ഫ്ളോറിഡ: വേള്‍ഡ് മലയാളി കൗണ്‍സില്‍ ദ്വിവത്സര സമ്മേളനത്തിന്‍റെ കിക്കോഫ്, ഫ്ളോറിഡാ പ്രോവിന്‍സിന്‍റെ ആഭിമുഖ്യത്തില്‍ മാര്‍ച്ച് എട്ടിന് വൈകുന്നേരം ആറു മണിക്ക് നടത്തപ്പെട്ടു.
സമ്മേളനത്തില്‍ അദ്ധ്യക്ഷത വഹിച്ച ഫ്ളോറിഡാ പ്രോവിന്‍സ് പ്രസിഡണ്ട് ബ്ലസന്‍ മണ്ണില്‍, തന്‍റെ ആമുഖ പ്രസംഗത്തില്‍ ജൂലൈ ഇരുപത്തിയഞ്ച് മുതല്‍ മൂന്നു ദിവസം ബാങ്കോക്കില്‍ അരങ്ങേറുന്ന വേള്‍ഡ് മലയാളി കൗണ്‍സിലിന്‍റെ പതിന്നാലാമത് ദ്വിവത്സര സമ്മേളനത്തെപ്പറ്റിയുള്ള ഒരു വിവരണം നല്കി. വേള്‍ഡ് മലയാളി കൗണ്‍സിലിനെ ഉന്നതങ്ങളിലെത്തിച്ച ഗ്ലോബല്‍ പ്രസിഡണ്ട് തോമസ് മൊട്ടയ്ക്കലും കോണ്‍ഫറന്‍സ് ചെയര്‍മാന്‍ ഡോ. ബാബു സ്റ്റീഫനും ഈ സമ്മേളനത്തെ ഒരു വന്‍ വിജയമാക്കി തീര്‍ക്കുന്നതിനു വേണ്ടിയുള്ള പ്രവര്‍ത്തനങ്ങള്‍ ആഗോളതലത്തില്‍ നടത്തിവരികയാണെന്ന് അദ്ദേഹം പ്രസ്താവിച്ചു.
പ്രത്യേക ക്ഷണിതാവായി എത്തിയ രാജു മൈലപ്ര വേള്‍ഡ് മലയാളി കൗണ്‍സിലിന്‍റെ ന്യൂജേഴ്സിയില്‍ നടന്ന പ്രഥമ സമ്മേളനത്തില്‍ പങ്കെടുത്തതിന്‍റെ അനുഭവങ്ങള്‍ പങ്കുവെച്ചു.
ദുബായില്‍ നിന്നെത്തിയ സാജൂ തുരുത്തേല്‍ വേള്‍ഡ് മലയാളി കൗണ്‍സിലിന്‍റെ മിഡില്‍ ഈസ്റ്റ് പ്രവര്‍ത്തനങ്ങളെപ്പറ്റി ഒരു ചെറിയ വിവരണം നല്കി.
അന്തര്‍ദ്ദേശീയ വനിതാ ദിനത്തോടനുബന്ധിച്ച് പങ്കെടുത്ത വനിതകള്‍ക്കെല്ലാം ഉപഹാരങ്ങള്‍ നല്കി ആദരിച്ചു. ട്രഷറര്‍ ദീപക് സതീഷ് നന്ദി പ്രകാശിപ്പിച്ചു. സ്കൈവേ ബ്രിഡ്ജ് ബാന്‍ഡിന്‍റെ (ടസ്യംമ്യ ആൃശറഴല ആമിറ) സംഗീതപരിപാടി ആഘോഷങ്ങള്‍ക്ക് ചാരുത പകര്‍ന്നു. കരോളിന്‍ ബ്ലസന്‍ കോ-ഓര്‍ഡിനേറ്റ് ചെയ്ത ഈ മികവുറ്റ പരിപാടി ഡിന്നറോടു കൂടി സമാപിച്ചു.
