ന്യൂയോർക്ക്: നിയുക്ത ന്യൂയോർക്ക് മേയർ സോഹ്‌റാൻ മാംദാനിയുടെ അപ്പോയിന്റ്‌മെന്റ് ഡയറക്ടറായി ചുമതലയേറ്റ കാതറിൻ അൽമോണ്ടെ ഡാ കോസ്റ്റ (Catherine Almonte Da Costa) സ്ഥാനമേറ്റ് ഒരു ദിവസത്തിനുള്ളിൽ രാജിവെച്ചു. വർഷങ്ങൾക്ക് മുമ്പ് സോഷ്യൽ മീഡിയയിൽ നടത്തിയ ജൂതവിരുദ്ധ പരാമർശങ്ങൾ വിവാദമായതിനെത്തുടർന്നാണ് നടപടി.

പത്ത് വർഷങ്ങൾക്ക് മുമ്പ് ഡാ കോസ്റ്റ തന്റെ എക്സ് (X) അക്കൗണ്ടിൽ "പണക്കൊതിയന്മാരായ ജൂതന്മാർ" (Money hungry Jews) എന്നും മറ്റും നടത്തിയ പരാമർശങ്ങളാണ് ഇപ്പോൾ പുറത്തുവന്നത്. 'ജഡ്ജ് സ്ട്രീറ്റ് ജേർണൽ' ആണ് ഈ പഴയ പോസ്റ്റുകൾ പുറത്തുവിട്ടത്.

 ജൂതമതസ്ഥരായ കുട്ടികളുടെ അമ്മ കൂടിയായ താൻ ആ വാക്കുകൾ വരുത്തിയ മുറിവിൽ ഖേദിക്കുന്നുവെന്നും, പുതിയ ഭരണകൂടത്തിന്റെ പ്രവർത്തനങ്ങൾക്ക് ഇതൊരു തടസ്സമാകാൻ ആഗ്രഹിക്കാത്തതിനാലാണ് രാജി സമർപ്പിക്കുന്നതെന്നും ഡാ കോസ്റ്റ പ്രസ്താവനയിൽ പറഞ്ഞു. തന്റെ 19-20 വയസ്സ് പ്രായത്തിൽ നടത്തിയ പരാമർശങ്ങളായിരുന്നു അവയെന്നും അവർ വിശദീകരിച്ചു.

 ഡാ കോസ്റ്റയുടെ ഖേദപ്രകടനവും രാജിയും അംഗീകരിച്ചതായി മേയർ സോഹ്‌റാൻ മാംദാനി അറിയിച്ചു.

 ഇസ്രായേൽ വിരുദ്ധ നിലപാടുകളുടെ പേരിൽ ജൂതസമൂഹത്തിൽ നിന്ന് നേരത്തെ തന്നെ എതിർപ്പ് നേരിടുന്ന മാംദാനിക്ക്, തന്റെ ഉന്നത ഉദ്യോഗസ്ഥയുടെ ഈ പഴയ പരാമർശങ്ങൾ വലിയ തിരിച്ചടിയായി. ആൻറി-ഡിഫമേഷൻ ലീഗ് (ADL) അടക്കമുള്ള സംഘടനകൾ ഇതിനെതിരെ ശക്തമായ പ്രതിഷേധം രേഖപ്പെടുത്തി.

നിയമനത്തിന് മുൻപ് ഉദ്യോഗസ്ഥരുടെ പശ്ചാത്തലം പരിശോധിക്കുന്നതിലുണ്ടായ വീഴ്ചയെക്കുറിച്ച് മാംദാനി ഭരണകൂടത്തിനെതിരെ വിമർശനം ഉയരുന്നുണ്ട്.