ലാറ്റിൻ അമേരിക്കയിലെ അവശേഷിക്കുന്ന കമ്മ്യൂണിസ്റ് രാജ്യപട്ടികയിൽ നിന്നും വെനിസ്വേല അപ്രത്യക്ഷമാവുകയാണ്. 'മയക്കുമരുന്ന് ബോട്ട്' ആക്രമണങ്ങൾക്കിടയിൽ, വെനിസ്വേലയ്ക്ക് സമീപം യുഎസ് സൈന്യം സാന്നിധ്യം വർദ്ധിപ്പിക്കുന്നു. യുഎസ് നാവികസേനയുടെ 10%-ത്തിലധികം കപ്പലുകളും മറ്റ് വിഭവങ്ങളും ഇപ്പോൾ ഈ മേഖലയിലാണ്.

കരീബിയൻ കടലിലെ ചെറിയ ബോട്ടുകൾക്ക് നേരെ അടുത്തിടെ നടത്തിയ ആക്രമണമുൾപ്പെടെ ആറ് അറിയപ്പെടുന്ന ആക്രമണങ്ങളിലായി കുറഞ്ഞത് 28 പേരെങ്കിലും ഈ ആക്രമണത്തിൽ കൊല്ലപ്പെട്ടിട്ടുണ്ട്. കൊല്ലപ്പെട്ടവർ കുറ്റവാളികളാണെന്ന് സ്ഥിരീകരിക്കുന്ന തെളിവുകളോ ഇന്റലിജൻസ് ഡാറ്റയോ വൈറ്റ് ഹൗസ് നൽകിയിട്ടില്ല. യുഎസ് ആക്രമണങ്ങളിൽ നിന്ന് ഇതുവരെ ആദ്യമായി രക്ഷപ്പെട്ട ഏറ്റവും പുതിയ ആക്രമണത്തിൽ പരിക്കേറ്റവരിൽ രണ്ടുപേരെ ഒരു നാവിക കപ്പലിൽ തടവിലാക്കിയിട്ടുണ്ടെന്നാണ് റിപ്പോർട്ട്.

അമേരിക്കൻ പ്രസിഡന്റ് ഡൊണാൾഡ് ട്രംപ്

വെനിസ്വേലൻ പ്രസിഡന്റ് മഡുറോയുടെ നിർദ്ദേശപ്രകാരം വെനിസ്വേലൻ മയക്കുമരുന്ന് കാർട്ടലുകൾ യുഎസിനെ ദ്രോഹിക്കാൻ വേണ്ടി കടത്തുന്ന മയക്കുമരുന്ന് കപ്പലുകളിൽ ഉണ്ടെന്ന് അമേരിക്കൻ പ്രസിഡന്റ് ട്രംപ് അവകാശപ്പെട്ടു. മഡുറോയെ അട്ടിമറിക്കാൻ ലക്ഷ്യമിട്ടുള്ള ഒരു വലിയ പ്രചാരണത്തിനുള്ള ഒരു മറയാണ് അമേരിക്കൻ പ്രസിഡന്റിന്റെ വാദങ്ങൾ എന്ന് ചില വിശകലന വിദഗ്ധർ അഭിപ്രായപ്പെടുന്നു. ഇത് ഒരു തുറന്ന യുദ്ധത്തിനുള്ള കളമൊരുക്കുകയാണെന്നാണ് നിരീക്ഷകർ കണക്കുകൂട്ടുന്നത്. വെനിസ്വേലൻ പ്രസിഡന്റ് നിക്കോളാസ് മഡുറോയെ അറസ്റ്റ് ചെയ്യുന്നവർക്ക് 50 മില്യൺ ഡോളർ പാരിതോഷികം നൽകുമെന്ന് യു.എസ് അറ്റോർണി ജനറൽ ബോണ്ടി പ്രഖ്യാപിച്ചു.

