കോട്ടയം: ലോക സമാധാനം, കുടുംബമൂല്യങ്ങൾ, ആത്മീയ സംഗീതം എന്നിവയുടെ പ്രചാരകനും വേൾഡ് പീസ് മിഷൻ ചെയർമാനുമായ ഡോ. സണ്ണി സ്റ്റീഫൻ 2026 ജൂലൈ 1 മുതൽ ഒക്ടോബർ 31 വരെ അമേരിക്കയിൽ വിപുലമായ തിരുവചന സംഗീത-പ്രഭാഷണ പര്യടനം നടത്തുന്നു
“Lay Apostolic Journey – On Earth as it is in Heaven” എന്ന സന്ദേശവുമായി നടക്കുന്ന ഈ പര്യടനത്തിൽ അമേരിക്കയിലെ വിവിധ സംസ്ഥാനങ്ങളിലെ ദേവാലയങ്ങൾ, ക്രൈസ്തവ സംഘടനകൾ, സംഗീതസംഗമങ്ങൾ, കുടുംബസമ്മേളനങ്ങൾ എന്നിവയിൽ അദ്ദേഹം പങ്കെടുക്കും.
45 വർഷത്തിലേറെയായി ഗാനരചന, സംഗീത ശുശ്രൂഷ, കുടുംബ കൗൺസിലിംഗ്, സമാധാന പ്രവർത്തനങ്ങൾ തുടങ്ങിയ മേഖലകളിൽ സജീവമായ ഡോ. സണ്ണി സ്റ്റീഫൻ, സഭാഗായകർക്കും സംഗീതാസ്വാദകർക്കും ആത്മീയ സംഗീതത്തിന്റെ ആഴവും പ്രായോഗിക അനുഭവങ്ങളും പങ്കുവെക്കും. വചന സംഗീതശുശ്രൂഷയുടെ പ്രാധാന്യം, ആരാധനയിലെ സംഗീതത്തിന്റെ പങ്ക്, കുടുംബജീവിതത്തിലെ മൂല്യങ്ങൾ, സമൂഹനിർമാണത്തിൽ വിശ്വാസത്തിന്റെ സ്വാധീനം തുടങ്ങിയ വിഷയങ്ങളാണ് പ്രധാനമായും അവതരിപ്പിക്കുക.
വേൾഡ് പീസ് മിഷന്റെ നേതൃത്വത്തിൽ ലോകത്തിന്റെ വിവിധ ഭാഗങ്ങളിൽ സമാധാനം, സാമൂഹിക ഐക്യം, ജീവകാരുണ്യ പ്രവർത്തനങ്ങൾ എന്നിവയ്ക്കായി പ്രവർത്തിച്ചു വരുന്ന ഡോ. സണ്ണി സ്റ്റീഫൻ, നിരവധി ഗാനങ്ങൾ രചിക്കുകയും ആലപിക്കുകയും ചെയ്തിട്ടുള്ള പ്രമുഖ സംഗീത സംവിധായകനാണ്. അദ്ദേഹത്തിന്റെ പ്രഭാഷണങ്ങളും ഗാനങ്ങളും നിരവധി രാജ്യങ്ങളിലെ മലയാളി സമൂഹത്തിനിടയിൽ ശ്രദ്ധേയമായ സ്വാധീനം ചെലുത്തിയിട്ടുണ്ട്.
അമേരിക്കയിലെ വിവിധ നഗരങ്ങളിൽ നടക്കുന്ന ഈ പര്യടനത്തിന്റെ ഭാഗമായി സംഗീത സമ്മേളനങ്ങൾ, ആത്മീയ നവീകരണ യോഗങ്ങൾ, യുവജന സംഗമങ്ങൾ, കുടുംബ കൗൺസിലിംഗ് സെഷനുകൾ, സമാധാന സന്ദേശ പരിപാടികൾ എന്നിവയും സംഘടിപ്പിക്കപ്പെടും.
പര്യടനവുമായി ബന്ധപ്പെട്ട കൂടുതൽ വിവരങ്ങൾക്കും പരിപാടി ബുക്കിംഗുകൾക്കുമായി സംഘാടകരെ ബന്ധപ്പെടാവുന്നതാണ്.
