സാധാരണക്കാരെ പിഴയീടാക്കുന്നതിൽ മുൻപന്തിയിലുള്ള കേരള പോലീസിന് സ്വന്തം തട്ടകത്തിൽ വെച്ച് തിരുവനന്തപുരം നഗരസഭയുടെ വക വൻ പിഴ. 44-ാമത് ‘കേരള പോലീസ് ഗെയിംസ് ആന്റ് അത്ലറ്റിക്സ് മീറ്റിന്റെ’ പ്രചാരണാർത്ഥം നഗരത്തിൽ അനുമതിയില്ലാതെ അനധികൃതമായി പരസ്യ ബോർഡുകളും ബാനറുകളും സ്ഥാപിച്ചതിനാണ് പോലീസ് വകുപ്പിന് 15,000 രൂപ പിഴ ചുമത്തി നോട്ടീസ് അയച്ചിരിക്കുന്നത്. ഹൈക്കോടതിയുടെ കർശന ഉത്തരവുകളെയും തദ്ദേശ സ്വയംഭരണ വകുപ്പിന്റെ ചട്ടങ്ങളെയും പൂർണ്ണമായി കാറ്റിൽപ്പറത്തിയാണ് ഈ ബോർഡുകൾ സ്ഥാപിച്ചിരുന്നത്.
മേയർ വി.വി. രാജേഷിന്റെ കർശന നിർദ്ദേശപ്രകാരം നഗരസഭാ സ്ക്വാഡ് നടത്തിയ മിന്നൽ പരിശോധനയിലാണ് പിഎംജി, വഴുതക്കാട് തുടങ്ങിയ പ്രധാന കേന്ദ്രങ്ങളിൽ പോലീസിന്റെ പരസ്യബോർഡുകൾ കണ്ടെത്തിയത്. നഗരസഭയുടെ യാതൊരുവിധ അനുമതിയും നേടാതെ സ്ഥാപിച്ച ഈ ബോർഡുകളും കമാനങ്ങളും സ്ക്വാഡ് അടിയന്തരമായി എടുത്തുമാറ്റുകയും ചെയ്തു. കേരള മുൻസിപ്പൽ നിയമത്തിലെയും പൊതു തെരുവുകളിൽ പരസ്യ ബോർഡുകൾ സ്ഥാപിക്കുന്നത് സംബന്ധിച്ച ചട്ടങ്ങളുടെയും അടിസ്ഥാനത്തിലാണ് കോർപ്പറേഷൻ ഈ ശക്തമായ നടപടി സ്വീകരിച്ചിരിക്കുന്നത്.
നഗരസഭാ റവന്യൂ ഓഫീസറുടെ ഒപ്പോടു കൂടിയ ഔദ്യോഗിക നോട്ടീസ് പോലീസ് ആസ്ഥാനത്തേക്ക് നേരിട്ട് അയച്ചുകൊടുത്തിരിക്കുകയാണ്. നോട്ടീസ് ലഭിച്ച തീയതി മുതൽ ഏഴ് ദിവസത്തിനകം പിഴത്തുക നഗരസഭയിൽ അടച്ചുതീർക്കണമെന്നാണ് ഉത്തരവിൽ വ്യക്തമാക്കിയിരിക്കുന്നത്. വീഴ്ച വരുത്തിയാൽ നിയമപ്രകാരമുള്ള കർശനമായ തുടർനടപടികൾ സ്വീകരിക്കുമെന്നും നഗരസഭ മുന്നറിയിപ്പ് നൽകുന്നുണ്ട്. നിയമം നടപ്പിലാക്കാൻ ചുമതലപ്പെട്ടവർ തന്നെ അത് ലഘുവായി കാണുമ്പോൾ ആർക്കും ഇളവില്ലെന്ന ശക്തമായ സന്ദേശമാണ് നഗരസഭ ഇതിലൂടെ നൽകിയിരിക്കുന്നത്.
