തമിഴ്നാട് മുഖ്യമന്ത്രിയും സൂപ്പർതാരവുമായ വിജയ്‌യും ഭാര്യ സംഗീത സ്വർണലിംഗവും തമ്മിലുള്ള വിവാഹമോചനക്കേസ് പുതിയൊരു നിയമപരമായ വഴിത്തിരിവിലേക്ക് കടക്കുന്നതായി റിപ്പോർട്ടുകൾ. വിജയ്ക്ക് വിവാഹേതര ബന്ധമുണ്ടെന്ന ഗുരുതരമായ ആരോപണങ്ങൾ ഉന്നയിച്ച് 27 വർഷത്തെ ദാമ്പത്യം അവസാനിപ്പിക്കാനായി കഴിഞ്ഞ ഫെബ്രുവരിയിലാണ് സംഗീത കോടതിയെ സമീപിച്ചത്. എന്നാൽ, ഇപ്പോൾ പുറത്തുവരുന്ന പുതിയ വിവരങ്ങൾ അനുസരിച്ച് ഇരുവരും തമ്മിലുള്ള ഭിന്നതകൾ രമ്യമായി പരിഹരിക്കാൻ വിജയ്‌യുടെ അമ്മ ശോഭ ചന്ദ്രശേഖർ ഉൾപ്പെടെയുള്ള അടുത്ത കുടുംബാംഗങ്ങൾ ശക്തമായി മുന്നിട്ടിറങ്ങിയിരിക്കുകയാണ്. അമ്മയുടെയും മുതിർന്ന ബന്ധുക്കളുടെയും ഉപദേശങ്ങളെത്തുടർന്ന് ലണ്ടനിലായിരുന്ന സംഗീത ചെന്നൈയിലെ നീലാംകരെ ഇല്ലത്തേക്ക് മടങ്ങിയെത്തിയെന്നും ഇരുവരും ഇപ്പോൾ ഒരേ വീട്ടിൽ ഒരുമിച്ച് സമയം ചെലവഴിക്കുകയാണെന്നുമാണ് സൂചന. ജൂൺ 22-ന് നടക്കാനിരിക്കുന്ന വിജയ്‌യുടെ ജന്മദിനത്തോടനുബന്ധിച്ച് ഇരുവരും ഒന്നിക്കുന്നതുമായി ബന്ധപ്പെട്ട ഒരു ഔദ്യോഗിക പ്രഖ്യാപനം ഉണ്ടായേക്കുമെന്നാണ് സോഷ്യൽ മീഡിയയിലെ ഫാൻസ് ഗ്രൂപ്പുകളിൽ പരക്കുന്ന പ്രധാന ഊഹാപോഹം.

2021-ൽ വിജയ്ക്ക് ഒരു പ്രമുഖ നടിയുമായി ഉണ്ടായ വിവാഹേതര ബന്ധമാണ് ദാമ്പത്യത്തിൽ കടുത്ത വിള്ളലുണ്ടാക്കിയതെന്ന് സംഗീത സമർപ്പിച്ച വിവാഹമോചന ഹർജിയിൽ വ്യക്തമാക്കിയിരുന്നു. ഈ ബന്ധം അവസാനിപ്പിക്കാമെന്ന് വിജയ് ഉറപ്പ് നൽകിയിരുന്നെങ്കിലും, യാതൊരു കുറ്റബോധവുമില്ലാതെ അത് തുടർന്നുവെന്നാണ് ഹർജിയിലെ പ്രധാന വാദം. തന്റെ വിവാഹബന്ധം ഇപ്പോൾ പേപ്പറിൽ മാത്രമാണ് നിലനിൽക്കുന്നതെന്നും ഇനിയൊരു ഒത്തുതീർപ്പിന് സാധ്യതയില്ലെന്നും അവർ മുൻപ് കോടതിയെ അറിയിച്ചിരുന്നു. മുൻപ് വിജയ്‌യും അച്ഛൻ എസ്.എ. ചന്ദ്രശേഖറുമായുള്ള കടുത്ത പിണക്കവും അമ്മ ശോഭ നേരിട്ട് ഇടപെട്ടാണ് തീർത്തത് എന്നതിനാൽ, ഇത്തവണയും അമ്മയുടെ വാക്കുകൾ വിജയ് അനുസരിക്കുമെന്ന പ്രതീക്ഷയിലാണ് സിനിമാ ലോകവും ആരാധകരും.

തന്നെ വിജയ് തന്റെ സാമൂഹികവും ഔദ്യോഗികവുമായ സർക്കിളുകളിൽ നിന്ന് മനഃപൂർവ്വം ഒഴിവാക്കിയതായും സംഗീത ഹർജിയിൽ ആരോപിച്ചിരുന്നു. എന്നാൽ ഇതേ സമയം ആ നടിയോടൊപ്പം അദ്ദേഹം വിദേശ യാത്രകൾ നടത്തുകയും പൊതുപരിപാടികളിൽ പങ്കെടുക്കുകയും ചെയ്തിരുന്നു. ഇത്തരം പരിപാടികളുടെ ചിത്രങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നത് തനിക്കും മക്കളായ ജേസൺ സഞ്ജയ്ക്കും ദിവ്യ സാഷയ്ക്കും വലിയ അപമാനവും കടുത്ത മാനസിക വിഷമവും ഉണ്ടാക്കിയെന്ന് സംഗീത പറഞ്ഞിരുന്നു. ഇതിനുപുറമേ തനിക്ക് മുൻപ് ലഭിച്ചിരുന്ന സൗകര്യങ്ങൾ വിജയ് പിൻവലിക്കുകയും സാമ്പത്തികമായ നിയന്ത്രണങ്ങൾ ഏർപ്പെടുത്തുകയും ചെയ്തതായും അവർ പരാതിപ്പെട്ടിരുന്നു. എന്നാൽ കുടുംബാംഗങ്ങളുടെ പുതിയ അനുരഞ്ജന ചർച്ചകളിലൂടെ ഈ പ്രശ്നങ്ങളെല്ലാം പരിഹരിക്കപ്പെടുമെന്നാണ് ഇപ്പോൾ ലഭിക്കുന്ന വിവരങ്ങൾ.