കോട്ടയം: കേരളത്തിൽ ഭരണമാറ്റം ഉണ്ടാകാൻ പോകുന്നുവെന്ന് തിരുവഞ്ചൂർ രാധകൃഷ്ണൻ. എൽഡിഎഫ് സർക്കാരിൻ്റെ പത്ത് കൊല്ലത്തെ ദുർഭരണത്തിനെതിരെ ഒറ്റക്കെട്ടായി നീങ്ങണമെന്നും അദ്ദേഹം പറഞ്ഞു. കോട്ടയം നിയോജക മണ്ഡലത്തിൽ യുഡിഎഫ് സ്ഥാനാർഥിയായതിനെ തുടർന്ന് നടത്തിയ റോഡ് ഷോക്കിടെ സംസാരിക്കുകയായിരുന്നു അദ്ദേഹം.
"പത്ത് വർഷമായി നാം അനുഭവിച്ച എല്ലാ വിഷമത്തിൻ്റെയും പീഡനങ്ങളുടെയും പ്രയാസത്തിൻ്റെയും ഭാണ്ഡക്കെട്ട് ഈ ഗാന്ധി പ്രതിമക്ക് മുന്നിൽ അഴിച്ച് വച്ചതിന് ശേഷമാണ് നമ്മൾ മുന്നോട്ട് നീങ്ങുന്നത്. ജാതിമതഭേതമന്യേ ഈ റാലിയിൽ പങ്കെടുത്ത എല്ലാവർക്കും നന്ദി രേഖപ്പെടുത്തുന്നു ഇനിയും ഇതുപോലെ തന്നെ മുന്നോട്ട് പോകണം", തിരുവഞ്ചൂർ രാധകൃഷ്ണൻ പറഞ്ഞു.
തിരുവഞ്ചൂർ രാധാകൃഷ്ണൻ്റെ പ്രചാരണത്തിന് ആവേശ തുടക്കമാണ് ലഭിച്ചത്. പള്ളിപ്പുറത്തുകാവിലെ എം എൽഎ ഓഫിസിന് സമീപത്ത് ആരംഭിച്ച ബൈക്ക് റാലി പുളിമൂട് ജംങ്ഷന്, തിരുനക്കര, നാഗമ്പടം, റെയിൽവേ സ്റ്റേഷൻ, കലക്ടറേറ്റ്, അസംപ്ഷൻ ജങ്ഷൻ, കെകെ റോഡ് വഴി സെൻട്രൽ ജംങ്ഷനിലെത്തി ഗാന്ധി സ്വക്വയറിൽ സമാപിച്ചു.
