ഹൂസ്റ്റണ്‍: ജൂലൈ 4 മുതല്‍ 7 വരെ നടക്കുന്ന മലയാളി പെന്തെക്കോസ്ത് കോണ്‍ഫറന്‍സിന്‍റെ പ്രമോഷണല്‍ മീറ്റിംഗുകള്‍ അമേരിക്കയിലെ പ്രമുഖ പട്ടണങ്ങളില്‍ വെച്ചു നടക്കുന്നു.മാര്‍ച്ച് 16-ന് ന്യൂജേഴ്സിയിലെ ഇന്ത്യാ ക്രിസ്ത്യന്‍ അസംബ്ലിയില്‍ വെച്ചും 17-ന് ഫിലാഡല്‍ഫിയായിലുള്ള എബനേസര്‍ ചര്‍ച്ച് ഓഫ് ഗോഡില്‍ വെച്ചും 22-ാം തീയതി ഒക്കലഹോമയിലും 23-ന് തുള്‍സാ ഒക്കലഹോമായിലും 30-ാം തീയതി ഹൂസ്റ്റണിലുള്ള ഐ.പി.സി ഹെബ്രോനില്‍ വെച്ചും 31-ാം തീയതി ഡാളസ് അഗപ്പേ ചര്‍ച്ചില്‍ വെച്ചും ഈ മീറ്റിംഗുകള്‍ നടക്കുന്നതാണ്.
ദേശീയ നേതാക്കളോടൊപ്പം വിവിധ സഭകളുടെ പാസ്റ്റര്‍മാരും പ്രതിനിധികളും സംബന്ധിക്കും. നാഷണല്‍ കണ്‍വീനറായി പാസ്റ്റര്‍ ഫിന്നി ആലുംമൂട്ടില്‍, നാഷണല്‍ സെക്രട്ടറി രാജു പൊന്നോലില്‍, നാഷണല്‍ ട്രഷറര്‍ ബിജു തോമസ്, യൂത്ത് കോ-ഓര്‍ഡിനേറ്റര്‍ റോബിന്‍ രാജു, ലേഡീസ് കോ-ഓര്‍ഡിനേറ്റര്‍ ആന്‍സി സന്തോഷും പ്രവര്‍ത്തിക്കുന്നു.ലോകോത്തര സൗകര്യങ്ങളുള്ള ഹൂസ്റ്റണിലെ ജോര്‍ജൂ ആര്‍. ബ്രൗണ്‍ കണ്‍വന്‍ഷന്‍ സെന്‍റര്‍ വേദിയായി തെരഞ്ഞെടുക്കപ്പെട്ടിരിക്കുന്നു. ലോകപ്രസിദ്ധമായ നിരവധി കണ്‍വന്‍ഷന്‍ പ്രഭാഷകര്‍ കടന്നുവരുന്നു. യുവജനങ്ങള്‍ക്കും കുട്ടികള്‍ക്കും സഹോദരിമാരുടെ മീറ്റിംഗുകളോടൊപ്പം ഇംഗ്ലീഷിലും മലയാളത്തിലും മീറ്റിംഗുകള്‍ ക്രമീകരിച്ചിരിക്കുന്നു.ഈ മാസം വിവിധ പട്ടണങ്ങളില്‍ നടക്കുന്ന പ്രമോഷണല്‍ മീറ്റിംഗുകളെ സംഗീതസാന്ദ്രമാക്കുവാനായി പ്രമുഖ ക്രൈസ്തവ ഗായകന്‍ ഇമ്മാനുവേല്‍ ഹെന്‍റി കടന്നുവരുന്നു. ഈ സംഗീതസന്ധ്യകള്‍ മീറ്റിംഗുകള്‍ക്ക് മികവ് കൂട്ടും. ഈ സംഗീത സായാഹ്നങ്ങള്‍ തികച്ചും സൗജന്യമായിരിക്കും.