ഇന്ത്യന്‍ ഓവര്‍സീസ് കോണ്‍ഗ്രസ് ചിക്കാഗോയുടെ ആഭിമുഖ്യത്തില്‍ ഗാന്ധിജയന്തി ആഘോഷം നടത്തപ്പെട്ടു. പ്രസിഡണ്ട് സന്തോഷ് നായരുടെ അദ്ധ്യക്ഷതയില്‍ കൂടിയ പരിപാടിയില്‍ ചാണ്ടി ഉമ്മന്‍ എംഎല്‍എയും കെപിസിസി ജനറല്‍ സെക്രട്ടറി ഷാജി കറ്റാനവും മുഖ്യാതിഥികളായിരുന്നു
ചിക്കാഗോ: ഇന്ത്യന്‍ ഓവര്‍സീസ് കോണ്‍ഗ്രസ് ചിക്കാഗോയുടെ ആഭിമുഖ്യത്തില്‍ ഗാന്ധിജയന്തി ആഘോഷം നടത്തപ്പെട്ടു.
പ്രസിഡണ്ട് സന്തോഷ് നായരുടെ അദ്ധ്യക്ഷതയില്‍ കൂടിയ പരിപാടിയില്‍ ചാണ്ടി ഉമ്മന്‍ എംഎല്‍എയും കെപിസിസി ജനറല്‍ സെക്രട്ടറി ഷാജി കറ്റാനവും മുഖ്യാതിഥികളായിരുന്നു. കൂടാതെ ഐഒസി യുഎസ്എ കേരളാ ഘടകം ചെയര്‍മാന്‍ തോമസ് മാത്യു, പ്രസിഡണ്ട് സതീശന്‍ നായര്‍ എന്നിവരും സന്നിഹിതരായിരുന്നു.
അഹിംസയുടെ പാതയിലൂടെ ആര്‍ക്കും തകര്‍ക്കുവാനാകാത്ത സ്വാതന്ത്ര്യമാണ് ഗാന്ധിജി ഇന്ത്യക്ക് നേടിത്തന്നതെന്ന് ചാണ്ടി ഉമ്മന്‍ എംഎല്‍എ പറഞ്ഞു. ഗാന്ധിജയന്തി ആഘോഷം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
മനുഷ്യനായി ജീവിച്ചിട്ടു കാര്യമില്ല, മനുഷ്യത്വം ഉണ്ടെങ്കില്‍ മാത്രമേ ഒരാള്‍ക്ക് യഥാര്‍ത്ഥ മനുഷ്യസ്നേഹിയാകുവാന്‍ സാധിക്കുകയുള്ളുവെന്ന് ഗാന്ധിജിയുടെ വാക്കുകള്‍ നാം ഏവരും നമ്മുടെ ജീവിതശൈലിയില്‍ ഉള്‍ക്കൊള്ളണമെന്ന് കറ്റാനം ഷാജി പറഞ്ഞു.
ഗാന്ധിജിയുടെ അടിസ്ഥാനപ്രമാണം ദൈവമാണ് സത്യം, സത്യമാണ് ദൈവം എന്ന ആശയമായിരുന്നുവെന്ന് ചിക്കാഗോ സെ. മേരീസ് ക്നാനായ ഇടവക അസി. വികാരി ഫാ. ജിബിന്‍ കുഴിവേലില്‍ പറഞ്ഞു.
തോമസ് മാത്യു ഏവരേയും സ്വാഗതം ചെയ്യുകയും ഗാന്ധിജിയുടെ സന്ദേശങ്ങള്‍ ദൈനംദിന ജീവിതത്തില്‍ പ്രാവര്‍ത്തികമാക്കുവാന്‍ ഏവരും ശ്രമിക്കണമെന്നും പറഞ്ഞു.
ലോകമെമ്പാടും ആദരിക്കപ്പെടുന്ന ഒരു വ്യക്തിത്വമാണ് ഗാന്ധിജി. അദ്ദേഹത്തിന്‍റെ മഹത്വം ലോകജനതയുള്ളടത്തോളം കാലം നിലനില്ക്കുമെന്നും സന്തോഷ് നായര്‍ തന്‍റെ അദ്ധ്യക്ഷപ്രസംഗത്തില്‍ പ്രത്യേകം പറഞ്ഞു.
ഇന്ത്യന്‍ സ്വാതന്ത്ര്യസമരത്തിന്‍റെ നേതാവും അഹിംസയുടെയും തത്വശാസ്ത്രത്തിന്‍റെയും തുടക്കക്കാരനുമായ ഗാന്ധിജിയുടെ ജന്മദിനമായ ഒക്ടോബര്‍ രണ്ട് അന്താരാഷ്ട്ര അഹിംസാ ദിനമായി ആചരിക്കുന്ന ഈ അവസരത്തില്‍ നാം ഏവരും ആ മഹാത്മാവിനെ വന്ദിക്കുവാന്‍ മറക്കരുതെന്ന് സതീശന്‍ നായര്‍ അദ്ദേഹത്തിന്‍റെ പ്രസംഗത്തില്‍ ഏവരേയും ഓര്‍മ്മപ്പെടുത്തി.
കൂടാതെ തദവസരത്തില്‍ ഫ്രാന്‍സിസ് കിഴക്കേക്കുറ്റ്, തെലങ്കാന ഐഒസി ലീഡര്‍ കൃഷ്ണ, പ്രവീണ്‍ തോമസ്, സണ്ണി വള്ളിക്കളം, ബിജു കിഴക്കേകുറ്റ്, ലൂയി ചിക്കാഗോ, സുനീന ചാക്കോ, ലീല ജോസഫ്, ജിതേഷ് ചുങ്കത്ത്, എബിന്‍ കുര്യാക്കോസ് തുടങ്ങിയവര്‍ സംസാരിച്ചു. എബി റാന്നി ഏവര്‍ക്കും നന്ദി രേഖപ്പെടുത്തി.
