തിരുവനന്തപുരം: നെയ്യാറ്റിന്കര ആറാലുംമൂട് സ്വദേശി ഗോപന് സ്വാമിയുടെ കല്ലറ തുറക്കാനുള്ള പൊലീസ് ശ്രമത്തില് സ്ഥലത്ത് സംഘര്ഷം. ഗോപന് സ്വാമിയുടെ ഭാര്യയും മക്കളും മരുമകളും സമാധിസ്ഥലത്ത് കിടന്ന് പ്രതിഷേധിച്ചു. ‘ഓം നമഃ ശിവായ’ എന്ന പ്രാര്ത്ഥനയോടെയാണ് ഗോപന് സ്വാമിയുടെ കല്ലറയ്ക്ക് മുന്നില് സ്വാമിയുടെ വയോധികയായ ഭാര്യ പ്രതിഷേധിച്ചത്. ‘പിതാവ് സമാധിയിരിക്കുന്ന സ്ഥലമാണ്. വിശുദ്ധമായ സ്ഥലമാണിത്. സമാധിയെക്കുറിച്ച് പഠിച്ചിട്ടു വേണം സംസാരിക്കാന്. പൊലീസിന്റെ നടപടി ഏകപക്ഷീയമാണ്. ഞങ്ങളുടെ മരണത്തിനു ശേഷമേ കല്ലറ പൊളിക്കാന് കഴിയൂ’- മകന് പറഞ്ഞു.കുടുംബത്തെ അനുകൂലിക്കുന്ന ഏതാനും ഹൈന്ദവ സംഘടനകളും കല്ലറ പൊളിക്കുന്നതിനെതിരെ രംഗത്തു വന്നു. വീട്ടുകാരുടെ വിശ്വാസത്തിന്റെ പ്രശ്നമാണെന്നും ഹൈന്ദവ വിശ്വാസത്തിനുമേലുള്ള കടന്നുകയറ്റമാണെന്നും അവര് ആരോപിച്ചു. കല്ലറ പൊളിക്കുന്നത് ശരിയല്ലെന്നും പൊലീസിന്റെ നീക്കത്തിനെതിരെ കോടതിയെ അടക്കം സമീപിക്കുമെന്നും അഭിഭാഷകന് പറഞ്ഞു.
കുടുംബത്തിന്റെ കൈവശമുള്ള സ്ഥലം വഴിക്ക് വിട്ടുകൊടുക്കണമെന്ന ആവശ്യം നേരത്തെ വീട്ടുകാര് വിസമ്മതിച്ചിരുന്നു. ഇതാണ് നാട്ടുകാരുടെ പരാതിക്ക് പിന്നിലെന്നും കുടുംബത്തെ അനുകൂലിക്കുന്നവര് പറയുന്നു. പൊലീസിന്റെ വാദം മാത്രമല്ല, വീട്ടുകാരുടെ നിലപാട് കൂടി കേള്ക്കാന് സബ് കളക്ടര് ബാധ്യസ്ഥനാണെന്ന് ഇവര് വ്യക്തമാക്കി.
പൊലീസ് ബലംപ്രയോഗിച്ച് പിന്നീട് വീട്ടുകാരെ സ്ഥലത്തു നിന്നും മാറ്റുകയായിരുന്നു. പ്രതിഷേധക്കാരെയും സ്ഥലത്തു നിന്നും മാറ്റി. ജില്ലാ കളക്ടറുടെ അനുമതി ലഭിച്ചതോടെയാണ് ഗോപന് സ്വാമിയുടെ കല്ലറ തുറന്നു പരിശോധിക്കാന് പൊലീസ് എത്തിയത്. സബ് കളക്ടറുടെ സാന്നിധ്യത്തില് കല്ലറ പൊളിച്ച് പരിശോധിക്കാനാണ് കളക്ടര് അനുമതി നല്കിയത്. സംഘര്ഷ സാധ്യത കണക്കിലെടുത്ത് വന് പൊലീസ് സേനയെയും സ്ഥലത്തെത്തിച്ചിരുന്നു. ഫോറന്സിക് സംഘം അടക്കം എത്തിയശേഷം നിയമപരമായ എല്ലാ നടപടിക്രമങ്ങളും പാലിച്ച് കല്ലറ പൊളിച്ച് പരിശോധന നടത്തുമെന്ന് സ്ഥലത്തെത്തിയ സബ് കളക്ടര് അറിയിച്ചു.
ഗോപന് സ്വാമി വ്യാഴാഴ്ച രാവിലെ 11 മണിയോടെ നടന്ന് പോയി കല്ലറയിലിരുന്ന് സമാധിയായെന്നാണ് മകന് രാജസേനന് പറയുന്നത്. തുടര്ന്ന് സംസ്കാര ചടങ്ങുകള് നടത്തി കോണ്ക്രീറ്റ് കല്ലറയില് അടച്ചുവെന്നാണ് ഗോപന് സ്വാമിയുടെ മകനും വീട്ടുകാരും പറയുന്നത്. എന്നാല് ഗോപന് സ്വാമി അതീവ ഗുരുതരാവസ്ഥയില് കിടപ്പിലായിരുന്നെന്നാണ് ബന്ധുവിന്റെ മൊഴി. കിടപ്പിലായിരുന്ന ഗോപന് സ്വാമിയെ വ്യാഴാഴ്ച രാവിലെ പോയി കണ്ടിരുന്നതായും ബന്ധു പൊലീസിനോട് പറഞ്ഞു.
