ഫ്ളോറിഡ: ജോമോന്‍ ആന്‍റണിയുടെ നേതൃത്വത്തിലുള്ള ഫോമാ സണ്‍ഷൈന്‍ റീജിയന്‍റെ 2024-2026-ലേക്കുള്ള കമ്മിറ്റിയുടെ പ്രവര്‍ത്തനോദ്ഘാടനം ജനുവരി 25-ന് വൈകിട്ട് 5-ന് ടാമ്പായിലെ സെന്‍റ് ജോസഫ് സീറോമലബാര്‍ കാത്തലിക് ചര്‍ച്ച് ഓഡിറ്റോറിയത്തില്‍ വെച്ച് വിപുലമായ പരിപാടികളോടെ പ്രൗഢഗംഭീരമായി നടത്തപ്പെട്ടു.
ഫോമായുടെ സമുന്നതരായ നേതാക്കള്‍ക്കൊപ്പം സണ്‍ഷൈന്‍ റീജിയനിലെ എല്ലാ അംഗത്വ സംഘടനകളുടെയും സമ്പൂര്‍ണ്ണ പ്രാതിനിധ്യവും ടാമ്പാ മലയാളികളുടെ നിറസാന്നിദ്ധ്യവും കൂടി ഒത്തുചേര്‍ന്ന് ഈ മഹനീയ ചടങ്ങ് അവിസ്മരണീയമായി. വര്‍ണ്ണശബളമായ ഘോഷയാത്രയില്‍ താളമേളങ്ങളുടെ അകമ്പടിയോടു കൂടി വിശിഷ്ടാതിഥികളെ സമ്മേളന നഗറിലേക്ക് സ്വീകരിച്ചാനയിച്ചു.
റീജിയണല്‍ വൈസ് പ്രസിഡണ്ട് ജോമോന്‍ ആന്റണി അദ്ധ്യക്ഷത വഹിച്ച സമ്മേളനത്തില്‍ നാഷണല്‍ കമ്മിറ്റി മെംമബര്‍ ടിറ്റോ ജോണ്‍ സ്വാഗതം ആശംസിച്ചു. ഫോമാ പ്രസിഡണ്ട് ബേബി മണക്കുന്നേല്‍ ഉദ്ഘാടനകര്‍മ്മം നിര്‍വ്വഹിച്ചു. ഫോമാ എന്ന സംഘടനയ്ക്ക് സണ്‍ഷൈന്‍ റീജിയന്‍ നല്കുന്ന പിന്തുണയ്ക്ക് അദ്ദേഹം പ്രത്യേകം നന്ദി അറിയിച്ചു. ഫോമാ ട്രഷറര്‍ സിജില്‍ പാലക്കലോടി, ജോ. ട്രഷറര്‍ അനുപമ കൃഷ്ണന്‍, റീജിയണ്‍ ചെയര്‍ വിന്‍സന്‍ പാലത്തിങ്കല്‍ എന്നിവരെക്കൂടാതെ യൂത്ത് ചെയര്‍പേഴ്സണ്‍സ് എബിന്‍ ഏബ്രഹാം, മെല്‍ക്കി ബൈജു, സബ് കമ്മിറ്റി ചെയര്‍പേഴ്സണ്‍സായ ഷീജാ അജിത്, നോയല്‍ മാത്യു, സായ് റാം, സ്വപ്നാ നായര്‍, സിജോ പരടയില്‍, ബിനു മാമ്പള്ളി, ഷിബു ജോസഫ് എന്നിവരും ആശംസകളര്‍പ്പിച്ചു.
നാഷണല്‍ കമ്മിറ്റി മെംബര്‍ സാജന്‍ മാത്യു, പ്രോഗ്രാം കോ-ഓര്‍ഡിനേറ്റേഴ്സായ നാഷണല്‍ കമ്മിറ്റി മെംബര്‍ സുനിതാ മേനോനെയും സെക്രട്ടറി നെവിന്‍ ജോസിനേയും പരിചയപ്പെടുത്തി. മാസ്റ്റര്‍ ഓഫ് സെറിമണിയായി നീനു വിഷ്ണു മികച്ച സേവനമനുഷ്ഠിച്ചു.
ഫോമായുടെ മുന്‍ ജനറല്‍ സെക്രട്ടറിമാരായിരുന്ന ജിബി തോമസ്, ടി. ഉണ്ണികൃഷ്ണന്‍, മുന്‍ ട്രഷറര്‍ ബിജു തോണിക്കടവില്‍ എന്നിവരുടെ മഹനീയ സാന്നിദ്ധ്യവുമുണ്ടായിരുന്നു. സെക്രട്ടറി നെവിന്‍ ജോസ് നന്ദിപ്രകാശനം നടത്തി. പൊതുസമ്മേളനത്തിനുശേഷം കലാപ്രതിഭകള്‍ അവതരിപ്പിച്ച ചടുല നൃത്തച്ചുവടുകളും മാസ്മരിക സംഗീതത്തിന്‍റെ അലയടികളും ആഘോഷത്തിന് ആസ്വാദ്യത പകര്‍ന്നു.
നാഷണല്‍ കമ്മിറ്റി അംഗങ്ങളായ സുനിതാ മേനോന്‍, സാജന്‍ മാത്യു, ടിറ്റോ ജോണ്‍, ബിജു തോണിക്കടവില്‍, എബിന്‍ ഏബ്രഹാം, റീജിയന്‍ ചെയര്‍ വിന്‍സന്‍ പാലത്തിങ്കല്‍, സെക്രട്ടറി നെവിന്‍ ജോസ്, ട്രഷറര്‍ ബിനു മഠത്തിലേത്ത്, വൈസ് ചെയര്‍ നോബിള്‍ ജനാര്‍ദ്ദനന്‍, വിമന്‍സ് റെപ്രസെന്‍റേറ്റീവ് ഷീല ഷാജു, പിആര്‍ഒ രാജു മൈലപ്ര, അഡ്വൈസറി കമ്മിറ്റി, വിമന്‍സ് ഫോറം, ബിസിനസ് ഫോറം, കള്‍ച്ചറല്‍ കമ്മിറ്റി, ഐടി ഫോറം, പൊളിറ്റിക്കല്‍ ഫോറം, സ്പോര്‍ട്സ് കമ്മിറ്റി ഇവരുടെ ഓരോരുത്തരുടെയും ആത്മാര്‍ത്ഥമായ സഹകരണം കൊണ്ടും അംഗസംഘടനകളുടെ പൂര്‍ണ്ണ പിന്തുണ കൊണ്ടും മാത്രമാണ് ഈ ഉദ്ഘാടനച്ചടങ്ങ് ഇത്ര പ്രൗഢഗംഭീരമായി നടത്തുവാന്‍ കഴിഞ്ഞതെന്ന് സണ്‍ഷൈന്‍ റീജിയണല്‍ വൈസ് പ്രസിഡണ്ട് ജോമോന്‍ ആന്റണി പ്രസ്താവിച്ചു. വിഭവസമൃദ്ധമായ വിരുന്നോടു കൂടി പരിപാടികള്‍ക്ക് പരിസമാപ്തിയായി.