വെനിസ്വേലൻ പ്രസിഡന്റ് നിക്കോളാസ് മഡുറോ

മയക്കുമരുന്ന് കടത്തിൽ പങ്കുണ്ടെന്ന് വെനിസ്വേലൻ നേതാവ് നിഷേധിച്ചു. കൂടാതെ ഒരു യു.എസ് പ്രത്യേക ദൂതനുമായി "നേരിട്ട് തുറന്ന സംഭാഷണത്തിൽ" ഏർപ്പെടാൻ വാഗ്ദാനം ചെയ്തു. വെനിസ്വേലൻ ടെറിട്ടോറിയൽ ജലാശയങ്ങൾക്കുള്ളിലോ കരയിലോ പോലും ആക്രമണങ്ങൾ ഉൾപ്പെടാവുന്ന രഹസ്യ പ്രവർത്തനങ്ങൾ ആസൂത്രണം ചെയ്യാൻ സിഐഎയെ അധികാരപ്പെടുത്തിയിട്ടുണ്ടെന്ന് പ്രസിഡന്റ് ട്രംപ് സമ്മതിച്ചു. ഒരു വലിയ യുദ്ധത്തിനുള്ള എല്ലാ സന്നാഹങ്ങളും അമേരിക്ക അവിടെ വ്യന്യസിച്ചിട്ടുണ്ട്. ഒരു യു.എസ് വിമാനവാഹിനിക്കപ്പൽ ഉടൻ തന്നെ ഈ മേഖലയിലേക്ക് അയച്ചേക്കാമെന്നാണ് ചില വിശകലന വിദഗ്ധർ പ്രവചിക്കുന്നത്.

ഇതെല്ലാം മഡുറോയെ പുറത്താക്കാനുള്ള അടിത്തറ പാകുക എന്നതായിരിക്കും. യുഎസ് എതിരാളികളായ റഷ്യയുടെയും ചൈനയുടെയും പിന്തുണ വളരെക്കാലമായി ആസ്വദിച്ചിട്ടുള്ള മഡുറോയെ സ്ഥാനമൊഴിയാൻ സമ്മർദ്ദത്തിലാക്കാനുള്ള ശ്രമമായിരിക്കാം ട്രംപിനുള്ളത്. പതിനായിരത്തോളം സൈനികരെ ഇവിടെ കൂട്ടുന്നത് മയക്കുമരുന്നു കടത്തിനു തടയിടാൻ ആയിരിക്കില്ല. 1989-ൽ, പനാമ അധിനിവേശ സമയത്ത്, ഏകാധിപതി മാനുവൽ നൊറിഗയെ സ്ഥാനഭ്രഷ്ടനാക്കാൻ യുഎസ് ഏകദേശം 27,000 സൈനികരെ അയച്ചു. 1983-ൽ, ഗ്രെനഡ പിടിച്ചടക്കാൻ അവർ വെറും 7,300 സൈനികരെ അയച്ചു. യുഎസ് സതേൺ കമാൻഡിന്റെ തലവനായ അഡ്മിറൽ ആൽവിൻ ഹോൾസി മൂന്ന് വർഷത്തെ കാലാവധിയിൽ നിന്ന് ഒരു വർഷം കഴിഞ്ഞ് വിരമിക്കുമെന്ന വ്യാഴാഴ്ചത്തെ പ്രഖ്യാപനം അമേരിക്കൻ പദ്ധതികളിൽ ഒരു പരിധിവരെ അനിശ്ചിതത്വം ഉണ്ടാക്കുന്നു.

ജനസംഖ്യയുടെ മൂന്നിലൊന്ന്, അതായത് 9.3 ദശലക്ഷം വെനിസ്വേലക്കാർ മിതമായതോ ഗുരുതരമായതോ ആയ ഭക്ഷ്യ അരക്ഷിതാവസ്ഥയിലാണ്. സാമ്പത്തിക തകർച്ച, അമിത പണപ്പെരുപ്പം, വൻതോതിലുള്ള തൊഴിലില്ലായ്മ, ഭക്ഷണം, മരുന്ന് തുടങ്ങിയ അടിസ്ഥാന ആവശ്യങ്ങളുടെ കടുത്ത ക്ഷാമം എന്നിവയാൽ സവിശേഷതകളുള്ള ഒരു ദശാബ്ദക്കാലത്തെ മാനുഷിക പ്രതിസന്ധി മൂലമാണ് വെനിസ്വേലക്കാർ അമേരിക്കയിലേക്ക് കുടിയേറുന്നത്.

