സംഗീത സംവിധായകൻ അനിരുദ്ധ് രവിചന്ദറും സൺറൈസേഴ്‌സ് ഹൈദരാബാദ് സഹഉടമ കാവ്യ മാരനും ബുധനാഴ്ച ഗ്രീസിൽ വെച്ച് നടന്ന സ്വകാര്യ ചടങ്ങിൽ വിവാഹിതരായി. അൽപം മുൻപ് ഇൻസ്റ്റഗ്രാമിൽ വധുവിനൊപ്പമുള്ള ചിത്രം പങ്കുവെച്ചുകൊണ്ട് സംഗീത സംവിധായകൻ വിവാഹ ആഘോഷങ്ങളുടെ ആദ്യ ചിത്രം ആരാധകരുമായി പങ്കുവെച്ചു.
അനിരുദ്ധ് രവിചന്ദർ മനോഹരമായ എംബ്രോയ്ഡറി വർക്കുകളുള്ള പരമ്പരാഗത ഐവറി നിറത്തിലുള്ള വസ്ത്രം തിരഞ്ഞെടുത്തപ്പോൾ, കാവ്യ മാരൻ അതിനോട് അനുയോജ്യമായ അലങ്കാരങ്ങളുള്ള ലെഹംഗയിൽ അതീവ സുന്ദരിയായി കാണപ്പെട്ടു. പൂക്കളുടെ പശ്ചാത്തലത്തിൽ, തങ്ങൾക്ക് ചുറ്റും പൂമഴ പെയ്യുമ്പോൾ പുഞ്ചിരിച്ചു നിൽക്കുന്ന നവദമ്പതികളെ ചിത്രത്തിൽ കാണാം. ചിത്രത്തോടൊപ്പം അനിരുദ്ധ് ഇങ്ങനെ കുറിച്ചു: "ജീവിതത്തിൽ ഒരിക്കൽ മാത്രം സംഭവിക്കുന്നത്, ജീവിതകാലം മുഴുവൻ. 11.11."
വിവാഹവാർത്ത ഇൻസ്റ്റാഗ്രാമിലൂടെ ഔദ്യോഗികമായി അറിയിച്ചതിന് പിന്നാലെ, ആരാധകരും സിനിമാ ലോകത്തെ സുഹൃത്തുക്കളും നവദമ്പതികൾക്ക് ആശംസകളും സ്നേഹവും ചൊരിഞ്ഞു.
തങ്ങളുടെ ജീവിതത്തിലെ ഏറ്റവും പ്രധാനപ്പെട്ട നിമിഷം ആഘോഷിക്കാൻ കാവ്യയും അനിരുദ്ധും എന്തുകൊണ്ട് ഗ്രീസ് തന്നെ തിരഞ്ഞെടുത്തു എന്നത് വലിയൊരു ചോദ്യമായിരുന്നു. ഇന്ത്യയിലെയും വിദേശത്തെയും നിരവധി പ്രമുഖ വിവാഹങ്ങൾക്ക് വേദിയായിട്ടുള്ള ഗ്രീസിനെ ഇവരുടെ ‘ഡെസ്റ്റിനേഷൻ വെഡ്ഡിംഗ്’ സ്‌പോട്ട് ആക്കി മാറ്റിയതിന് പിന്നിൽ അത്രയധികം ആകർഷകമായ ചില സവിശേഷതകളുണ്ട്. അതിൽ ഏറ്റവും പ്രധാനപ്പെട്ടത് ഗ്രീസിലെ അനുഗ്രഹീതമായ കാലാവസ്ഥ തന്നെയാണ്.
വർഷത്തിൽ ഏകദേശം 300 ദിവസത്തോളം സൂര്യപ്രകാശം തിളങ്ങിനിൽക്കുന്ന മെഡിറ്ററേനിയൻ കാലാവസ്ഥയാണ് ഗ്രീസിന്റേത്. ഇത് ഔട്ട്‌ഡോർ വെഡ്ഡിംഗ് സ്‌പോട്ടുകൾക്ക് നൽകുന്ന ദൃശ്യചാരുത വാക്കുകൾക്ക് അതീതമാണ്. അനന്തമായി കിടക്കുന്ന നീലാകാശവും ശാന്തമായ കടൽത്തീരങ്ങളും പശ്ചാത്തലമൊരുക്കുമ്പോൾ ഏത് വെഡ്ഡിംഗ് ഫോട്ടോഗ്രാഫറുടെയും കൺകുളിർപ്പിക്കുന്ന ഫ്രെയിമുകൾ അവിടെ പിറവിയെടുക്കും. ചിത്രങ്ങളിൽ വിരിയുന്ന ഈ സ്വാഭാവിക ഭംഗി തന്നെയാണ് ലോകമെമ്പാടുമുള്ള സെലിബ്രിറ്റികളെ ഗ്രീസിലേക്ക് ആകർഷിക്കുന്നത്.കേവലം കടൽത്തീരങ്ങൾ മാത്രമല്ല, ചരിത്രപരമായ സ്മാരകങ്ങളും പുരാതന പട്ടണങ്ങളും കൊച്ചു ദ്വീപുകളും ചേരുന്ന ഗ്രീക്ക് ഭംഗി വിവാഹ ചിത്രങ്ങൾക്ക് ജീവൻ നൽകുന്നു. ഇതിനൊപ്പം തന്നെ ഗ്രീക്ക് ജനതയുടെ ഊഷ്മളമായ ആതിഥ്യമര്യാദയും എടുത്തുപറയേണ്ട ഒന്നാണ്. അപരിചിതരെപ്പോലും സ്വന്തം സുഹൃത്തായി കാണുന്ന ‘ഫിലോക്‌സീനിയ’ എന്ന പുരാതന സങ്കൽപ്പം ഗ്രീക്ക് സംസ്കാരത്തിന്റെ അടിത്തറയാണ്. തങ്ങളുടെ അതിഥികൾക്ക് രാജകീയമായ പരിഗണനയും സുരക്ഷിതത്വവും ഉറപ്പാക്കാൻ ഇത് സഹായിക്കുന്നു.
ഇതിനെല്ലാം പുറമേ, ആഗോളതലത്തിൽ പ്രശസ്തമായ ഗ്രീക്ക് വിഭവങ്ങളും പാനീയങ്ങളുമാണ് ആഘോഷങ്ങളുടെ മാറ്റ് കൂട്ടുന്നത്. പരമ്പരാഗത ശൈലിയും ആധുനിക രുചികളും സമന്വയിപ്പിച്ചുള്ള കടൽ വിഭവങ്ങളും മാംസ വിഭവങ്ങളും വിവാഹവിരുന്നിനെ അവിസ്മരണീയമാക്കുന്നു. വിഡിയാനോ, മോസ്‌കാറ്റോ സ്പിനാസ് തുടങ്ങിയ തദ്ദേശീയ മുന്തിരി ഇനങ്ങളിൽ നിന്ന് ഉൽപ്പാദിപ്പിക്കുന്ന പ്രശസ്തമായ വൈനുകളും, ഊസോ, മാസ്തിഹ തുടങ്ങിയ പരമ്പരാഗത ഗ്രീക്ക് പാനീയങ്ങളും ഈ മഹാവിവാഹത്തിന് യഥാർത്ഥ ഗ്രീക്ക് സ്പർശം നൽകുമെന്നതിൽ സംശയമില്ല.
