ഷിക്കാഗോ: അമേരിക്കൻ ക്നാനായ റീജിയണിലെ കുട്ടികൾക്കായി ചെറുപുഷ്പ മിഷൻ ലീഗ് (സി.എം.എൽ.) ക്നാനായ റീജിയണൽ കമ്മിറ്റി സംഘടിപ്പിച്ച "മാർത്തോമൻ" ക്നാനായ പാട്ട് മത്സരത്തിൽ ന്യൂയോർക്കിലെ സെന്റ് സ്റ്റീഫൻസ് ക്നാനായ കത്തോലിക്കാ ഫൊറോന ദേവാലയം ഒന്നാം സ്ഥാനം നേടി. സേക്രഡ് ഹാർട്ട് ക്നാനായ കത്തോലിക്കാ ഫൊറോന ദേവാലയം, ടാമ്പാ രണ്ടാം സ്ഥാനവും സെന്റ് സ്റ്റീഫൻസ് ക്നാനായ കത്തോലിക്കാ ദേവാലയം, ഓർലാണ്ടോ മൂന്നാം സ്ഥാനവും കരസ്ഥമാക്കി.

ജനപ്രീതി നേടിയ വീഡിയോയ്ക്കുള്ള അവാർഡുകൾ ഡാലസിലെ ക്രൈസ്റ്റ് ദ കിംഗ് ക്നാനായ കത്തോലിക്കാ ദേവാലയത്തിനും സാക്രമെന്റോയിലെ സെന്റ് ജോൺ പോൾ II ക്നാനായ മിഷനും ലഭിച്ചു. വിജയികൾക്ക് ക്യാഷ് അവാർഡ്, ട്രോഫി, സർട്ടിഫിക്കറ്റ് എന്നിവ സമ്മാനിക്കും.

ക്നാനായ സമുദായത്തിന്റെ പാരമ്പര്യഗാനമായ "മാർത്തോമൻ നന്മയാൽ ഒന്ന് തുടങ്ങുന്നു" എന്ന ഗാനം ആലപിച്ച് വീഡിയോ രൂപത്തിൽ സമർപ്പിക്കണമെന്നതായിരുന്നു മത്സരത്തിന്റെ നിർദേശം. ക്നാനായ വിവാഹാചാരങ്ങളുമായി അഭേദ്യമായി ബന്ധപ്പെട്ട ഈ ഗാനം തലമുറകളായി സമൂഹത്തിൽ ആലപിച്ചുവരുന്നതാണ്. വിവാഹചടങ്ങുകൾക്ക് പുറമെ വിവിധ മതപരവും സാംസ്കാരികവുമായ ക്നാനായ ആഘോഷങ്ങളിലും പ്രാർത്ഥനാഗാനമായി ഈ ഗാനം ഉപയോഗിച്ചുവരുന്നു.

ക്നാനായ സമൂഹത്തിന്റെ അമൂല്യമായ സംഗീത-സാംസ്കാരിക പൈതൃകം പുതുതലമുറയ്ക്ക് പകർന്നു നൽകുകയും, അതിനെ സംരക്ഷിക്കുന്നതിലും പ്രചരിപ്പിക്കുന്നതിലും കുട്ടികളെ പ്രോത്സാഹിപ്പിക്കുകയും ചെയ്യുക എന്ന ലക്ഷ്യത്തോടെയാണ് മത്സരം സംഘടിപ്പിച്ചതെന്ന് സംഘാടകർ അറിയിച്ചു.