മരിയ കൊറിന മച്ചാഡോ

അമേരിക്കൻ പ്രസിഡന്റ് ഡൊണാൾഡ് ട്രംപ് സമാധാനത്തിനുള്ള നോബൽ സമ്മാനത്തിനായി വിലപേശുകയും, എന്നാൽ ഒളിവിൽ കഴിയുന്ന വെനിസ്വേലൻ പ്രതിപക്ഷനേതാവ് മരിയ കൊറിന മച്ചാഡോവിനു അതുലഭിക്കയും ചെയ്തപ്പോൾ 2025 നോബൽ സമാധാന സമ്മാനം വിവാദമായി.

അമേരിക്കൻ പ്രസിഡന്റ് ഡൊണാൾഡ് ട്രംപിന്റെ തുറന്ന പിന്തുണക്കാരിയാണ് അവർ. വെനിസ്വേലയിലെ ഭരണമാറ്റത്തിന് "നമുക്ക് ഇതുവരെ ലഭിച്ചിട്ടുള്ളതിൽ വച്ച് ഏറ്റവും വലിയ അവസരം" എന്നാണ് അവർ അദ്ദേഹത്തെ വിശേഷിപ്പിച്ചത്. അതുകൊണ്ടുതന്നെ നോബൽ സമ്മാനം സ്വന്തം ജനതക്കൊപ്പം അമേരിക്കൻ പ്രസിഡന്റ് ട്രമ്പിനും സമർപ്പിക്കാൻ അവർ മറന്നില്ല.

വെനിസ്വേലൻ പ്രസിഡന്റ് നിക്കോളാസ് മഡുറോയെ നയതന്ത്രപരമായും സാമ്പത്തികമായും ഒറ്റപ്പെടുത്താനുള്ള ട്രംപിന്റെ ശ്രമങ്ങൾ എന്തിനോ ഉള്ള പുറപ്പാടിലാണ് എന്ന് ഇപ്പോൾ തിരിച്ചറിയുന്നുണ്ട്. യു.എസ് കരീബിയനിൽ കപ്പലുകൾ വിന്യസിക്കുകയും വെനിസ്വേലൻ മയക്കുമരുന്ന് കാർട്ടലുകളുമായി ബന്ധപ്പെട്ട കപ്പലുകളിൽ ആക്രമണം നടത്തുകയും ചെയ്തു. "മയക്കുമരുന്ന് ഭീകരത"യെ ചെറുക്കുന്നതിനായി രൂപപ്പെടുത്തിയ നടപടികളായിരുന്നു ഇവ. എന്നാൽ മഡുറോയും അയൽ രാജ്യങ്ങളും ഇത് കടന്നുകയറ്റവും നിയമവിരുദ്ധമാണെന്ന് വിമർശിച്ചു.

കാരക്കാസിലെ എൽ അവില പർവ്വതം

ലാറ്റിൻ അമേരിക്കയിലെ ഏറ്റവും നഗരവൽക്കരിക്കപ്പെട്ട രാജ്യങ്ങളിൽ ഒന്നാണ് വെനിസ്വേല. ഔദ്യോഗികമായി ബൊളിവേറിയൻ റിപ്പബ്ലിക് ഓഫ് വെനിസ്വേല എന്നാണ് അറിയപ്പെടുന്നത്. അതിന്റെ തലസ്ഥാനം കാരക്കാസ് നഗരവും ജനസംഖ്യ 29 ദശലക്ഷവുമായി കണക്കാക്കപ്പെടുന്നു.

1499 ഇൽ ഇവിടം സന്ദർശിച്ച ഇറ്റാലിയൻ നാവികനായ അമേരിഗോ വെസ്പുച്ചിയെ ഇറ്റലിയിലെ മനോഹരമായ വെനീസ് നഗരത്തെ ഓർമ്മിപ്പിച്ചു, അതിനാൽ അദ്ദേഹം ആ പ്രദേശത്തിന് വെനിസിയോള അല്ലെങ്കിൽ "ലിറ്റിൽ വെനീസ്" എന്ന് പേരിട്ടു.

