പ്രവാസി മലയാളികളുടെ ആത്മാഭിമാനത്തിന്റെയും കൂട്ടായ്മയുടെയും പ്രതീകമായി മാറിയ 16-ാമത് കനേഡിയൻ നെഹ്‌റു ട്രോഫി വള്ളംകളി ബ്രാംപ്ടൻ നഗരത്തിലെ മനോഹരമായ പ്രഫസേഴ്‌സ് ലേക്കിൽ വർണാഭമായ ആഘോഷങ്ങളോടും ആവേശകരമായ മത്സരങ്ങളോടും കൂടി അരങ്ങേറി. കേരളത്തിന് പുറത്ത് സംഘടിപ്പിക്കപ്പെടുന്ന ഏറ്റവും പഴക്കമേറിയതും വലുതുമായ വള്ളംകളികളിലൊന്നായ ബ്രാംപ്ടൻ ബോട്ട് റേസ്, വർഷങ്ങളായി കാനഡയിലെ മലയാളി സമൂഹത്തിന്റെ മാത്രമല്ല, വിവിധ സമൂഹങ്ങളുടെയും ശ്രദ്ധാകേന്ദ്രമായി മാറിയിരിക്കുകയാണ്.

കേരളത്തിന്റെ പുന്നമടക്കായലിന്റെ ആവേശവും പാരമ്പര്യവും കാനഡയുടെ മണ്ണിലേക്ക് പകർന്നുനൽകുന്ന ഈ മഹാമേള, കായികമത്സരത്തിനപ്പുറം മലയാളി സംസ്കാരത്തിന്റെയും പാരമ്പര്യത്തിന്റെയും ഐക്യത്തിന്റെയും മഹത്തായ ആഘോഷമായി മാറി. കാനഡയിലെ വിവിധ തലങ്ങളിലുള്ള മന്ത്രിമാർ, എംപിമാർ, എംപിപിമാർ, നഗരസഭാ പ്രതിനിധികൾ, പോലീസ്, ഫയർഫോഴ്‌സ് ഉദ്യോഗസ്ഥർ, വിവിധ സംസ്ഥാനങ്ങളിൽ നിന്നുള്ള വള്ളംകളി ടീമുകൾ, വിദേശ രാജ്യങ്ങളിൽ നിന്നെത്തിയ മത്സരാർത്ഥികൾ തുടങ്ങി സമൂഹത്തിന്റെ വിവിധ മേഖലകളിൽ നിന്നുള്ള പ്രമുഖരുടെ സാന്നിധ്യം പരിപാടിക്ക് കൂടുതൽ പ്രൗഢി പകർന്നു.

വർണശബളമായ കമ്മ്യൂണിറ്റി പരേഡിൽ ആയിരങ്ങൾ

വള്ളംകളിക്ക് മുന്നോടിയായി നടന്ന വർണശബളമായ കമ്മ്യൂണിറ്റി പരേഡിൽ ആയിരങ്ങളാണ് അണിനിരന്നത്. വിവിധ സംഘടനകളുടെയും സമൂഹങ്ങളുടെയും കലാ-സാംസ്കാരിക പാരമ്പര്യം വിളിച്ചോതിയ പരേഡ് ബ്രാംപ്ടൻ നഗരത്തിന് ഉത്സവഛായ നൽകി.

സമാജം വൈസ് പ്രസിഡൻറ് അരുൺ ശിവകുമാർ, ജോമൽ സെബാസ്റ്റ്യൻ, ഷിബു കൂടൽ എന്നിവർ പരേഡിന് നേതൃത്വം നൽകി. വള്ളംകളിയുടെ മുഖ്യ സംഘാടകനും അമരക്കാരനുമായ കുര്യൻ പ്രക്കാനം, പ്രമുഖ വ്യവസായി എം. എ. യൂസഫലി സമ്മാനിച്ച വള്ളംകളി പതാകയുമായി സമ്മേളന വേദിയിലേക്ക് പ്രവേശിച്ചത് ചടങ്ങിന് പ്രത്യേക ശ്രദ്ധേയത നൽകി.

