സോഷ്യൽ മീഡിയയുടെ അതിപ്രസരം നമ്മുടെ നൈതിക മൂല്യങ്ങളെ എങ്ങനെ ബാധിക്കുന്നു എന്നത് ഗൗരവകരമായ ഒരു ചോദ്യമാണ്. ഡിജിറ്റൽ യുഗത്തിൽ ധാർമ്മികത പലപ്പോഴും ചോദ്യം ചെയ്യപ്പെടുകയും പുതിയ രീതിയിൽ നിർവചിക്കപ്പെടുകയും ചെയ്യുന്നു. കേരളത്തിലെ പൊതുഗതാഗത സംവിധാനങ്ങളിൽ  ഉണ്ടാകുന്ന തർക്കങ്ങൾ ചിത്രീകരിച്ച് പ്രചരിപ്പിക്കുന്നത് ഈ സാഹചര്യത്തിൽ വലിയ ചർച്ചകൾക്ക് വഴിതുറക്കുന്നു സോഷ്യൽ മീഡിയയിൽ ആർക്കും എന്തിനെക്കുറിച്ചും സംസാരിക്കാനുള്ള സ്വാതന്ത്ര്യമുണ്ട്. കേരളത്തിലെ ഒരു ബസിനുള്ളിൽ നടക്കുന്ന തർക്കം മൊബൈലിൽ പകർത്തി പങ്കുവെക്കുമ്പോൾ അത് പലപ്പോഴും വിദ്വേഷ പ്രചാരണത്തിനോ വ്യക്തിഹത്യയ്ക്കോ കാരണമാകുന്നു. ഈ സ്വാതന്ത്ര്യം മറ്റൊരാളുടെ അന്തസ്സിനെ ബാധിക്കുമ്പോൾ അതൊരു ധാർമ്മിക പ്രശ്നമായി മാറുന്നു.

പലപ്പോഴും ബസ് യാത്രയ്ക്കിടയിലെ പ്രശ്നങ്ങളുടെ പകുതി ഭാഗം മാത്രം ചിത്രീകരിച്ച വീഡിയോകളാണ് വൈറലാകുന്നത്. വ്യാജവാർത്തകൾ പ്രചരിപ്പിക്കുന്നത് ഇന്ന് ഒരു സാധാരണ സംഭവമായി മാറിയിരിക്കുന്നു. സന്ദർഭത്തിൽ നിന്ന് അടർത്തിയെടുത്ത ഇത്തരം ദൃശ്യങ്ങൾ പങ്കുവെക്കുന്നതിന് മുൻപ് അതിന്റെ സത്യാവസ്ഥ പരിശോധിക്കുക എന്നത് ഒരു വ്യക്തിയുടെ ധാർമ്മിക ഉത്തരവാദിത്തമാണ്.

മറ്റൊരാളുടെ അനുവാദമില്ലാതെ അവരുടെ ദൃശ്യങ്ങൾ പകർത്തുന്നതും അത് പരസ്യപ്പെടുത്തുന്നതും ധാർമ്മികമായി തെറ്റാണ്. ബസ് യാത്രക്കാരുടെ സ്വകാര്യ നിമിഷങ്ങളിലേക്ക് ക്യാമറയുമായി എത്തിനോക്കുന്ന പ്രവണത ഇന്ന് വർധിച്ചു വരുന്നു. ഇത് വ്യക്തിസ്വാതന്ത്ര്യത്തിന് മേലുള്ള കടന്നുകയറ്റമാണ്.
ഓൺലൈൻ ഇടങ്ങളിൽ എങ്ങനെ പെരുമാറണം എന്നതിനെക്കുറിച്ച് കൃത്യമായ ഒരു ധാർമ്മിക ബോധം പുതിയ തലമുറയ്ക്ക് ആവശ്യമാണ്. തർക്കങ്ങൾ പരിഹരിക്കാൻ ശ്രമിക്കുന്നതിന് പകരം അത് സോഷ്യൽ മീഡിയയിൽ എത്തിച്ച് 'ലൈക്കുകൾ' നേടാൻ ശ്രമിക്കുന്നത് ശരിയായ ഡിജിറ്റൽ സംസ്കാരമല്ല.

സ്വന്തം പേരോ മുഖമോ വെളിപ്പെടുത്താതെ ആരെയും അധിക്ഷേപിക്കാം എന്ന സാഹചര്യം ആളുകളെ കൂടുതൽ ധാർമ്മിക വിരുദ്ധമായ കാര്യങ്ങൾ ചെയ്യാൻ പ്രേരിപ്പിക്കുന്നു. ബസ് സംഭവങ്ങളിൽ ഉൾപ്പെട്ടവരെ അനാവശ്യമായി ക്രൂശിക്കാൻ ഇത് കാരണമാകുന്നു.വസ്തുതകൾക്ക് പകരം വികാരങ്ങൾക്ക് മുൻതൂക്കം നൽകുന്ന ചർച്ചകൾ പലപ്പോഴും വിദ്വേഷം പടർത്താൻ കാരണമാകുന്നു. ഇത് പലപ്പോഴും ബസ് ജീവനക്കാർക്കെതിരെയോ അല്ലെങ്കിൽ യാത്രക്കാർക്കെതിരെയോ ഉള്ള അന്ധമായ രോഷമായി മാറുന്നു.

ധാർമ്മികത എന്നത് വ്യക്തിപരമായ ഒരു ബോധ്യമാണെങ്കിലും, സമൂഹമാധ്യമങ്ങൾ ഉപയോഗിക്കുമ്പോൾ സാമൂഹികമായ ഒരു ഉത്തരവാദിത്തം കൂടി നമുക്കുണ്ട്. സാങ്കേതികവിദ്യയെ മനുഷ്യത്വപരമായും മൂല്യബോധത്തോടെയും ഉപയോഗിക്കുമ്പോൾ മാത്രമേ യഥാർത്ഥ പുരോഗതി ഉണ്ടാവുകയുള്ളൂ. മറ്റുള്ളവരുടെ അവകാശങ്ങളെ മാനിച്ചുകൊണ്ടുള്ള ഒരു ഡിജിറ്റൽ സംസ്‌കാരം വളർത്തിയെടുക്കുക എന്നത് കാലഘട്ടത്തിന്റെ ആവശ്യമാണ്. കേരളം പോലെ ഉയർന്ന സാക്ഷരതയുള്ള ഒരു സമൂഹത്തിൽ ഡിജിറ്റൽ ധാർമ്മികതയുടെ പ്രാധാന്യം നാം തിരിച്ചറിയേണ്ടതുണ്ട്.

പി പി ചെറിയാൻ