കേരള രാഷ്ട്രീയത്തെ പിടിച്ചുകുലുക്കിയ സിഎംആർഎൽ–എക്സാലോജിക് സാമ്പത്തിക ഇടപാടുമായി ബന്ധപ്പെട്ട അന്വേഷണത്തിൽ നിയമപരമായ തടസങ്ങളെല്ലാം നീങ്ങിയതോടെ നടപടികൾ അതിവേഗമാക്കാൻ എൻഫോഴ്സ്മെന്റ് ഡയറക്ടറേറ്റ് (ഇ.ഡി) തീരുമാനിച്ചു. അന്വേഷണവുമായി മുന്നോട്ട് പോകാൻ ഹൈക്കോടതി ഡിവിഷൻ ബെഞ്ച് അനുമതി നൽകിയതിന് പിന്നാലെ, തുടർനടപടികൾ ആസൂത്രണം ചെയ്യുന്നതിനായി ഇ.ഡി ഡയറക്ടർ രാഹുൽ നവീൻ ഉൾപ്പെടെയുള്ള ഉന്നത ഉദ്യോഗസ്ഥർ കൊച്ചിയിൽ നേരിട്ടെത്തി അടിയന്തര യോഗം ചേർന്ന് സ്ഥിതിഗതികൾ വിലയിരുത്തി. കേസിലെ നിർണായക വ്യക്തികളെ ചോദ്യം ചെയ്യുന്നതിനും, കൂടുതൽ ഡിജിറ്റൽ-സാമ്പത്തിക തെളിവുകൾ ശേഖരിക്കുന്നതിനും അന്വേഷക സംഘങ്ങൾക്ക് യോഗം വ്യക്തമായ നിർദേശം നൽകിയിട്ടുണ്ട് എന്നാണ് റിപ്പോർട്ടുകൾ. പ്രതിപ്പട്ടികയിലുള്ള ടി. വീണയ്ക്കും സിഎംആർഎൽ കമ്പനി അധികൃതർക്കും ചോദ്യം ചെയ്യലിന് ഹാജരാവാൻ വൈകാതെ തന്നെ ഇ.ഡി സമൻസ് അയയ്ക്കുമെന്നാണ് വിവരം. എന്നാൽ ഇതിനുമപ്പുറം, ഈ കേസുമായി ബന്ധപ്പെട്ട് കൂടുതൽ കേന്ദ്ര അന്വേഷണ ഏജൻസികളുടെ വരവ് ഉണ്ടായേക്കാമെന്ന സൂചനകളാണ് ഇപ്പോൾ പുറത്തുവരുന്നത്.

തിരുവനന്തപുരത്ത് വെച്ച് ഇ.ഡി ഉദ്യോഗസ്ഥർക്കു നേർക്കുണ്ടായ ആക്രമണത്തെ ബംഗാളിലെ സന്ദേശ്ഖലി സംഭവത്തോടാണ് മുതിർന്ന ഇ.ഡി ഉദ്യോഗസ്ഥർ താരതമ്യപ്പെടുത്തുന്നത്. 2024 ജനുവരിയിൽ ബംഗാളിൽ റേഷൻ അഴിമതിക്കേസ് അന്വേഷിക്കാനെത്തിയ ഇ.ഡി സംഘത്തെ തൃണമൂൽ കോൺഗ്രസ് നേതാവായിരുന്ന ഷാജഹാൻ ഷെയ്ഖിന്റെ അനുയായികൾ അക്രമാസക്തമായി നേരിട്ടിരുന്നു. അതിനുപിന്നാലെ ഒന്നിനു പിന്നാലെ ഒന്നായി കേന്ദ്ര ഏജൻസികൾ ബംഗാളിലേക്ക് കേന്ദ്രീകരിക്കുകയും, ഇ.ഡി ഉദ്യോഗസ്ഥരെ ആക്രമിച്ചതിനും മറ്റ് അതിക്രമങ്ങൾക്കുമെതിരെ സിബിഐ അന്വേഷണത്തിന് ഹൈക്കോടതി ഉത്തരവിടുകയും ചെയ്തു. പിന്നീട് റേഷൻ അഴിമതിക്ക് പുറമെ കള്ളപ്പണം വെളുപ്പിക്കൽ, അനധികൃത സാമ്പത്തിക ഇടപാടുകൾ എന്നിവയിലേക്ക് അന്വേഷണം വ്യാപിപ്പിച്ചു. ആയുധങ്ങൾ കണ്ടെത്തിയതിനെ തുടർന്ന് ബോംബ് സ്ക്വാഡും എൻഎസ്ജിയും വരെ പരിശോധനയ്ക്കെത്തുകയും ഷാജഹാൻ ഷെയ്ഖിന്റെ കോടിക്കണക്കിന് രൂപയുടെ സ്വത്തുക്കൾ കണ്ടുകെട്ടുകയും ചെയ്തു. സമാനമായ രീതിയിൽ, കുറച്ചേറെ വ്യത്യാസങ്ങളുണ്ടെങ്കിലും, കേരളത്തിലെ സിഎംആർഎൽ കേസിലും കൂടുതൽ കേന്ദ്ര ഏജൻസികളുടെ ഇടപെടലിന് വലിയ സാധ്യതയുണ്ടെന്നാണ് ഇ‍‍.ഡി വൃത്തങ്ങൾ നൽകുന്ന സൂചന.

