വാഷിങ്ടൺ: 2025 മുതൽ അമേരിക്കൻ വിസ, കുടിയേറ്റ ഫീസുകളിൽ വൻ വർദ്ധനവാണ് പ്രാബല്യത്തിൽ വരുന്നത്. H-1B, F-1 സ്റ്റുഡന്റ് വിസകൾ, ടൂറിസ്റ്റ് വിസകൾ എന്നിവയുൾപ്പെടെ എല്ലാ നോൺ-ഇമ്മിഗ്രന്റ് വിസകൾക്കും ഇത് ബാധകമാകും. വർദ്ധിപ്പിച്ച ഫീസുകൾക്ക് പുറമെ, കുടിയേറ്റ നിയമങ്ങളിലും വലിയ പരിഷ്കാരങ്ങളാണ് വന്നിരിക്കുന്നത്.

H-1B വിസയ്ക്ക് വൻ ബാധ്യത: 2025 സെപ്റ്റംബർ 21 മുതൽ, പുതിയ H-1B വിസ പെറ്റീഷനുകൾക്ക് $1,00,000 (ഒരു ലക്ഷം ഡോളർ) ഒറ്റത്തവണ ഫീസ് ഏർപ്പെടുത്തിയിരിക്കുന്നു. വിദേശ തൊഴിലാളികളെ നിയമിക്കുന്ന കമ്പനികൾ ഈ ഭീമമായ തുക അമേരിക്കൻ സർക്കാരിന് നൽകേണ്ടി വരും. നിലവിലുള്ള വിസകൾ പുതുക്കുന്നതിനോ നിലവിലെ വിസക്കാർക്കോ ഇത് ബാധകമല്ല.

വിസ ഇന്റഗ്രിറ്റി ഫീ': 2025 ജൂലൈ 4 മുതൽ പ്രാബല്യത്തിൽ വന്ന 'വൺ ബിഗ് ബ്യൂട്ടിഫുൾ ബിൽ' എന്ന നിയമപ്രകാരം, എല്ലാ നോൺ-ഇമ്മിഗ്രന്റ് വിസ അപേക്ഷകർക്കും 'വിസ ഇന്റഗ്രിറ്റി ഫീ' നിർബന്ധമാക്കി. F-1, J-1, H-1B, ടൂറിസ്റ്റ് B-1/B2 വിസകൾ ഉൾപ്പെടെ എല്ലാ വിഭാഗക്കാർക്കും നിലവിലെ പ്രോസസ്സിംഗ് ഫീസിന് പുറമെ ഇത് നൽകേണ്ടി വരും.

പുതിയ ഇമ്മിഗ്രേഷൻ ഫീസുകൾ: നോൺ-ഇമ്മിഗ്രന്റ് വിസകൾക്ക് ഫോം I-94 അറൈവൽ/ഡിപ്പാർച്ചർ റെക്കോർഡ് ഫീ കൂടി ഏർപ്പെടുത്തി. കൂടാതെ, കുടിയേറ്റക്കാർക്ക് CBP ഫോം I-94 ന് അപേക്ഷിക്കുന്നതിനും ESTA, ഇലക്ട്രോണിക് വിസ അപ്ഡേറ്റ് സിസ്റ്റം രജിസ്ട്രേഷനുകൾക്കും ഉയർന്ന ഫീസ് നൽകണം.

EAD ഫീസ് മാറ്റങ്ങൾ: എംപ്ലോയ്‌മെന്റ് ഓതറൈസേഷൻ ഡോക്യുമെന്റ് (EAD) അപേക്ഷാ ഫീസുകളിലും വർദ്ധനവുണ്ടായി. ഓൺലെെൻ വഴി $470 ഉം, പേപ്പർ ഫോമിൽ $520 ഉം ആണ് പുതിയ ഫീസ്. ഇതിൽ ഏറ്റവും പ്രധാനപ്പെട്ട മാറ്റം, മുമ്പ് ഫീസ് ഒഴിവാക്കിയിരുന്ന അഭയം തേടിയെത്തിയവർ (Asylum), പരോളിൽ കഴിയുന്നവർ (Parolee), താത്കാലിക സംരക്ഷണ പദവി (TPS) ഉള്ളവർ എന്നിവർക്കും ഇനി മുതൽ ഫീസ് നൽകേണ്ടി വരും എന്നതാണ്.

