മലയാളത്തിൻ്റെ സൂപ്പർതാരം മോഹൻലാലിൻ്റെ മകൾ വിസ്മയ മോഹൻലാൽ നായികയായി അരങ്ങേറ്റം കുറിച്ച ‘തുടക്കം’ തിയേറ്ററുകളിൽ വലിയ വിജയത്തിലേക്ക് കുതിക്കുന്നു. റിലീസ് ദിവസം തന്നെ ആദ്യ ഷോകൾക്ക് പിന്നാലെ ചിത്രത്തിന് അനുകൂലമായ പ്രേക്ഷകാഭിപ്രായങ്ങൾ ഉയർന്നുവന്നതോടെ പ്രമുഖ ടിക്കറ്റ് ബുക്കിംഗ് പ്ലാറ്റ്‌ഫോമായ ബുക്ക് മൈ ഷോയിൽ വൻ തിരക്കാണ് അനുഭവപ്പെടുന്നത്. നിലവിൽ മണിക്കൂറിൽ 8,600-ലധികം ടിക്കറ്റുകളാണ് ഈ ചിത്രത്തിനായി വിറ്റുകൊണ്ടിരിക്കുന്നത്. റിലീസിന് മുൻപ് തന്നെ ഓൺലൈൻ ട്രെൻഡിംഗിൽ ഇടംനേടിയിരുന്ന ചിത്രം, ആദ്യ ഷോകൾക്ക് ശേഷമുള്ള പോസിറ്റീവ് റിവ്യൂകളോടെയാണ് ബോക്സോഫീസിൽ സമാനതകളില്ലാത്ത കുതിപ്പ് പ്രകടമാക്കുന്നത്.

വ്യത്യസ്ത ട്രാക്കർമാരുടെ ഔദ്യോഗിക കണക്കുകൾ പ്രകാരം റിലീസിന് മുന്നോടിയായി കേരളത്തിൽ നിന്ന് മാത്രം 86 ലക്ഷം രൂപയാണ് ചിത്രം അഡ്വാൻസ് ബുക്കിംഗിലൂടെ സ്വന്തമാക്കിയത്. ഇതിനുപുറമേ കർണാടകത്തിൽ നിന്ന് 8 ലക്ഷം രൂപയും, തമിഴ്നാട്ടിൽ നിന്ന് 3 ലക്ഷം രൂപയും, ഇന്ത്യയിലെ മറ്റ് സംസ്ഥാനങ്ങളിൽ നിന്നായി 2.50 ലക്ഷം രൂപയും ചിത്രം നേടി. ഇതോടെ ഇന്ത്യയിലെ ആകെ അഡ്വാൻസ് കളക്ഷൻ 99.50 ലക്ഷം രൂപയായി ഉയർന്നു. വിദേശ മാർക്കറ്റുകളിൽ നിന്നുള്ള 40 ലക്ഷം രൂപ കൂടി ഉൾപ്പെടുത്തുമ്പോൾ ചിത്രത്തിൻ്റെ ഫൈനൽ അഡ്വാൻസ് ബുക്കിംഗ് കളക്ഷൻ 1.40 കോടി രൂപ കടന്നിരിക്കുകയാണ്. ഒരു പുതുമുഖ താരം മുഖ്യവേഷത്തിലെത്തുന്ന ചിത്രത്തെ സംബന്ധിച്ചിടത്തോളം ഇത് ചരിത്രപരമായ നേട്ടമായാണ് ട്രേഡ് അനലിസ്റ്റുകൾ വിലയിരുത്തുന്നത്.

പ്രശസ്ത സംവിധായകൻ ജൂഡ് ആന്തണി ജോസഫ് സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂറാണ്. ചിത്രത്തിൽ മോഹൻലാലിൻ്റെ ഒരു അതിഥിവേഷവും ഉൾപ്പെട്ടിരിക്കുന്നത് ആരാധകരുടെ പ്രതീക്ഷകൾ ഇരട്ടിയാക്കാൻ കാരണമായിട്ടുണ്ട്. കൂടാതെ ‘എമ്പുരാൻ’ എന്ന ചിത്രത്തിലൂടെ അഭിനയരംഗത്തെത്തിയ ആന്റണി പെരുമ്പാവൂരിന്റെ മകൻ ആശിഷ് ജോ ആന്റണിയും ചിത്രത്തിൽ ഒരു സുപ്രധാന കഥാപാത്രത്തെ അവതരിപ്പിച്ചിട്ടുണ്ട്. ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്തണി ജോസഫ് എന്നിവർ ചേർന്നാണ് ചിത്രത്തിന് തിരക്കഥയൊരുക്കിയിരിക്കുന്നത്. ജേക്സ് ബിജോയ് സംഗീതസംവിധാനവും ജോമോൻ ടി ജോൺ ഛായാഗ്രഹണവും ചമൻ ചാക്കോ എഡിറ്റിംഗും നിർവഹിച്ചിരിക്കുന്നു. ആദ്യദിനത്തിലെ മികച്ച പ്രതികരണങ്ങളുടെ പശ്ചാത്തലത്തിൽ വരുന്ന വാരാന്ത്യത്തിലും ചിത്രം ബോക്സോഫീസിൽ റെക്കോർഡ് നേട്ടങ്ങൾ സ്വന്തമാക്കുമെന്നാണ് സിനിമാലോകത്തിൻ്റെ വിലയിരുത്തൽ.