20-ാം വയസ്സിൽ നീന്തലും സൈക്ലിങ്ങും മാരത്തണും ഉൾപ്പെടുന്ന 226 കിലോമീറ്റർ ദൈർഘ്യമുള്ള കഠിനമായ കായിക വെല്ലുവിളി പൂർത്തിയാക്കി റെനീ നൊറോൻഹ. ഹവായിയിലെ കോനയിൽ നടന്ന അയേൺമാൻ ലോക ചാമ്പ്യൻഷിപ്പ് പൂർത്തിയാക്കുന്ന ഏറ്റവും പ്രായം കുറഞ്ഞ ഇന്ത്യക്കാരിയായി 20-കാരിയായ റെനീ മാറി. നേട്ടത്തിന്റെ സന്തോഷം അവർ സമൂഹമാധ്യമത്തിലൂടെ പങ്കുവെച്ചു. പ്രക്ഷുബ്ധമായ കടൽ, ശക്തമായ കാറ്റ്, പൊള്ളുന്ന ചൂട് എന്നിവയെ അതിജീവിച്ചാണ് മത്സരത്തിന്റെ ഫിനിഷിങ് ലൈൻ കടന്നതെന്ന് റെനീ ഇൻസ്റ്റാഗ്രാമിൽ കുറിച്ചു.

മുംബൈയിൽ കലാപരമായ ജിംനാസ്റ്റിക്സിലൂടെ കായികരംഗത്ത് തുടക്കം കുറിച്ച റെനീ പിന്നീട് നീന്തലിലും സൈക്ലിങ്ങിലും പരിശീലനം നേടി. 2024-ൽ 18-ാം വയസ്സിൽ അയേൺമാൻ ന്യൂസിലാൻഡ് മത്സരം പൂർത്തിയാക്കി, ഈ ദീർഘദൂര മത്സരം പൂർത്തിയാക്കുന്ന ഏറ്റവും പ്രായം കുറഞ്ഞ ഇന്ത്യൻ വനിതയായി മാറിയിരുന്നു. 3.8 കിലോമീറ്റർ നീന്തൽ, 180 കിലോമീറ്റർ സൈക്ലിങ്, 42.2 കിലോമീറ്റർ ഓട്ടം എന്നിവയാണ് ഈ മത്സരത്തിന്റെ പ്രധാന ഘട്ടങ്ങൾ. 2025-ൽ ജർമനിയിൽ നടന്ന അയേൺമാൻ ഹാംബർഗ് യൂറോപ്യൻ ചാമ്പ്യൻഷിപ്പും റെനീ 14 മണിക്കൂറിനുള്ളിൽ പൂർത്തിയാക്കി.

ലോകത്തിലെ ഏറ്റവും വെല്ലുവിളി നിറഞ്ഞ ദീർഘദൂര ട്രയാത്ത്‌ലൺ മത്സരങ്ങളിലൊന്നാണ് അയേൺമാൻ ലോക ചാമ്പ്യൻഷിപ്പ്. ഹവായിയിലെ കെയ്‌ലുവ ഉൾക്കടലിൽ നീന്തൽ, അഗ്നിപർവത ഭൂപ്രകൃതിയിലൂടെ കടന്നുപോകുന്ന ക്വീൻ കാഹുമാനു ഹൈവേയിലൂടെ സൈക്ലിങ്, അലി ഐ ഡ്രൈവിലൂടെ മാരത്തൺ ഓട്ടം എന്നിവയാണ് മത്സരത്തിന്റെ പ്രധാന ഘട്ടങ്ങൾ. കാലാവസ്ഥയും ദൈർഘ്യവും ശാരീരികക്ഷമതയും ഒരുപോലെ പരീക്ഷിക്കുന്ന ഈ മത്സരത്തിൽ റെനീ നേടിയ നേട്ടം ശ്രദ്ധേയമാണ്.

കായികരംഗത്തെ നേട്ടങ്ങൾക്കൊപ്പം പഠനവും മുന്നോട്ടുകൊണ്ടുപോകുന്ന റെനീ, ഐ.ഐ.ടി. മദ്രാസിൽ ഡാറ്റാ സയൻസിൽ ബി.എസ്. പഠിക്കുന്നതായും നൽകിയ വിവരങ്ങളിൽ പറയുന്നു. ജിംനാസ്റ്റിക്സിൽനിന്ന് ദീർഘദൂര കായികമത്സരങ്ങളിലേക്കുള്ള മാറ്റവും തുടർച്ചയായ നേട്ടങ്ങളും റെനിയുടെ യാത്രയെ വേറിട്ടതാക്കുന്നു. 20-ാം വയസ്സിൽ അയേൺമാൻ ലോക ചാമ്പ്യൻഷിപ്പ് പൂർത്തിയാക്കിയ ഈ നേട്ടം ഇന്ത്യൻ കായികരംഗത്തും ശ്രദ്ധ നേടുകയാണ്.