഹാരാജാവിന്റെ മരുമകളായ അശ്വതി തിരുനാൾ ഗൗരി ലക്ഷ്മിഭായി എഴുതിയ പുസ്തകമായതുകൊണ്ട് തന്നെ ഒരു രാജ കുടുംബാഗം എഴുതിയ ഗ്രന്ഥം എന്നും ഇതിന് സവിശേഷതകളുണ്ട്.”അദ്ദേഹം പറഞ്ഞു

ഇന്ത്യയിലെ അറിയപ്പെടുന്ന എഴുത്തുകാരിയാണ് അശ്വതി തിരുനാൾ ഗൗരി ലക്ഷ്മി ഭായി . 150-ലധികം കവിതകളും ഇംഗ്ലീഷിലും മലയാളത്തിലും നിരവധി ലേഖനങ്ങളും 12 പുസ്തകങ്ങളും അവർ രചിച്ചിട്ടുണ്ട്. ഹിസ്റ്ററി ലിബറേറ്റഡ് എന്ന ഈ പുസ്തകത്തിലെ പ്രധാന വ്യക്തികൾ എഴുത്തുകാരിയുടെ അമ്മാവനും മുത്തശ്ശിയുമാണ്. ശ്രീപത്മനാഭ ദാസ മഹാരാജാവ് ശ്രീ ചിത്തിര തിരുനാൾ രാമവർമ്മയും അദ്ദേഹത്തിന്റെ അമ്മ മഹാറാണി സേതു പാർവതി ഭായിയുമാണ് അവർ. എന്നിരുന്നാലും, ഈ കഥ അവരെക്കുറിച്ചോ രാജകുടുംബത്തെക്കുറിച്ചോ മാത്രമല്ല. ഭരണാധികാരികൾ എന്ന നിലയിൽ, അവർ തങ്ങളുടെ രാജ്യത്തിലെ ദശലക്ഷക്കണക്കിന് ആളുകളെ സ്വന്തം കുടുംബമായി എങ്ങനെ വീക്ഷിച്ചുവെന്നും ജനങ്ങൾ അവരോട് ആദരവും ഭക്തിയും പുലർത്തിയിരുന്നു എന്നുമാണ് ഈ പുസ്തകത്തിൽ അടയാളപ്പെടുത്തിയിരിക്കുന്നത്.

ഈ കൃതി തിരുവിതാംകൂറിന്റെ സുപ്രധാന ചരിത്രത്തിന്റെയും നിർണ്ണായക കാലഘട്ടത്തെയും ചൂണ്ടിക്കാണിക്കുന്നു. സ്വാതന്ത്ര്യാനന്തരം ഇന്ത്യയിൽ ഉടനീളം വീശിയടിച്ച ചുഴലിക്കാട്ടിനേയും അതിൽ പ്രതി സംഭവിച്ച മാറ്റങ്ങളേയും ഈ പുസ്തകം വ്യക്തമാക്കുന്നു. ദി ഡോൺ, തുളസി ഗാർലൻഡ്, ദി മൈറ്റി ഇന്ത്യൻ എക്സ്പീരിയൻസ്, കേരള കൾച്ചറിന്റെ കാഴ്ചകൾ, രുദ്രാക്ഷമാല, ആൻ അമേച്വർസ് അറ്റംപ്റ്റ് അറ്റ് പോയട്രി എന്നിവ ലക്ഷമി ഭായിയുടെ പ്രധാന കൃതികളിൽ ചിലതാണ്. 39 പുരസ്കാരങ്ങൾ ഇതിനോടകം തന്നെ റാണി ലക്ഷ്മി ഭായി നേടിയിട്ടുണ്ട്. ‘ശ്രീ പത്മനാഭ സ്വാമി ക്ഷേത്ര ഗരുഡ കലാ സാംസ്കാരിക സമിതി അവാർഡ്’, ‘ശ്രീ ശാരദാ എജ്യുക്കേഷൻ സൊസൈറ്റി മെറിറ്റ് അവാർഡ്’, ‘വിജയദേശമി പുരസ്കാരം’, ‘നാഷണൽ എമിനൻസ് അവാർഡ്’ (മുംബൈ), ‘കലാ പോഷക അവാർഡ്’ (മൈസൂർ ലളിത കലാ അക്കാദമി), ‘ എന്നിവ ഇതിൽ ഉൾപ്പെടുന്നു. ഗവേഷണ രചനയ്ക്കുള്ള മലബാർ 2010 അവാർഡ്’, ‘സിന്ധു സാഹിത്യ അവാർഡ്’ (യുഎസ്എ), ‘മല്ലിയൂർ ശ്രീമദ് ഭാഗവത പുരസ്‌കാരം’, ‘ബാബ സാഹിബ് ദേശീയ അവാർഡ് 2016’ (ഡൽഹി), ഇന്റർഫെയ്ത്ത് ലീഡർഷിപ്പ് അവാർഡ് 2019 (വേൾഡ് യോഗ കമ്മ്യൂണിറ്റി ഇൻക്., സ്ഥാപിച്ചത്, ന്യൂയോർക്ക്, യുഎസ്എ), എന്നിവയും അവരെ തേടി എത്തിയിട്ടുണ്ട്.