അതേസമയം, സിഎംആർഎൽ–എക്സാലോജിക് കേസിൽ കൂടുതൽ കേന്ദ്ര ഏജൻസികളുടെ ഇടപെടലിന് പ്രായോഗികമായ ചില പരിമിതികളുണ്ടെന്ന് വാദിക്കുന്നവരുമുണ്ട്. സന്ദേശ്ഖലിയിലേത് പൊതുറേഷൻ വിതരണത്തിലെ അഴിമതിയും, ഭൂമി കയ്യേറ്റം, ഗുണ്ടാ പിരിവ്, സ്ത്രീപീഡനം, ആയുധങ്ങൾ സൂക്ഷിക്കൽ പോലെയുള്ള കടുത്ത കുറ്റകൃത്യങ്ങളുമായിരുന്നുവെങ്കിൽ, കേരളത്തിലെ കേസ് സ്വകാര്യ കമ്പനിയിൽ നിന്ന് രാഷ്ട്രീയ സ്വാധീനം ഉപയോഗിച്ച് ‘മാസപ്പടി’ വാങ്ങി എന്ന ആരോപണമാണ്. കൂടാതെ, ഇ.ഡി ഉദ്യോഗസ്ഥർ ആക്രമിക്കപ്പെട്ട സംഭവത്തിൽ വീണയുടെ പേരിൽ നേരിട്ട് ആരോപണങ്ങളൊന്നുമില്ല. നിലവിൽ കമ്പനി നിയമങ്ങളുടെ ലംഘനവും നികുതി വെട്ടിപ്പും കള്ളപ്പണം വെളുപ്പിക്കലും മാത്രമാണ് അന്വേഷണ പരിധിയിലുള്ളത് എന്നതിനാൽ, സന്ദേശ്ഖലിയിലേതു പോലെ അന്വേഷണത്തിന്റെ വ്യാപ്തി എളുപ്പത്തിൽ വികസിപ്പിക്കാൻ കഴിയില്ലെന്നും ഒരു വിഭാഗം ചൂണ്ടിക്കാണിക്കുന്നു.

നിയമപോരാട്ടങ്ങൾ വരും ദിവസങ്ങളിൽ സുപ്രീം കോടതിയിലേക്ക് നീങ്ങാനാണ് സാധ്യത. ഹൈക്കോടതി വിധിക്ക് പിന്നാലെ സുപ്രീം കോടതിയെ സമീപിക്കാൻ രണ്ടാഴ്ചത്തെ സമയം അനുവദിക്കണമെന്ന് ഹർജിക്കാർ ആവശ്യപ്പെട്ടിരുന്നെങ്കിലും കോടതി അത് അനുവദിച്ചില്ല. അതിനിടെ, തിരുവനന്തപുരത്ത് ഇ.ഡി ഉദ്യോഗസ്ഥരെ ആക്രമിച്ച കേസ് സിബിഐക്ക് വിടണമെന്ന് ആവശ്യപ്പെട്ട് ഒരു സ്വകാര്യ വ്യക്തി നൽകിയ ഹർജിയിൽ ഹൈക്കോടതി കഴിഞ്ഞ ദിവസം ഇ.ഡി ഉൾപ്പെടെയുള്ളവരുടെ അഭിപ്രായം തേടി നോട്ടീസ് അയച്ചിട്ടുണ്ട്. രാഷ്ട്രീയമായി വലിയ കോളിളക്കങ്ങൾ സൃഷ്ടിക്കാൻ ശേഷിയുള്ള ഈ കേസിൽ ഇ.ഡിയും കേന്ദ്ര സർക്കാരും എത്രത്തോളം ശക്തമായി മുന്നോട്ട് പോകുമെന്നാണ് രാജ്യം ഇപ്പോൾ ഉറ്റുനോക്കുന്നത്.