കാനഡയുടെയും ഇന്ത്യയുടെയും ദേശീയ പതാകകൾ ഉയർന്നു

തുടർന്ന് നടന്ന ഉദ്ഘാടന സമ്മേളനത്തിൽ ബ്രാംപ്ടൻ മേയർ പാട്രിക് ബ്രൗൺ വള്ളംകളി ഔദ്യോഗികമായി ഉദ്ഘാടനം ചെയ്തു. സോണിയ സിദ്ധു എംപി കാനഡയുടെ ദേശീയ പതാക ഉയർത്തിയപ്പോൾ, ടൊറന്റോയിലെ ഇന്ത്യൻ കോൺസൽ ജനറൽ മഹാവീർ സിംഗ്‌വി ഇന്ത്യയുടെ സ്വാതന്ത്ര്യദിനാഘോഷങ്ങളുടെ ഭാഗമായി ഇന്ത്യൻ ദേശീയ പതാക ഉയർത്തി.

ബ്രാംപ്ടൻ മലയാളി സമാജം പ്രസിഡൻറ് കുര്യൻ പ്രക്കാനം അധ്യക്ഷത വഹിച്ച ഉദ്ഘാടന സമ്മേളനത്തിൽ കാനഡയുടെ ആഭ്യന്തര സഹമന്ത്രി റൂബി സഹോത, ഒന്റാറിയോ മന്ത്രി പ്രഭ്മീത് സിംഗ് സർക്കാർറിയ, സോണിയ സിദ്ധു എംപി, അമർജീത് ഗിൽ എംപി, ഒന്റാറിയോ മന്ത്രി ഷാർമെയ്ൻ വില്യംസ്, അമർജോത് സന്ധു എംപിപി, ഹർദീപ് ഗ്രീവാൾ എംപിപി, വിവിധ സിറ്റി കൗൺസിലർമാർ, പോലീസ് സുപ്പീരിയൻഡന്റ് ജൂഡി ധൗസൺ, വിവിധ സംഘടനകളുടെയും പ്രസ്ഥാനങ്ങളുടെയും നേതാക്കൾ തുടങ്ങി നിരവധി പ്രമുഖർ പങ്കെടുത്തു.

സമാജം ജനറൽ സെക്രട്ടറി യോഗേഷ് ഗോപകുമാർ ഉദ്ഘാടന പരിപാടികൾക്ക് നേതൃത്വം നൽകി.

ചമ്പക്കുളം ചുണ്ടന് കനേഡിയൻ നെഹ്‌റു ട്രോഫി

ആവേശകരമായ വള്ളംകളി മത്സരത്തിൽ മികച്ച പ്രകടനം കാഴ്ചവെച്ച കുട്ടനാട് ടൗൺ ബോട്ട് ക്ലബ് – ചമ്പക്കുളം ചുണ്ടൻ കനേഡിയൻ നെഹ്‌റു ട്രോഫി സ്വന്തമാക്കി.

ചാമ്പ്യൻ:
🏆 ടീം കുട്ടനാട് ടൗൺ ബോട്ട് ക്ലബ് – ചമ്പക്കുളം ചുണ്ടൻ

ഒന്നാം റണ്ണർ അപ്പ്:
🥈 ടീം കുട്ടനാട് ടൗൺ ബോട്ട് ക്ലബ് – കൈനകരി ചുണ്ടൻ

രണ്ടാം റണ്ണർ അപ്പ്:
🥉 ടീം നയാഗ്ര ബോട്ട് ക്ലബ്

വള്ളംകളിയുടെ റേസ് കോർഡിനേഷൻ കമ്മിറ്റിയിൽ ബിനു ജോഷ്വാ, ജിതിൻ പുത്തൻവീട്ടിൽ, ലെജു രാമചന്ദ്രൻ എന്നിവർ നേതൃത്വം നൽകി. ജിതിൻ പുത്തൻവീട്ടിൽ വിജയികളെ പ്രഖ്യാപിച്ചു.

സമാജം പ്രസിഡൻറ് കുര്യൻ പ്രക്കാനം വിജയികൾക്ക് ട്രോഫി സമ്മാനിച്ചു. വിജയികൾക്കുള്ള ക്യാഷ് പ്രൈസ് സമാജം ട്രഷറർ ഷിബു ചെറിയാനും ഗോൾഡ് സ്പോൺസർ അരുൺ ശിവരാമനും ചേർന്ന് വിതരണം ചെയ്തു.

കാനഡയിലെ മലയാളി ഐക്യത്തിന്റെ മഹത്തായ വേദി

കാനഡയിലെ അൻപതിലധികം മലയാളി സംഘടനകളുടെ കൂട്ടായ്മയായ NFMA Canada (National Federation of Malayalee Associations in Canada) യുടെ പ്രസിഡൻറ് കൂടിയായ കുര്യൻ പ്രക്കാനത്തിന്റെ നേതൃത്വത്തിലുള്ള പ്രമുഖ മലയാളി സംഘടനയായ ബ്രാംപ്ടൻ മലയാളി സമാജം ആണ് കനേഡിയൻ നെഹ്‌റു ട്രോഫി വള്ളംകളിയുടെ സംഘാടകർ.

