അമേരിക്കയിലെ പ്രമുഖ ടെക് കമ്പനികൾ വിദേശ ജീവനക്കാർക്ക് സ്ഥിരതാമസത്തിനുള്ള ഗ്രീൻ കാർഡ് സ്പോൺസർ ചെയ്യുന്നത് തടയാനുള്ള പുതിയ നീക്കം ഇന്ത്യൻ ഐടി പ്രൊഫഷണലുകൾക്കിടയിൽ വലിയ ആശങ്കയാണ് ഉണ്ടാക്കിയിരിക്കുന്നത്. എന്നാൽ, ഈ തീരുമാനം ജീവനക്കാരെ ഉടനടി ബാധിക്കാനിടയില്ലെന്നാണ് ഇൻഫോസിസിന്റെ മുൻ ചീഫ് ഫിനാൻഷ്യൽ ഓഫീസർ മോഹൻദാസ് പൈ വ്യക്തമാക്കുന്നത്. ഗ്രീൻ കാർഡിനായി വർഷങ്ങളോളം കാത്തിരിക്കേണ്ട സാഹചര്യം നിലവിലുള്ളതിനാൽ നിയന്ത്രണത്തിന്റെ അടിയന്തര പ്രത്യാഘാതങ്ങൾ വളരെ പരിമിതമായിരിക്കുമെന്നാണ് അദ്ദേഹത്തിന്റെ വിലയിരുത്തൽ.

അമേരിക്ക ആരെയും രാജ്യത്തുനിന്ന് പുറത്താക്കുകയോ നിലവിലുള്ള ഗ്രീൻ കാർഡുകൾ റദ്ദാക്കുകയോ ചെയ്തിട്ടില്ലെന്ന് മോഹൻദാസ് പൈ എഎൻഐയോട് വ്യക്തമാക്കി. വിദേശ ജീവനക്കാർക്ക് സ്ഥിരതാമസ അനുമതി ലഭിക്കുന്നതിനായി തൊഴിലുടമകൾ നടത്തുന്ന സ്പോൺസർഷിപ്പ് നടപടികൾക്കാണ് ഇപ്പോൾ നിയന്ത്രണം വന്നിരിക്കുന്നത്. സ്ഥിരതാമസത്തിനുള്ള ഗ്രീൻ കാർഡ് ലഭിക്കാൻ തൊഴിലുടമയുടെ സ്പോൺസർഷിപ്പ് ആവശ്യമാണ്. എന്നാൽ അപേക്ഷ സമർപ്പിച്ചവർക്കുപോലും അനുമതി ലഭിക്കാൻ 10 മുതൽ 15 വർഷം വരെ കാത്തിരിക്കേണ്ടിവരുന്ന സാഹചര്യമാണ് നിലവിലുള്ളത്.

തൊഴിൽ അടിസ്ഥാനത്തിലുള്ള ഗ്രീൻ കാർഡ് നടപടികളിലെ പ്രധാനപ്പെട്ട പെർമനന്റ് ലേബർ സർട്ടിഫിക്കേഷൻ പ്രോഗ്രാം ആരംഭിക്കുന്നതിനോ മുന്നോട്ടുകൊണ്ടുപോകുന്നതിനോ നിയന്ത്രണം ഏർപ്പെടുത്തുന്നതാണ് പുതിയ നീക്കം. ഇത് ഭാവിയിൽ പുതിയ അപേക്ഷകർക്ക് തടസ്സമായേക്കാം. പുതിയ നീക്കം തങ്ങളുടെ ജീവനക്കാരുടെ ആസൂത്രണത്തെയോ ഉപഭോക്തൃ സേവനങ്ങളെയോ ബാധിക്കില്ലെന്ന് ടാറ്റ കൺസൾട്ടൻസി സർവീസസ് (ടിസിഎസ്) അറിയിച്ചു. കഴിഞ്ഞ രണ്ട് വർഷമായി കമ്പനിയുടെ പെർമ് അപേക്ഷകളുടെ എണ്ണം വളരെ കുറവായിരുന്നുവെന്നും, അടുത്ത അഞ്ച് വർഷത്തിനുള്ളിൽ അമേരിക്കയിൽ 15,000 പേരെ അധികമായി നിയമിക്കാൻ പദ്ധതിയുണ്ടെന്നും കമ്പനി വ്യക്തമാക്കുന്നു.

അമേരിക്കയിലെ ഇന്ത്യൻ ഐടി ജീവനക്കാരുടെ ഭാവിയെക്കുറിച്ച് ആശങ്ക പ്രകടിപ്പിച്ച സോഹോ സ്ഥാപകൻ ശ്രീധർ വെമ്പു, ഇന്ത്യയിലേക്ക് മടങ്ങിവരാൻ എക്സ് പ്ലാറ്റ്‌ഫോമിലൂടെ ആഹ്വാനം ചെയ്തു. ഇന്ത്യയെ കെട്ടിപ്പടുക്കാൻ പുതിയൊരു ഭാവിയുടെ തുടക്കമായി ഇതിനെ കാണാമെന്നാണ് അദ്ദേഹത്തിന്റെ പക്ഷം. ഇൻഫോസിസ്, ടിസിഎസ്, വിപ്രോ, എച്ച്സിഎൽടെക്, കോഗ്നിസന്റ്, ക്യാപ്ജെമിനി തുടങ്ങിയ ഇന്ത്യൻ ഐടി കമ്പനികൾക്കൊപ്പം മൈക്രോസോഫ്റ്റ്, അഡോബി എന്നീ പ്രമുഖ സാങ്കേതിക കമ്പനികളും ഈ നടപടിയുടെ പരിധിയിൽ ഉൾപ്പെടുന്നുണ്ട്.
എച്ച്-1ബി വിസയിൽ ജോലി ചെയ്യുന്ന ചിലർക്ക് കാലാവധിക്കപ്പുറം വിസ നീട്ടാൻ ഗ്രീൻ കാർഡ് നടപടികളിലെ നിശ്ചിത ഘട്ടങ്ങൾ നിർണായകമാണ്. അതിനാൽ പുതിയ നിയന്ത്രണത്തിന്റെ ഉടനടി ആഘാതം പരിമിതമാണെങ്കിലും, ദീർഘകാലാടിസ്ഥാനത്തിൽ ഇത് ഇന്ത്യൻ ഐടി ജീവനക്കാരുടെ അമേരിക്കയിലെ സ്ഥിരതാമസ പദ്ധതികളെ സ്വാധീനിച്ചേക്കാം.