വിസ ഇന്റർവ്യൂ ഒഴിവാക്കൽ (ഡ്രോപ്പ്‌ബോക്സ്) സംവിധാനത്തിൽ മാറ്റം

നേരിട്ടുള്ള വിസ ഇന്റർവ്യൂ ഒഴിവാക്കാൻ സഹായിച്ചിരുന്ന 'ഡ്രോപ്പ്‌ബോക്സ്' സംവിധാനത്തിൽ വരുത്തിയ മാറ്റങ്ങൾ വിസ പുതുക്കുന്നവർക്ക് തിരിച്ചടിയാണ്.

ഇന്റർവ്യൂ നിർബന്ധമാകും: മിക്ക നോൺ-ഇമ്മിഗ്രന്റ് വിസ അപേക്ഷകർക്കും ഇനി മുതൽ നേരിട്ടുള്ള ഇന്റർവ്യൂ നിർബന്ധമാണ്.

ഇളവുകൾ കുറയുന്നു: മുമ്പ് 14 വയസ്സിൽ താഴെയുള്ളവർക്കും 79 വയസ്സിൽ കൂടുതലുള്ളവർക്കും ഇന്റർവ്യൂ ഒഴിവാക്കിയിരുന്നു. പുതിയ നിയമപ്രകാരം ഇവർക്കും ഇന്റർവ്യൂ വേണ്ടിവരും.

H-1B, F-1 വിസക്കാർക്ക് തിരിച്ചടി: പഴയ വിസ കാലഹരണപ്പെട്ട് 12 മാസത്തിൽ താഴെയാണെങ്കിൽ പോലും, H-1B, F-1 വിസക്കാർക്ക് ഇനി മുതൽ ഇന്റർവ്യൂ ഒഴിവാക്കൽ ആനുകൂല്യം ലഭിക്കില്ല. ഈ മാറ്റം സെപ്റ്റംബർ മുതൽ പ്രാബല്യത്തിൽ വന്നു. B1/B2 വിഭാഗത്തിലെ ചിലർക്ക് മാത്രമായിരിക്കും ഇനി ഇളവുകൾ ലഭിക്കുക.

ഇമ്മിഗ്രന്റ് വിസ അപേക്ഷകരുടെ ഇന്റർവ്യൂ സ്ഥലം സംബന്ധിച്ചും സ്റ്റേറ്റ് ഡിപ്പാർട്ട്മെന്റ് മാറ്റങ്ങൾ വരുത്തി.

2025 നവംബർ 1 മുതൽ, ഇമ്മിഗ്രന്റ് വിസ അപേക്ഷകരെ നാഷണൽ വിസ സെന്റർ (NVC) അവരുടെ താമസസ്ഥലത്തുള്ള കോൺസുലാർ ഡിസ്ട്രിക്റ്റിലോ അല്ലെങ്കിൽ ആവശ്യപ്പെട്ടാൽ അവരുടെ ദേശീയതയുള്ള രാജ്യത്തോ ആയിരിക്കും ഇന്റർവ്യൂവിന് ഷെഡ്യൂൾ ചെയ്യുന്നത്.അമെരിക്കൻ ഭരണകൂടം കുടിയേറ്റക്കാർക്കും വിദേശ തൊഴിലാളികൾക്കും മേൽ കൂടുതൽ സാമ്പത്തികവും നിയമപരവുമായ നിയന്ത്രണങ്ങൾ ഏർപ്പെടുത്തുന്നതിന്റെ ഭാഗമായാണ് ഈ മാറ്റങ്ങൾ.