അതിരുകളില്ലാതെ സ്‌നേഹിച്ചിരുന്നവർ 
അതിരുകൾ മതിൽകെട്ടി മറച്ചിടുമ്പോൾ 
മനുഷ്യന് മനുഷ്യനെ കണ്ടുകൂടാത്തൊരു 
മാറ്റങ്ങൾ വന്നല്ലോ നമ്മുടെ നാട്ടിലും!

മറയ്ക്കുന്നു നമ്മുടെ സംസ്കാരശോഭയേ..
മനസ്സിലാവാഹിച്ചോരഭിനിവേശത്തേയും 
മതചിന്ത മറതീർത്ത് മല്ലടിക്കുന്നവർ 
മതിവരാഞ്ഞലറി കൊലവിളി നടത്തുന്നു!

മറതീർക്കും പരസ്പരം വിദ്വേഷവിത്തുകൾ  
മർത്യവേഷത്തിൽ മൃഗങ്ങളായ്മാറിയ-
മതജാതി ചിന്തയാൽ വെറിപൂണ്ടിവരേയും
മഹത്വവൽക്കരിക്കുമധികാരിവർഗ്ഗങ്ങൾ!

തണലായി തുണയായ് കൂടെനിൽക്കേണ്ടവർ 
തഞ്ചത്തിൽ തമ്മിലടിപ്പിച്ചു നിർത്തി 
നിസ്സീമമാകുന്ന നരഹത്യയെപോലും 
നിർവ്വികാരത്തോടെ നിസ്സാരമാക്കുന്നു!! 

മതഭ്രാന്തൊടുങ്ങുവാൻ സംതൃപ്തി പടരുവാൻ 
മതിഭ്രമംവെടിഞ്ഞു മതിലുകൾ പൊളിക്കണം 
മനം മന്ദിരമാകണം മുദിതമാനവരാകുവാൻ, 
മലീമസമൊടുങ്ങി രാജ്യം മഞ്ജുളമാകുവാൻ ..

 ഭരതകുമാർ കെ.എം