തമിഴ് സിനിമാ ലോകത്തെ സൂപ്പർസ്റ്റാർ വിജയ്‌യുടെ അവസാന ചിത്രമെന്ന വിശേഷണത്തോടെയെത്തുന്ന ‘ജന നായകൻ’ റിലീസിന് തൊട്ടുമുൻപ് അഡ്വാൻസ് ബുക്കിംഗിൽ വൻ മുന്നേറ്റം നടത്തുന്നു. സെൻസർ പ്രശ്നങ്ങളെ തുടർന്ന് ആറു മാസത്തോളം വൈകി തിയേറ്ററുകളിലേക്ക് എത്തുന്ന ചിത്രം തമിഴ്‌നാട്ടിൽ നിന്നുമാത്രം ആദ്യദിന ബുക്കിംഗിൽ 12 കോടി രൂപ നേടിക്കഴിഞ്ഞു. ആറര ലക്ഷത്തിലധികം ടിക്കറ്റുകളാണ് അവിടെ വിറ്റഴിഞ്ഞത്.

ഇന്ത്യയൊട്ടാകെയുള്ള അഡ്വാൻസ് ബുക്കിംഗിൽ സാക്നിൽകിന്റെ കണക്കനുസരിച്ച് തമിഴ്, തെലുങ്ക്, ഹിന്ദി പതിപ്പുകളിൽ നിന്നായി ചിത്രം 15.48 കോടി രൂപ സ്വന്തമാക്കി. ആഗോളതലത്തിൽ ചിത്രം ഇതിനകം 30 കോടി രൂപ ഗ്രോസ് കളക്ഷൻ നേടിയതായി റിപ്പോർട്ടുകളുണ്ട്. ബെംഗളൂരുവിൽ മൾട്ടിപ്ലക്സ് റിക്ലൈനർ സീറ്റുകൾക്ക് ടിക്കറ്റൊന്നിന് 2500 രൂപ വരെ ഉയർന്നിട്ടും ബുക്ക് മൈ ഷോയിൽ മണിക്കൂറിൽ 15,000 ടിക്കറ്റുകൾ വരെ വിറ്റഴിക്കപ്പെടുന്ന അഭൂതപൂർവ്വമായ തിരക്കാണ് അനുഭവപ്പെടുന്നത്. എച്ച്. വിനോദ് സംവിധാനം ചെയ്ത ഈ ചിത്രം കെ.വി.എൻ പ്രൊഡക്ഷൻസാണ് നിർമ്മിച്ചിരിക്കുന്നത്.