ഷിക്കാഗോ: പത്ത് ദിവസത്തോളമായി കാണാതായ ഷിക്കാഗോ പബ്ലിക് സ്കൂൾ (CPS) അധ്യാപിക ലിൻഡ ബ്രൗണിന്റെ (53) മൃതദേഹം മിഷിഗൺ തടാകത്തിൽ നിന്ന് കണ്ടെടുത്തു. ചൊവ്വാഴ്ച നടത്തിയ പോസ്റ്റ്‌മോർട്ടത്തിന് ശേഷം ലിൻഡയുടെ മരണം ആത്മഹത്യയാണെന്ന് മെഡിക്കൽ എക്സാമിനർ സ്ഥിരീകരിച്ചു. തടാകത്തിൽ വീണ് ശ്വാസം മുട്ടിയാണ് മരണം സംഭവിച്ചത്.

തിങ്കളാഴ്ച ഉച്ചയ്ക്ക് 12 മണിയോടെ ഷിക്കാഗോയുടെ തെക്കൻ മേഖലയിലുള്ള തടാകതീരത്തു നിന്നാണ് മൃതദേഹം ലഭിച്ചത്.

റോബർട്ട് ഹീലി എലിമെന്ററി സ്കൂളിലെ സ്പെഷ്യൽ എഡ്യൂക്കേഷൻ അധ്യാപികയായിരുന്നു ലിൻഡ. ജനുവരി 3-നാണ് ഇവരെ അവസാനമായി കാണുന്നത്.

ലിൻഡ തന്റെ കാർ ഉപേക്ഷിച്ച ശേഷം തടാകത്തിന് സമീപമുള്ള പാലത്തിലൂടെ നടന്നുപോകുന്ന സിസിടിവി ദൃശ്യങ്ങൾ പോലീസിന് ലഭിച്ചിരുന്നു. എന്നാൽ തിരിച്ചുവരുന്ന ദൃശ്യങ്ങൾ ഉണ്ടായിരുന്നില്ല.

ജോലിയിൽ നിന്ന് അവധിയിലായിരുന്ന ലിൻഡ, തിരികെ പ്രവേശിക്കാൻ ഇരിക്കെ കടുത്ത മാനസിക സമ്മർദ്ദവും ഭയവും അനുഭവിച്ചിരുന്നതായി ഭർത്താവ് ആന്റ്‌വോൺ ബ്രൗൺ വെളിപ്പെടുത്തിയിരുന്നു.

ലിൻഡയുടെ വിയോഗത്തിൽ ഷിക്കാഗോ മേയർ ബ്രാൻഡൻ ജോൺസൺ അനുശോചനം രേഖപ്പെടുത്തി. കുട്ടികളുടെ പ്രിയപ്പെട്ട അധ്യാപികയായിരുന്നു അവരെന്നും സമൂഹത്തിന് വലിയ നഷ്ടമാണിതെന്നും അദ്ദേഹം പറഞ്ഞു. "അവർ ഞങ്ങൾക്ക് പ്രതീക്ഷയുടെ പാഠങ്ങളാണ് നൽകിയത്," എന്ന് ലിൻഡയുടെ മുൻ വിദ്യാർത്ഥികൾ വികാരാധീനരായി സ്മരിച്ചു.