ചിക്കാഗോ: ഇല്ലിനോയിയിലെ പ്ലെയിന്‍ഫീല്‍ഡ് വില്ലേജ് ട്രസ്റ്റിയായി ശിവ പണിക്കര്‍ (ശിവന്‍ മുഹമ്മ) എതിരില്ലാതെ വിജയിച്ചു. കേരളത്തില്‍ ആലപ്പുഴ ജില്ലയിലെ മുഹമ്മ സ്വദേശിയാണ് ശിവ പണിക്കര്‍. ഒരു ഇന്ത്യക്കാരന്‍ ഈ സ്ഥാനത്തേക്ക് മത്സരിക്കുന്നതും വിജയിക്കുന്നതും ആദ്യമായിട്ടാണ്. ഏപ്രില്‍ ഒന്നിനായിരുന്നു ഇലക്ഷന്‍. മെയ് ആദ്യവാരം സത്യപ്രതിജ്ഞ നടക്കും.
ചിക്കാഗോ നഗരത്തില്‍ നിന്നും 35 മൈല്‍ അകലെയുള്ള പ്ലെയിന്‍ഫീല്‍ഡ് വില്ലേജിന്‍റെ ജനസംഖ്യ 55,000. 1500-ല്‍ താഴെയാണ് ഇന്ത്യക്കാര്‍. വോട്ടര്‍മാര്‍ 28,000. ആറ് ട്രസ്റ്റിമാരും വില്ലേജ് പ്രസിഡണ്ട് (മേയര്‍) അടങ്ങിയ ബോര്‍ഡാണ് വില്ലേജിന്‍റെ ഭരണസമിതി. മൂന്നുപേരെ വേണ്ട സ്ഥാനത്ത് നാലുപേര്‍ മത്സരരംഗത്തുണ്ടായിരുന്നു. അതില്‍ ഒരാളെ അയോഗ്യനാക്കിയതിനാല്‍ മറ്റ് മൂന്നുപേരും വിജയിച്ചു. ഇലക്ഷന്‍ പാര്‍ട്ടി അടിസ്ഥാനത്തില്‍ അല്ലായിരുന്നു. എങ്കിലും റിപ്പബ്ലിക്കന്‍ പാര്‍ട്ടി ശിവ പണിക്കരെ പിന്തുണച്ചിരുന്നു. 2000-ത്തില്‍പ്പരം വോട്ട് ശിവ പണിക്കര്‍ക്ക് ലഭിച്ചു. അദ്ദേഹത്തിന്‍റെ ഇലക്ഷന്‍ കമ്മിറ്റിക്ക് ഡെയ്ല്‍ ഫൊന്‍റാന (ചെയര്‍മാന്‍), രാജ് പിള്ള (കോ-ചെയര്‍), ഷിബു കുര്യന്‍ (സെക്രട്ടറി), ശിശിര്‍ ജെയിന്‍, മദന്‍ പാമൂലപതി, രാജന്‍ മാടശ്ശേരി, സുബാഷ് ജോര്‍ജ് തുടങ്ങിയവര്‍ നേതൃത്വം നല്കി.

ഫിസിക്സില്‍ മാസ്റ്റര്‍ ബിരുദധാരിയായ ശിവ പണിക്കര്‍ 1995-ല്‍ അമേരിക്കയിലെത്തി. വിവരസാങ്കേതിക വിദ്യയില്‍ വൈദഗ്ദ്ധ്യം നേടി. സോഫ്റ്റ്വെയര്‍ എഞ്ചിനീയറായി ജോലി ചെയ്യുകയും വിജയകരമായ പല ബിസിനസുകളും നടത്തുകയും ചെയ്തു. ഇപ്പോള്‍ മുഴുവന്‍സമയം സ്റ്റോക്ക് വ്യാപാരി എന്ന നിലയിലും പ്രവര്‍ത്തിക്കുന്നു.
മികച്ച സംഘാടകന്‍, എഴുത്തുകാരന്‍ തുടങ്ങിയ നിലകളില്‍ അമേരിക്കന്‍ മലയാളി സമൂഹത്തില്‍ നിറസാന്നിദ്ധ്യമാണ് ശിവ പണിക്കര്‍. ഇന്ത്യാ പ്രസ്ക്ലബ് ഓഫ് നോര്‍ത്ത് അമേരിക്കയുടെ നാഷണല്‍ പ്രസിഡണ്ട്, അഡ്വൈസറി ബോര്‍ഡ് ചെയര്‍മാന്‍, ചിക്കാഗോ ചാപ്റ്റര്‍ പ്രസിഡണ്ട്, കൈരളി ടിവി ഡയറക്ടര്‍ തുടങ്ങിയ വിവിധ നിലകളില്‍ കഴിവു തെളിയിച്ചിട്ടുള്ള ശിവ പണിക്കരുടെ അമേരിക്കന്‍ രാഷ്ട്രീയ രംഗത്തേക്കുള്ള ആദ്യചുവടുവെപ്പാണ് ഈ വിജയം. ഫാമിലി മെഡിസിനില്‍ പ്രാക്ടീസ് ചെയ്യുന്ന ഡോ. ആനന്ദവല്ലി പിള്ളയാണ് ഭാര്യ. മക്കള്‍: നയന പിള്ള, വിഷ്ണു പിള്ള. മരുമകള്‍: ശാരി കുമാര്‍.