പ്രസിഡണ്ട് കുര്യൻ പ്രക്കാനത്തിന്റെ നേതൃത്വത്തിൽ വിവിധ സംഘടനകളിലും സമൂഹത്തിലും പെട്ട നൂറുകണക്കിന് പ്രവർത്തകരുടെയും സന്നദ്ധപ്രവർത്തകരുടെയും സംഘടനകളുടെയും സ്പോൺസർമാരുടെയും സമൂഹത്തിന്റെയും കൂട്ടായ പരിശ്രമത്തിലാണ് ഈ മഹാമേള വിജയകരമായി അരങ്ങേറിയത്.

ട്രഷററും ഫിനാൻസ് കമ്മിറ്റിയുടെ ചുമതലക്കാരനുമായ ഷിബു ചെറിയാൻ, സമാജം വൈസ് പ്രസിഡൻറും ഗോൾഡ് സ്പോൺസറുമായ അരുൺ ശിവരാമൻ, വൈസ് പ്രസിഡൻറ് ബിനു ജോഷ്വാ, ജനറൽ സെക്രട്ടറിമാരായ യോഗേഷ് ഗോപകുമാർ, ലെജു രാമചന്ദ്രൻ, ഓർഗനൈസിംഗ് സെക്രട്ടറിമാരായ ജോമൽ സെബാസ്റ്റ്യൻ, തോമസ് ജോൺ കോന്നി, ജെഫിൻ വലയിൽ ജോസഫ്, പബ്ലിസിറ്റി വിഭാഗത്തിൽ ഷിബു കൂടൽ, ഗോപകുമാർ നായർ, നിഷ ബാബു, കൂടാതെ അന്നാ ശരത്, ജെറിൻ ജേക്കബ്, അഖിൽ വി. എസ്., ജിതിൻ പുത്തൻവീട്ടിൽ, വി. ബി. എബ്രഹാം, ലിജോ ജോക്കുട്ടി, ബെഞ്ചമിൻ, നീരജ് ലാൽ, സഞ്ജയ് മോഹൻ, ടി. പി. സുജേഷ്, ആൻസിബി, അജീഷ സതീഷ് നായർ, ബെൻസൺ തുടങ്ങിയ നിരവധി പ്രവർത്തകർ പരിപാടിയുടെ വിവിധ മേഖലകൾക്ക് നേതൃത്വം നൽകി.

കേരളത്തിന്റെ പാരമ്പര്യം കാനഡയുടെ മണ്ണിൽ

കനേഡിയൻ നെഹ്‌റു ട്രോഫി വള്ളംകളി ഇന്ന് ഒരു സാധാരണ കായികമത്സരമല്ല. കേരളത്തിന്റെ പൈതൃകവും പ്രവാസി മലയാളികളുടെ ഐക്യവും കാനഡയുടെ ബഹുസാംസ്കാരികതയും ഒരേ വേദിയിൽ സംഗമിക്കുന്ന മഹത്തായ ആഘോഷമാണ് ബ്രാംപ്ടൻ ബോട്ട് റേസ്.

പ്രഫസേഴ്‌സ് ലേക്കിൽ ഉയർന്ന ചുണ്ടൻവള്ളങ്ങളുടെ താളവും വഞ്ചിപ്പാട്ടിന്റെ ആവേശവും കാണികളുടെ ആരവവും കാനഡയുടെ മണ്ണിൽ കേരളത്തിന്റെ പുന്നമടയുടെ ഓർമ്മകൾ ഉണർത്തി.

മലയാളിയുടെ സംസ്കാരവും പാരമ്പര്യവും ലോകത്തിന്റെ ഏത് കോണിലായാലും തലമുറകളിലേക്ക് കൈമാറാൻ കഴിയുമെന്ന് തെളിയിച്ചുകൊണ്ട്, 16-ാമത് കനേഡിയൻ നെഹ്‌റു ട്രോഫി വള്ളംകളി പ്രവാസി മലയാളികളുടെ ആത്മാഭിമാനത്തിന്റെ മറ്റൊരു അഭിമാന അധ്യായമായി ചരിത്രത്തിൽ ഇടം നേടി.

PRESIDENT KURIAN PRAKANAM