1498-ൽ, അമേരിക്കയിലേക്കുള്ള തന്റെ മൂന്നാമത്തെ യാത്രയിൽ, ക്രിസ്റ്റഫർ കൊളംബസ് കിഴക്കോട്ട് തന്റെ ഗതി തിരിച്ചുവിട്ട വലിയ കടൽത്തീര ശുദ്ധജല പ്രവാഹത്തിൽ അത്ഭുതപ്പെട്ടു. ഇസബെല്ലയ്ക്കും ഫെർഡിനാൻഡിനും എഴുതിയ കത്തിൽ കൊളംബസ്, വെനിസ്വേല എന്ന ഈ ഭൂമികയെക്കുറിച്ചു താൻ ഭൂമിയിലെ സ്വർഗ്ഗത്തിൽ എത്തിയിരിക്കണമെന്ന് പറഞ്ഞു. സ്പാനിഷ് സാമ്രാജ്യം തിരിച്ചുപിടിക്കുന്നതിന് മുമ്പ്, 1528 മുതൽ 1546 വരെ ജർമ്മൻ വെൽസർമാർ വെനിസ്വേല ഭരിച്ചു.

1522-ൽ വെനിസ്വേല പ്രദേശം സ്പെയിൻ കോളനിവത്കരിച്ചു. 1811-ൽ, സ്പാനിഷിൽ നിന്ന് സ്വാതന്ത്ര്യം പ്രഖ്യാപിക്കുകയും ആദ്യത്തെ ഫെഡറൽ റിപ്പബ്ലിക് ഓഫ് കൊളംബിയയുടെ ഭാഗമായി മാറുകയും ചെയ്ത ആദ്യത്തെ സ്പാനിഷ്-അമേരിക്കൻ പ്രദേശങ്ങളിൽ ഒന്നായി ഇത് മാറി. 1830-ൽ ഇത് ഒരു പൂർണ്ണ പരമാധികാര രാജ്യമായി വേർപിരിഞ്ഞു. 19-ാം നൂറ്റാണ്ടിൽ, വെനിസ്വേല രാഷ്ട്രീയ പ്രക്ഷുബ്ധതയും സ്വേച്ഛാധിപത്യവും അനുഭവിച്ചു. 20-ാം നൂറ്റാണ്ടിന്റെ മധ്യം വരെ പ്രാദേശിക സൈനിക സ്വേച്ഛാധിപതികളുടെ ആധിപത്യം തുടർന്നു.

"പ്രസിഡന്റ് മഡുറോയുടെ തിരോധനമാണ് ഞങ്ങൾ ഓരോ ദിവസവും സ്വപ്നം കാണുന്നത്" വെനിസ്വേലവിട്ടു അമേരിക്കയിൽ കുടിയേറിയ മരിയ സാഞ്ചേസ് അഭിപ്രായപ്പെട്ടു. കാലഹരണപ്പെട്ട പ്രവർത്തിദോഷമായ കമ്മ്യൂണിസത്തിൻറെ പേരിൽ ഒരു ജനതയെ നാശത്തിന്റെ പടുകുഴിയിൽ തള്ളിയ നേതാവാണ് നിക്കോളാസ് മഡുറോയെന്ന് അവർ പറയുമ്പോൾ കണ്ണുകളിൽ നിറയുന്ന വേദനയും, മനോഹരമായ ഭൂപ്രകൃതിയും ജനങ്ങളും നിവസിച്ചിരുന്ന ഒരു ജനതതി, ദാരിദ്ര്യത്തിൽ നിസ്സഹായരായി നിൽക്കുന്ന വേദനയും മുഖത്തു മിന്നിമാറിവന്നു.

