നയാഗ്ര: കാനഡയിലെ നയാഗ്ര മേഖലയിലെ ആരോഗ്യസംരക്ഷണ സംവിധാനത്തിന്റെ ഭാവി വികസനത്തിന് പിന്തുണയുമായി വിശ്വ ശർമ്മയും കമലേഷ് ശർമ്മയും. Niagara Health Foundation-ന് 500,000 കനേഡിയൻ ഡോളറിന്റെ (5 ലക്ഷം ഡോളർ) സംഭാവന നൽകിയാണ് ശർമ്മ കുടുംബം മാതൃകയായത്.
കഴിഞ്ഞ ആറു പതിറ്റാണ്ടോളമായി നയാഗ്രയുടെ സാമൂഹിക-സാംസ്കാരിക രംഗങ്ങളിൽ സജീവ സാന്നിധ്യമാണ് വിശ്വയും കമലേഷ് ശർമ്മയും. 1960-കളുടെ അവസാനത്തിൽ നയാഗ്രയിലെത്തിയ ദമ്പതികൾ കുടുംബജീവിതം കെട്ടിപ്പടുക്കുന്നതിനൊപ്പം പ്രദേശത്തിന്റെ സാമൂഹിക വളർച്ചയിലും നിർണായക പങ്കുവഹിച്ചു.
നയാഗ്രയിലെ ആദ്യ ഹിന്ദു ക്ഷേത്രം സ്ഥാപിക്കുന്നതിൽ നേതൃത്വം നൽകിയതാണ് ഇവരുടെ ശ്രദ്ധേയമായ സംഭാവനകളിലൊന്ന്. ദക്ഷിണേഷ്യൻ സമൂഹം വളർച്ചയുടെ പ്രാരംഭഘട്ടത്തിലായിരുന്ന കാലത്ത് സ്ഥാപിതമായ ക്ഷേത്രം ആരാധനാലയം എന്നതിലുപരി കുടുംബങ്ങൾക്കും പുതുതായി എത്തുന്നവർക്കും ഒത്തുചേരാനും സാംസ്കാരിക പാരമ്പര്യം സംരക്ഷിക്കാനുമുള്ള പ്രധാന കേന്ദ്രമായി മാറി.
ഇപ്പോൾ ആരോഗ്യരംഗത്തേക്കും തങ്ങളുടെ സേവനപാരമ്പര്യം വ്യാപിപ്പിച്ചിരിക്കുകയാണ് ശർമ്മ കുടുംബം. Niagara Health Foundation-ന് നൽകിയ 5 ലക്ഷം ഡോളറിന്റെ സംഭാവന നയാഗ്ര മേഖലയിലെ ആരോഗ്യസേവനങ്ങൾ, നൂതന ചികിത്സാ സംവിധാനങ്ങൾ, രോഗീപരിചരണം എന്നിവ മെച്ചപ്പെടുത്തുന്നതിനുള്ള മുൻഗണനാ പദ്ധതികൾക്ക് വിനിയോഗിക്കും.
“നയാഗ്ര ഞങ്ങളുടെ കുടുംബത്തിന് ഒരുപാട് നൽകിയിട്ടുണ്ട്. ഇവിടെ ഞങ്ങൾ ജീവിതം കെട്ടിപ്പടുത്തു, മക്കളെ വളർത്തി, കുടുംബം വളരുന്നത് കണ്ടു. ഈ സമൂഹത്തിന് തിരികെ നൽകാനുള്ള ഞങ്ങളുടെ മാർഗമാണ് ആരോഗ്യരംഗത്തെ പിന്തുണയ്ക്കുന്നത്. വരുംതലമുറകൾക്കായി നയാഗ്രയെ കൂടുതൽ ശക്തമാക്കാൻ മറ്റുള്ളവർക്കും ഞങ്ങളുടെ കുടുംബത്തിന്റെ യാത്ര പ്രചോദനമാകുമെന്ന് പ്രതീക്ഷിക്കുന്നു,” വിശ്വയും കമലേഷ് ശർമ്മയും പറഞ്ഞു.
ശർമ്മ കുടുംബത്തിന്റെ സംഭാവനയെ Niagara Health Foundation പ്രസിഡന്റ് & സി.ഇ.ഒ. ആൻഡ്രിയ സ്കോട്ട് അഭിനന്ദിച്ചു. “സാമൂഹിക നേതൃത്വത്തിന്റെയും ജീവകാരുണ്യ പ്രവർത്തനങ്ങളുടെയും മികച്ച മാതൃകയാണ് ശർമ്മ കുടുംബം. ഏകദേശം 60 വർഷമായി അവർ നയാഗ്രയിൽ നിക്ഷേപിക്കുകയും സമൂഹത്തിന്റെ വളർച്ചയ്ക്ക് സംഭാവന നൽകുകയും ചെയ്യുന്നു. അവരുടെ അസാധാരണമായ ഉദാരത നയാഗ്രയിലെ ആരോഗ്യപരിചരണ രംഗത്ത് ദീർഘകാല സ്വാധീനം ചെലുത്തും,” അവർ പറഞ്ഞു.
സെന്റ് കാതറീൻസ്, നയാഗ്ര ഫാൾസ്, വെല്ലാൻഡ്, ഫോർട്ട് എറി, പോർട്ട് കോൾബോൺ എന്നിവിടങ്ങളിലെ Niagara Health ആശുപത്രികളിലെ രോഗീപരിചരണത്തിനായി ധനസമാഹരണം നടത്തുന്ന സംഘടനയാണ് Niagara Health Foundation. മെഡിക്കൽ ഉപകരണങ്ങൾ, ആധുനിക സാങ്കേതികവിദ്യ, ആശുപത്രി സൗകര്യങ്ങളുടെ വികസനം തുടങ്ങിയവയ്ക്കാണ് ഫൗണ്ടേഷൻ പ്രധാനമായും സഹായം നൽകുന്നത്.
സാമൂഹിക സേവനത്തിലൂടെയും ജീവകാരുണ്യ പ്രവർത്തനങ്ങളിലൂടെയും പതിറ്റാണ്ടുകളായി നയാഗ്രയിൽ വ്യക്തിമുദ്ര പതിപ്പിച്ച വിശ്വ-കമലേഷ് ശർമ്മ ദമ്പതികളുടെ 5 ലക്ഷം ഡോളറിന്റെ പുതിയ സംഭാവന പ്രദേശത്തെ ആരോഗ്യരംഗത്തിന് കരുത്തേകുന്ന സുപ്രധാന സഹായമായി മാറും.
