ഷിക്കാഗോ: സീറോ മലബാര്‍ സഭയുടെ ഉന്നത വിദ്യാഭ്യാസ കമ്മീഷന്റെ പുതിയ സെക്രട്ടറിയായി റവ.ഡോ. റെജി പി. കുര്യന്‍ പ്ലാത്തോട്ടത്തിനെ നിയമിച്ചു.
ചങ്ങനാശേരി അതിരൂപതാംഗമായ റവ.ഡോ. റെജി പ്ലാത്തോട്ടം ചങ്ങനാശേരി സെന്റ് ബെര്‍ക്കുമാന്‍സ് കോളജിന്റെ പ്രിന്‍സിപ്പലായും സേവനം അനുഷ്ഠിച്ചുകൊണ്ടിരിക്കുകയാണ്.
കഴിഞ്ഞ അദ്ധ്യയന വര്‍ഷം നാലു വര്‍ഷത്തെ ഡിഗ്രി കോഴ്‌സ് തുടങ്ങുന്നതിന് റവ.ഡോ. റെജി പ്ലാത്തോട്ടം നേതൃത്വം നല്‍കി. ഈ നിയമനത്തോടുകൂടി ഉന്നത വിദ്യാഭ്യാസ മേഖലയിലെ തന്റെ കാര്യക്ഷമമായ പ്രവര്‍ത്തനങ്ങളുടെ തലപ്പാവില്‍ ഒരു പൊന്‍തൂവല്‍കൂടി ചാര്‍ത്തിയിരിക്കുന്നു.
സീറോ മലബാര്‍ സഭയുടെ വിദ്യാഭ്യാസത്തിനുവേണ്ടിയുള്ള സിനഡല്‍ കമ്മിറ്റിയുടെ കണ്‍വീനര്‍ അഭിവന്ദ്യ മാര്‍ ജോസഫ് കല്ലറങ്ങാട്ട് പിതാവാണ് പെര്‍മനന്റ് സിനഡിന്റെ അംഗീകാരത്തോടെ ഈ നിയമനം നടത്തിയത്.
റവ.ഫാ. റെജി പ്ലാത്തോട്ടത്തിന് അമേരിക്കന്‍ ഐക്യനാടുകളിലെ എസ്.ബി അലുംമ്‌നികളുടെ സ്‌നേഹാദരവുകളും അഭിനന്ദനങ്ങളും ഇതോടൊപ്പം നേരുന്നു.