നിലവിലുള്ള പാർട്ടികളിലുള്ള ആത്മവിശ്വാസം തകർന്നതിനെ തുടർന്ന് 1998-ൽ ഹ്യൂഗോ ഷാവേസ് പ്രസിഡന്റായി തിരഞ്ഞെടുക്കപ്പെടുകയും തുടർന്ന് 1999-ൽ ഒരു പുതിയ ഭരണഘടന എഴുതുന്നതിനായി ഒരു ഭരണഘടനാ അസംബ്ലി ആരംഭിച്ച "ബൊളിവേറിയൻ വിപ്ലവം" ആരംഭിക്കുകയും ചെയ്തു. ഒട്ടേറെ പ്രതീക്ഷയോടെ അന്ന് അതിനെ പിന്തുണച്ച കൂട്ടത്തിൽ താനും സജീവമായി ഉണ്ടായിരുന്നു എന്ന് മരിയ സാഞ്ചേസ് പറഞ്ഞു. സൈമൺ ബൊളിവാറിന്റെ പേരിലാണ് "ബൊളിവേറിയൻ വിപ്ലവം" അറിയപ്പെടുന്നത്.

"ജനാധിപത്യത്തിൽ ഉറച്ചുനിൽക്കാൻ കമ്മ്യൂണിസ്റ്റുകൾക്ക് പറ്റില്ല, അവർ വളരെ പെട്ടന്ന് ഏകാധിപതികളായി മാറ്റപ്പെടും എന്നാണ് കാലം ഞങ്ങളെ പഠിപ്പിച്ചത്. എത്ര പെട്ടന്നാണ് ഷാവേസും മറ്റ് പിന്തുണക്കാരും ചേർന്ന് ജനകീയ ജനാധിപത്യം, സാമ്പത്തിക സ്വാതന്ത്ര്യം, വരുമാനത്തിന്റെ തുല്യമായ വിതരണം, രാഷ്ട്രീയ അഴിമതി അവസാനിപ്പിക്കുക തുടങ്ങി സോഷ്യലിസ്റ്റ് വാചാടോപം ഉപയോഗിച്ച് ബൊളിവേറിയനിസം നടപ്പിലാക്കാൻ ശ്രമിച്ചത്". ബൊളിവേറിയനിസം എന്ന ആശയം പരാജയപ്പെടുകയും ജനകീയ മുന്നേറ്റങ്ങളെ അടിച്ചമർത്തുകയുമാണ് പിന്നീട് ഉണ്ടായത്.

കമ്മ്യൂണിസ്റ്റു രാജ്യങ്ങൾ എന്നപേരിൽ ക്യൂബ, ചൈന, റഷ്യ എന്നീ രാജ്യങ്ങളുടെ താല്പര്യങ്ങൾളും, വർഗ്ഗ വൈരികളായ അമേരിക്കയോടുള്ള കൊടും പകയും തങ്ങളുടെ പ്രീയപ്പെട്ട രാജ്യത്തെ വല്ലാതെ മുറിവേൽപ്പിച്ചു. മധ്യേഷ്യയിലെ വയലൻസിൽ നിന്ന് പലായനം ചെയ്ത അറബ് പൗരന്മാർ വെനിസ്വേലയിൽ കൂടുതലായി തമ്പടിച്ചു. അവർ അവരുടെ ലബനീസ് സാംസ്കാരിക പാരമ്പര്യം കൈവിടാതെ നിൽക്കുകയും രാജ്യത്തിൻറെ ദയനീയമായ അവസ്ഥയെ ചൂഷണം ചെയ്യുകയുമാണ് ഉണ്ടായത്. ഹെസ്‌ബുള്ള തീവ്രവാദികൾക്ക് ഇടത്താവളവും സഹായവും ഇവിടെനിന്നു ഉണ്ടാകുന്നു. സ്വന്തമായ പാസ്പോര്ട്ട് കമ്പനിപോലും ഇവർ നടത്തുന്നതായി ആക്ഷേപമുണ്ട്.

