വിമാനം പറത്തുന്നതിനിടെ സഹപൈലറ്റിന്റെ ആക്രമണം, തലയ്ക്ക് ഗുരുതരമായി പരിക്ക്, ചുറ്റും നിലവിളികളും പരിഭ്രാന്തിയും. ഏത് നിമിഷവും ജീവൻ നഷ്ടപ്പെടാമെന്ന ഭീതിയിലൂടെയാണ് ഫ്ലൈ ദുബായ് വിമാനത്തിന്റെ ക്യാപ്റ്റൻ സ്മിത് മച്ചാർ കടന്നുപോയത്. ദുബായ്–ടെൽ അവീവ് വിമാനത്തിലുണ്ടായ സംഭവത്തിന്റെ ഭീതിജനകമായ അനുഭവങ്ങൾ ചികിത്സയിലിരിക്കെ നൽകിയ അഭിമുഖത്തിലാണ് അദ്ദേഹം വെളിപ്പെടുത്തിയത്. സ്വന്തം ജീവൻ രക്ഷിക്കുന്നതിനൊപ്പം വിമാനത്തിലുണ്ടായിരുന്ന യാത്രക്കാരുടെ സുരക്ഷ ഉറപ്പാക്കേണ്ട ഉത്തരവാദിത്വവും ആ നിമിഷങ്ങളിൽ തനിക്കുണ്ടായിരുന്നുവെന്ന് അദ്ദേഹം പറഞ്ഞു.

ആക്രമണത്തിൽ തലയ്ക്ക് ശക്തമായ അടിയേറ്റതോടെ ബോധം മറയുകയും തിരിച്ചുവരികയും ചെയ്യുന്ന അവസ്ഥയിലായിരുന്നെന്ന് മച്ചാർ ഓർത്തെടുത്തു. എന്താണ് സംഭവിക്കുന്നതെന്ന് വ്യക്തമായി മനസ്സിലാക്കാൻ പോലും കഴിഞ്ഞിരുന്നില്ല. എന്നാൽ, അതിജീവിക്കണമെങ്കിൽ എന്തെങ്കിലും ചെയ്യണമെന്ന് തിരിച്ചറിഞ്ഞതോടെ സ്വയം പ്രവർത്തിക്കാനുള്ള ശ്രമം തുടങ്ങി. വിമാനത്തിന്റെ നിയന്ത്രണം നഷ്ടപ്പെടുന്ന സാഹചര്യത്തിൽ സഹപ്രവർത്തകരിലൊരാൾ കോക്ക്പിറ്റിൽ നിർണായകമായി ഇടപെട്ട് നിയന്ത്രണം ഏറ്റെടുത്തതും അദ്ദേഹം ഓർത്തെടുത്തു. വാതിൽ തുറന്നപ്പോൾ താൻ കമിഴ്ന്നു കിടക്കുന്നതായാണ് ഓർമയെന്നും ചുറ്റുമുണ്ടായിരുന്നവരുടെ നിലവിളികളും പരിഭ്രാന്തിയും ഇന്നും ഓർക്കുന്നുണ്ടെന്നും മച്ചാർ പറഞ്ഞു.

മരണഭയം തോന്നിയെങ്കിലും നിഷ്‌ക്രിയനായി തുടരാനാവില്ലെന്ന് മനസ്സിലാക്കിയെന്നും ഗുരുതരമായ സാഹചര്യം മറികടക്കാൻ അടിയന്തരമായി ഇടപെടേണ്ടതുണ്ടായിരുന്നെന്നും അദ്ദേഹം വ്യക്തമാക്കി. സ്വന്തം സുരക്ഷയ്‌ക്കൊപ്പം മറ്റുള്ളവരുടെ ജീവനും പ്രധാനമായിരുന്നു. വ്യത്യസ്ത രീതിയിലാണ് ഓരോരുത്തരും ആ ഭീതിജനക സാഹചര്യത്തോട് പ്രതികരിച്ചത്. വിമാനത്തിന്റെ നിയന്ത്രണം ഏറ്റെടുത്ത് രക്ഷാപ്രവർത്തനം നടത്തിയ സഹപ്രവർത്തകനോട് നന്ദി അറിയിച്ച മച്ചാർ, ആ സഹായം ജീവിതാവസാനംവരെ മറക്കില്ലെന്നും കൂട്ടിച്ചേർത്തു.

സെപ്റ്റംബർ 30-നാണ് ഫ്ലൈ ദുബായ് വിമാനത്തിനുള്ളിൽ സഹപൈലറ്റായ ഒമാൻ സ്വദേശി ഹമാം അൽ ഹമാമി ക്യാപ്റ്റൻ സ്മിത് മച്ചാറിനെ ആക്രമിക്കുകയും വിമാനം തകർക്കാൻ ശ്രമിക്കുകയും ചെയ്തതെന്നാണ് റിപ്പോർട്ട്. ഇതോടെ വിമാനത്തിന്റെ നിയന്ത്രണം നഷ്ടമായി. പരിക്കേറ്റ മച്ചാറിനെ സഹയാത്രക്കാർ പരിചരിക്കുകയും ഹമാമിയെ കീഴ്പ്പെടുത്തുകയും ചെയ്തു. തുടർന്ന് യാത്രക്കാരായിരുന്ന രണ്ട് പൈലറ്റുമാർ ചേർന്ന് വിമാനത്തിന്റെ നിയന്ത്രണം വീണ്ടെടുത്ത് സൗദി അറേബ്യയിലെ തബൂക്കിൽ അടിയന്തരമായി ഇറക്കി. ഇസ്രയേലിലെ ബെൻ ഗുറിയൻ വിമാനത്താവളത്തിലെ ടെർമിനലിലേക്ക് വിമാനം ഇടിച്ചിറക്കാനായിരുന്നു ഹമാമിയുടെ ലക്ഷ്യമെന്ന് പിന്നീട് നടത്തിയ അന്വേഷണത്തിൽ വ്യക്തമായതായും റിപ്പോർട്ടിൽ പറയുന്നു. വിമാനത്തിലുണ്ടായിരുന്നവരുടെ സമയോചിതമായ ഇടപെടലാണ് കൂടുതൽ ഗുരുതരമായ ദുരന്തം ഒഴിവാക്കാൻ നിർണായകമായത്.