ഡാളസ്: പ്രശസ്ത ചലച്ചിത്ര നിർമ്മാതാവും നടനുമായ പ്രേം പ്രകാശ് ലൈഫ് ടൈം അച്ചീവ്മെൻ്റ് അവാർഡ് ഏറ്റുവാങ്ങി. ഇന്ത്യ കൾച്ചറൽ എഡ്യൂക്കേഷൻ സെൻ്ററും , കേരളാ അസ്സോസിയേഷൻ ഓഫ് ഡാളസും ചേർന്ന് നൽകിയ പുരസ്കാരം ഡാളസിലെ മലയാളി സമൂഹം നിറ കൈയ്യടികളോടെയാണ് സ്വീകരിച്ചത്. ഡാളസിൽ നടന്ന കേരളാ അസ്സോസിയേഷൻ്റെ ക്രിസ്തുമസ് പുതുവത്സര ആഘോഷ വേദിയിൽ വെച്ചാണ് പുരസ്കാരം നൽകിയത്.മലയാള സിനിമ സീരിയൽ രംഗത്തിന് നൽകിയ സമഗ്ര സംഭാവന പരിഗണിച്ചാണ് പ്രേം പ്രകാശിന് പുരസ്കാരം നൽകിയതെന്ന് ഇന്ത്യ കൾച്ചറൽ എഡ്യൂക്കേഷൻ പ്രസിഡൻ്റ് ഷിജു ഏബ്രഹാമും , ഡാളസ് കേരളാ അസോസിയേഷൻ പ്രസിഡൻ്റ് പ്രദീപ് നാഗലൂലിലും പറഞ്ഞു. ഇരുവരും ചേർന്നാണ് അദ്ദേഹത്തിന് പുരസ്കാരവും , പ്രശസ്തിപത്രവും, ക്യാഷ് അവാർഡും നൽകിയത്. ഗായകൻ , നടൻ, ചലച്ചിത്ര , ടെലിവിഷൻ സീരിയൽ നിർമ്മാതാവ് , സംരംഭകൻ എന്നീ നിലകളിൽ ശ്രദ്ധേയമായ വ്യക്തിത്വമാണ് പ്രേം പ്രകാശ്. അരനൂറ്റാണ്ടിലേറെയായി സിനിമ മേഖലയുടെ അഭിമാനകരമായ വളർച്ചയ്ക്ക് മികച്ച സിനിമകളുടെ നിർമ്മാതാവായും, നടനായും ഇന്ത്യൻ സിനിമ മേഖലയിലും , ടെലിവിഷൻ മേഖലയിലും തൻ്റെ സാന്നിദ്ധ്യമറിയിച്ച പ്രേം പ്രകാശിനെ അമേരിക്കൻ മലയാളി സമൂഹം ആദരിച്ച നിമിഷം കൂടിയായി ഈ പുരസ്കാര വിതരണ ചടങ്ങ്.
കരോൾട്ടൻ സെൻ്റ് ഇഗ്നേഷ്യസ് യാക്കോബായ പള്ളിയുടെ സ്കിറ്റ്, നേറ്റിവിറ്റി ഷോ, കരോൾ ഗാനങ്ങൾ , സ്പെല്ലിംഗ് ബീ , ആർട്ട് & സ്പീച്ച് മത്സരങ്ങളുടെ ട്രോഫികൾ വിതരണവും പുരസ്കാര വിതരണത്തോടനുബന്ധിച്ച് നൽകി. ഇന്ത്യ കൾച്ചറൽ ആൻഡ് എഡ്യൂക്കേഷൻ സെൻ്ററിൻ്റെ പുതിയ ബോർഡ് അംഗങ്ങളെ ഷിജു ഏബ്രഹാം സദസിന് പരിചയപ്പെടുത്തി. എഡ്യൂക്കേഷൻ ഡയറക്ടർ ഡിംപിൾ ജോസഫ് , പ്രോഗ്രാം കോർഡിനേറ്റർ സുബി ഫിലിപ്പ് എന്നിവരും ചടങ്ങിൻ്റെ ഭാഗമായി. കേരള അസോസിയേഷൻ ഓഫ് ഡാളസ് പ്രസിഡൻ്റ് പ്രദീപ് നാഗലൂലിൽ സ്വാഗതവും , ഇന്ത്യ കൾച്ചറൽ ആൻഡ് എഡ്യൂക്കേഷൻ സെൻ്റർ പ്രസിഡൻ്റ് ഷിജു ഏബ്രഹാം നന്ദിയും അറിയിച്ചു.