ഹ്യൂഗോ ഷാവേസ്

ഹ്യൂഗോ ഷാവേസിൻറെ മരണശേഷം 2013 ഇൽ അധികാരം ഏറ്റ നിക്കോളാസ് മഡുറോയുടെ സാമൂഹിക-സാമ്പത്തിക നയങ്ങൾ, ലാറ്റിൻ അമേരിക്കയിലെ ഏറ്റവും സമ്പന്നമായ രാജ്യങ്ങളിൽ ഒന്നായ വെനിസ്വേല ഏറ്റവും ദരിദ്രമായ രാജ്യങ്ങളിലൊന്നായി മാറ്റി. ഇത് വെനിസ്വേലയിൽ വലിയ കടബാധ്യതയ്ക്ക് കാരണമാക്കി, എന്നാൽ അഴിമതിയിൽ മാറ്റമൊന്നും വരുത്തിയില്ല. ലാറ്റിൻ അമേരിക്കയുടെ ചരിത്രത്തിലെ ഏറ്റവും വലിയ ആളുകളുടെ കുടിയേറ്റമായ വെനിസ്വേലൻ അഭയാർത്ഥി പ്രതിസന്ധി ഉണ്ടായി, 7 ദശലക്ഷത്തിലധികം - രാജ്യത്തെ ജനസംഖ്യയുടെ ഏകദേശം 20% - കുടിയേറ്റം നടത്തി.

2014 ഫെബ്രുവരി മുതൽ, ലക്ഷക്കണക്കിന് ആളുകൾ ഉയർന്ന തോതിലുള്ള ക്രിമിനൽ അക്രമം, അഴിമതി, അമിത പണപ്പെരുപ്പം, സർക്കാർ നയങ്ങൾ മൂലമുള്ള അടിസ്ഥാന വസ്തുക്കളുടെ വിട്ടുമാറാത്ത ദൗർലഭ്യം എന്നിവയ്‌ക്കെതിരെ പ്രതിഷേധിച്ചു. നിക്കോളാസ് മഡുറോയുടെ സർക്കാരിന്റെ കീഴിൽ വളരെയധികം വെനിസ്വേലയിലെ സ്ത്രീകൾ ലൈംഗിക അതിക്രമത്തിന് ഇരയായി. ഈ പ്രതിസന്ധി വെനിസ്വേലൻ സ്ത്രീകളെ ലൈംഗിക കടത്ത്, വേശ്യാവൃത്തി എന്നിവയിലൂടെ ചൂഷണത്തിന് വിധേയരാക്കി.

1997 ഇൽ , "വെനിസ്വേല ലോകത്തിലെ സൗന്ദര്യ റാണി ഫാക്ടറിയായി മാറിയിരിക്കുന്നു" എന്ന് ന്യൂ യോർക്ക് ടൈംസ് പത്രം എഴുതി. ലോകത്ത് ഏറ്റവും കൂടുതൽ "മിസ്സ്" മത്സര വിജയികളുള്ള രാജ്യങ്ങളിലൊന്നാണ് വെനിസ്വേല, ആറ് മിസ്സ് വേൾഡ് (ഒന്നാം സ്ഥാനം) ഏഴ് മിസ്സ് യൂണിവേഴ്സ് കിരീടങ്ങൾ (യുണൈറ്റഡ് സ്റ്റേറ്റ്സിന് പിന്നിൽ രണ്ടാമത്) നേടി.

പ്രകൃതി സൗന്ദര്യവും, ദേശീയ സൗന്ദര്യവും, എണ്ണ സമ്പന്നതയും ഉള്ള ഒരു രാജ്യം, ഏറ്റവും ദരിദ്രരും നിർഭാഗ്യകരവുമായ ആളുകളുടെ കൂട്ടമായി മാറിയിരിക്കുന്നു. നല്ല ആളുകളുള്ളതും എന്നാൽ മോശം രാഷ്ട്രീയ നേതൃത്വമുള്ളതുമായ രാജ്യം. വിനാശകരമായ രാഷ്ട്രീയ തീരുമാനങ്ങൾ മറികടന്നു കാര്യങ്ങൾ നല്ലതിലേക്ക് മാറുമെന്ന് ആശിക്കാം.

പരാജയപ്പെട്ട പ്രക്ഷോഭങ്ങൾക്കോ വിപ്ലവങ്ങൾക്കോ വിട്ടുകൊടുക്കാത്ത പോരാട്ടങ്ങളുടെ ഒരു നീണ്ട ചരിത്രമാണ് ഇന്നത്തെ വെനിസ്വേല എങ്കിൽ; ഇനിയും വിട്ടുകൊടുക്കാനാവാത്ത പോരാട്ടവീര്യമാണ് അവരുടെ ഇന്നത്തെ യാഥാർത്ഥങ്ങളിലും നിറയുന്നത്.